Chapter 28: •CHP-27•

•••

Uske baal peshani par be tarteebi se bikhare the, tie ki knot dheeli thi. west coat ke button khule hue thay. barish ki nami kahin kahin kaandhon par, balon par thehri thi. nidhaal qadam uthate hue usne shirt ke oopri button bhi khol diye The. rukh sidiyon ki taraf tha.

Jannat ko ghar chhore poori saat raatein aaj tamam hone wali theen aur abhi tak uska suraagh nahi mil saka tha. woh apni khaala ke ghar nahi gayi thi. usne apne khandan ke kisi fard se rabita nahi kya tha. uski koi aisi dost nah thi jis ke paas woh ja sakti. koi rishta daar jis ke yahan panah le sakti. woh usey apne tain har jagah talaash kar chuka tha magar woh nahi thi. woh kahin bhi nahi thi.

woh kamre mein daakhil huwa to guzashta kayi raton ki tarah is raat bhi usne lights on nahi ki. apne aas paas, apne charon taraf usey andhera darkar tha. magar andhera bhi jaisey roshni hone laga tha.

woh us par sab ayaa'n karne laga tha. jannat kamaal ki jo cheez jahan rakhi thi, wahi mojood thi. uska kambal, takiya, laptop, charm bracelet jisey woh sonay se pehlay utaar kar table par rakh diya karti thi. wash room mein uski hair pins, rang birange cluctcher, hair clips har jagah bikhare pade the.

Dressing table par cosmatic ki chand ashya dhari theen. Is kamre mein uski nishani jaise har jagah thi.

pehlay woh thi to zindagi se khafa nazar ‫na kahin theherti nahi thi aur ab jab woh nahi thi to woh usey apni har aik cheez mein baar baar nazar aa rahi thi.

aik baar phir woh uska mobile utha chuka tha. aik baar phir woh un tasaveer ko dekh raha tha jo aath din pehle usey raat ke baara bajey kisi ajnabi number se arsaal ki gayi thi.

chand massages jinhein parha nahi gaya tha, kuch calls jo miss kar di gayi thi. usne mobile rakh diya. ab woh wardrobe khole khada tha. aik aik kar ke har shai nikalta carpet par dhair kiye ja raha tha.

London ki tickets, passport, safri bag, packing ke liye muntakhib ki jane wali zaroori ashya aur jaisa woh usse keh kar gaya tha, woh uska samaan pack kar chuki thi. aur uske liye usne yaqeenan mrs. Shirazi ki madad li thi tab hi uske wohi kapde bag mein rakhe gaye the jo woh aksar beron mulk dore par le jata tha.

Wardrobe ke nichale khane mein hand bags ke sath hi jewellery box rakhe the. haq mehar ka cheque bhi mojood tha, qeemti Ahaef bhi mehfooz rakhe the.

Jannat kamaal apne sath kuch bhi le kar nahi gayi thi. qabar mein utarti kisi laash ki tarah woh apne sab kuch peechey chhor kar gayi thi. woh kapdo ko idhar udhar karta, uski cheezon ko nikaal nikaal kar kuch talashta ajeeb si kefiyat se dochar lag raha tha.

oopri khane mein rakha aik siyah bag khenchne par uske barabar mein para lakdi ka box uske qadmon mein girte hi khul gaya tha. chand khutoot, kuch tasaveer aur ashya uske qadmon mein bikhar gayi thi.

woh be ikhtiyar ruk gaya tha.

box ke aik kone par hurf 'F' ki calligraphy thi. aapas mein takrata do talwaron ka nishaan wazeh tha. aag pakadati aik tasweer dhund ki thi to doosri tasweer ki deewar par wazeh ho rahi thi. Usne be sakhta qadam uthaya. kanch ka tukda pair ke talwe mein kahin chuba.

"Itni si chot lagne se koi nahi marta."

"Mein to mar jati hoon." wo thehr gaya. ruk gaya. jam gaya.

jalti hui lakdion mein aik aur safhe ka izafah huwa. sakit paanion mein kanker phenka gaya. patte toar kar fiza mein uuchaal diye gaye. aan ki aan mein brown lakdi ka farsh aaina huwa. aik hi darar se janam layti be shumaar darare usey hazaar ha hisson mein munqasim kar gayeen. woh panjo ke bal jhuka to usey laga woh ab kabhi uth nahi paye ga. saans Lena chahega to usey saans nahi aayegi.

kya koi itna be khabar ho sakta hai jitna ke woh tha? koi itna safaaq bhi ho sakta hai jaisa ke woh khud apne liye tha? yeh kaisi be hisi thi jo apni zaat se marboot  judi thi? yeh kaisi khud gharzi thi jo aziat mashroot thi?

do safar taweel dushwaar tha jisey tay kar ke woh yahan tak pouncha tha. is had tak sambhla tha. is had tak badal gaya tha. yeh uska vahm, yeh uska khayaal tha. hamesha ki tarah is baar bhi woh apne aap se be khabar raha tha. hamesha ki tarah is baar bhi woh khud ko samajh nahi saka tha. parak nahi saka tha.

waqt guzar gaya tha. zindagi badal gayi thi. magar uske andar ki hikaytein, aaj bhi uske liye. kuch muhim, kuch adhuri,

aur be naam hi rahi theen.

Shirazi mantion ke wasee o areez lounge mein mout bhari khamoshi chhai thi. mojooda nakoos par sakta taari tha. na samaat mein yaqeen utartaa tha na aankhon se Aiqan jhalakta tha. halanke Haroon Shirazi aik mujassam haqeeqat ke sath un ke samne hi to khada tha.

apni ghaltiyo ka aitraaf karte, peshmani ka izhaar karte aur sar jhuka kar mafi ki darkhwast karte usne aik lamhe ke liye bhi Jamila dawod ki taraf nahi dekh tha. dekh laita to phir ho jata. pathar hota to kuch ke na paata jabke usey bahut kuch kehna tha.

"Mera warees, mera khoon sirf Hamad hai Haroon! yeh tumhari ayashiyo ka nateeja, aik aawara aur bad chalan aurat ke batan se janam laine wala. Isey abhi aur isi waqt le jao yahan se."

khamoshi Azam shirazi ne tori thi. aur kisi bhikhre hue sher ki tarah jhinjharte hue tori thi. un ki buland aawaz se bacche par Haibat taari hui thi. un ke sakht patharile tasurat se woh bohat Khaif huwa tha.

"aarzoo ne Talaq le li hai, yeh ab mere sath hi rahega."

jhuke sar ke sath nazrein chura kar kaha gaya.

Jamila dawod ne dag-magati nigaho se usey dekha. uski aziyat badh gayi. aan ki aan mein mohabbat wafa aur qurbanio ka tamasha bana gaya tha. woh paash paash ho gayi thi.

"Tumhe andaza bhi hai, tum is waqt kya keh rahe ho?"

Azam shirazi intehai ghusse ke aalam mein Fankare the.

"Jamila ke khandan ko tumhari doosri shadi ki bhanak bhi par gayi to woh tumhara kya hashar karen ge, kuch andaza bhi hai tumhe?"

Jamila dawod ke zikar par Haroon shirazi ne ab ke sar utha kar usey hi dekha tha. bas aik lamhe ke liye phir us ne nazrain hata li.

"Baba!"

"Mere sabr ka mazeed imtehaan mat lo."

Azam shirazi ne ungli utha kar usey roka.

"Abhi aur isi waqt usey yahan se le jao."

aarzoo ke bete ke liye un ki aankhon mein nafrat thi, bezariyat, gussa tha, sard Mehri thi.

"Beta hai yeh mera!"

"Mera aur tumhara waris sirf Hammad hai, mein is tawaif ke bacche ko mazeed aik lamhe ke liye bhi aur is ghar mein bardasht nahi kar sakta."

hukum suna kar woh usi lamhe uth kar chalay gaye the. Shirazi mansion ke wasee o Areez lounge mein Haroon apne bachhe ke hamrah tanha khada reh gaya.

woh sadma se gunj tha. kuch heran aur be yaqeen bhi. uske to vahm or guman mein bhi na tha ke Azam Shirazi uske bacche ko qaboolne se inkaar kar dege. Zamila ki aankho me herat na thi, sadma bhi na tha usne jaisey aziyat ke alam mein yaqeen ki tamam Manazil tay karli thi.

Haroon apni doosri biwi ke bacche ke sath uske samne ke samne khada tha. yeh khawab tha, na khadsha, na khayaal ya aik Haqiq haqeeqat thi. talkh haqeeqat. jisey jhutlaya nahi ja sakta tha.

mohabbat or ehtram se jude shadi shuda zindagi ke aath saal aik dhoka the, dikhawa the, fareb the. dar parda Haroon pichhle aath saloon se apni isi mohabbat ke sath talluq mein raha tha jis se Azam Shirazi mein ne uski shadi nahi hone di thi.

woh bhi apni jagah se uth gayi. apne kamre mein band ho gayi. Haroon ab bhi neeche tha. woh aik baar phir apne baap ki study ke samne khada tha. un ki minnat kar raha tha. un se maffi maang raha tha magar Azam Shirazi kisi bhi soorat, aarzoo Jahangir ke bacche ko qaboolne ke liye tayyar na the.

yeh situation aik jung ki si thi. jaisey mulko ke naam war karobari hastiyon ke darmiyan jo moahida tay tha. uske tutne ka khatra ho. jaise apni kamzori kisi doosre fareeq ko thama daine ka khadsha.

"woh mera beta hai baba! mein uske baghair nahi reh sakta."

agle din woh phir un se keh raha tha. Azam shirazi apne shaan daar bed room ki deewar geer khidkiyo ke samne pusht par haath bandhe khade the.

Un ke Jabre bheenche hue the. qehar barsati aankhon mein khoon utra huwa tha. woh mulk  ke aik naamwar business tiecon the. apne andaaz aur shakhsiyat mein kisi haakim jaisa roab rakhte the. usool or riwayat ke paband, kuch maghroor aur mutaqabbir jo apne aala hasbo nasb aur taleemi qabliyat par fakhr karte the.

aur unhen yeh bacha kisi soorat qubool nahi tha.

"Aarzoo ke paas chhore aao usey!"

"Wo usey apne sath nahi rakhna chahti."

"Yeh mere sar ka dard nahi!"

"Baba please!"

woh girgiraya.

"Yeh bhi aap ka pota hai."

"Mera pota sirf Hammad hai, jiski maa khandani hai."

woh palat kar dahadhe the.

"Yeh us aawara or..!"

Haroon shirazi karb se lab bhinch kar reh gaya.

"Aap usey mere sath rehne den."

"Woh yahan rahega to sab ko maloom ho jaye ga."

asal masla jaisey unkw labon par aaya tha. woh bacha un ke liye zillat, toheen aur be izzati ki alamat tha. woh un ke liye aik ghalti, aik gunah jaisa tha. jisey

chhupana maqsood, mitana zaroori ho gaya tha.

"Baba please! mujhe maaf kar den. mein jaanta hoon yeh meri ghalti hai. aap jo bhi saza den mein bhugatne ke liye tayyar hoon, is tarah mat kiijiye."

kamre mein aik dam hi gehri khamoshi chhaa gayi. Azam shirazi sakht pathreli nigahon se ab Haroon ko dekh rahe the. Jamila dawood khule darwaze ke us paar ruk gayi thi.

"Aik shart par mein tumhari is ghalti ko nazar andaaz kar sakta hoon."

Lehjey mein wohi inaad aur sakti thi. Jamila ne nazar utha kar unhen dekha. ab woh kya keh rahe the?

"Isey mere hawale kar do aur bhool jao ke Hammad ke ilawa tumhara aur koi beta bhi hai."

Haroon ke peeron taley se zameen niklee thi. sar par aasman toota tha. phati phati nigahon se woh apne baap ko dekh kar reh gaya tha. Sadme ke aalam mein Jamila dawood bhi apni jagah khadi reh gayi thi.

Azam shirazi ki baat abhi khatam nahi hui thi. un ki baat to jaisey ab shuru hui thi.

"Isey tumhara naam nahi miley ga, wirasat mein hissa bhi nahi aur nah hi woh hamare khandan ka kabhi hissa banega."

andaz do toak tha. lehja qatiat bhara faisla ghair mutazalzil har lafz pathhar par lakeer Haroon shirazi ke chehre par wehshat phail gayi. har shai ka hisaab rakha tha usne magar is ka nahi.

"woh usi naam aur pehchan ke sath rahega jo mein usey duga. care taker ka intizam ho jaye ga, parhai ke akhrajaat, sab mein manage karuga lekin tumhe har soorat, har haal mein usse dur rehna hoga."

ungli utha kar aik baar phir apne irade wazeh kiye gie.

"kyun ke na to mein us badnaam zamana ladki ke sath tumhara koi scandal afford kar sakta hoon aur nahi Jamila ke khandan se dushmani mol le sakta hoon"

Haroon Shirazi ki phati phati aankhon mein intehai sard Mehri se dekhte hue unhon ne hatmi faisla sunaya tha.

"Aur agar tumhe mere is faislay se ikhtilaaf hai to tum usey yahan se le ja satke ho lekin yaad rakho jis waqt tum is ghar ki dahleez paar karoge, mein bhool jauga mera Haroon naam ka koi beta bhi hai."

Haroon Shirazi ka saans ruka huwa tha. Dhadkane thami hui theen. woh ab bhi apne baap ko dekh reh tha. herat, be yakeeni aur sadme se usey apni samaat par yaqeen nahi aaya tha.

'koi apne pote ke sath aisa bhi kar sakta hai?' woh soch raha tha. magar woh ghalat soch raha tha. Azam Shirazi ne siray se is bacche ko tasleem nahi kya tha. woh is ke liye reham dil hote bhi to kaise? ehsas karte bhi to kyun?

woh to apne kapdo par halka sa daagh tak na bardasht karte the to ab aisay daagh ko kaise rehne dete jis ki bardasht mein mustaqbil mein koi scandal ban'ne ka khadsha hota.

Mazeed kuch bhi sunay baghair Jamila dawood wahan se hatt gayi thi. roi roi si surkh mutwaram aankhon ke sath woh sidiya utar kar neeche aayi to dil bewafai ke gham se phatne laga. yeh haqeeqat thi ke shirazi aur lashari khandan ke mubain judne wala yeh rishta aik business deal ki tarah tha.

Khandan ke bado ne apne karobari aur siyasi mafadaat ko madde nazar rakhte hue un dono ko aik kiya tha magar Jamila ne kabhi bhi is rishte ko Maslehat ki nigah se nahi dekha tha.

woh Haroon se mohabbat karti thi. badlay mein woh bhi usey mohabbat hi dikhata raha tha. magar woh mohabbat aik dikhawa thi, uska inkishaaf kal raat huwa tha. yeh inkishaaf usey raakh kar gaya tha. yeh inkishaaf uski mohabbat, wafa aur aetmaad ka tamasha bana gaya tha.

sulagti aankhon ko be dardi se ragadati woh khidki ke samne ja khari hui thi aur tab hi usne Haroon ko sidiya utarte dekha tha. Uske chehre par karb tha aur ankhen betasha surkh ho rahi thi. Azam Shirazi apne faisle se peeche hatne wale nahi thay to kya Haroon ghar chhor kar ja raha hai? bhaari dil ke sath usne Haroon shirazi ko saddar darwaze ki janib barhate dekha.

"jis waqt tum is ghar ki dehleez paar karo ge, mein bhool jauga mera Haroon naam ka koi beta bhi hai."

aur woh usey dekh rahi thi. woh khaali weeran aankhon se usey saddar darwaze se bahar nikalta dekh rahi thi. Haroon Shirazi ne ghar ki dehleez paar karli thi. woh apne bacche ko sath le kar nahi gaya tha.

Azam shirazi Haroon ko London bhej kar apne roz marrah maloomat mein aise masroof ho gaye the jaise roz qabal kuch nahi huwa tha. jaise un ki zindagi mein aarzoo Jahangir ka guzar na huwa tha na uske bacche ki aamad chand hui thi. jaisey Haroon shirazi se koi ghalti, koi gunah sarzad nahi huwa tha.

Jamila dawood bhi aise hi karna chahti thi. behiss hona chahti thi. be parwah huna chahti thi magar woh aye kar nahi pa rahi thi. uske zakham mundamil nahi ho rahe the. usay sukoon mil nahi raha tha.

Shirazi mansion aur servant quarter ke mabain raahdaari mein jo pehla kamra tha aur jo kisi had tak shirazi house se munsalik bhi tha, woh kamra ab us bacche ka tha. Madhat head servant agha Ali ki beti thi jawab is ki caretaker bhi thi.

jis ne chobees ghante na sirf us ke sath rehna tha balke Azam shirazi ke qaim kardah usolo ki paas daari bhi karni thi. arzoo Jahangir ke is bete ko Azam shirazi ke aali shaan bangle mein daakhil hone ki ijazat na thi. woh ghar ke makeeno ke sath maiz par beth kar khana nahi kha sakta tha.

woh function, gathering aur khandani parties mein shirkat nahi kar sakta tha. bahar se aane wale maheman, dost ahbaab aur rishta daaron ke samne nahi, dost aur rishta ke samne nahi ja sakta tha. yeh saare usool o qawaneen Azam shirazi ne banaye the aur aisa mumkin hi na tha ke woh koi hukum jari kare aur un ki saltanat mein uska nifaz nahi ho.

lekin un tamam usool o qawaneen se Jamila ki aziyat kam nahi hui thi. wehshat o be sukooni ki daldal har baar aarzoo Jahangir ke bacche tak pouncha deti thi. woh aurat Haroon ki zindagi mein ab kahin nahi thi magar uska bacha tha.

Shirazi mansion mein na hote hue bhi woh tha. woh hai woh rahay ga. us haqeeqat ko ‏woh jhutla nahi sakti thi. yahi haqeeqat sard padtee aag badhakti thi. ragg ragg mein Mahshar sa bapaa karti thi. pichli kayi raton ki tarah is raat bhi woh theek se so nahi pa rahi thi. ik dard tha, karb tha be wafai ka ehsas, be hisi ka tadaruk aik uljan, aik wehshat.

sar jhatak kar, khayalat ko bhatka kar, wahemo ko jhutla kar woh niche aagai thi. kitcehn mein fridge khol kar usne doodh nikala tha. sar dard se phataa ja raha tha. Nind aankhon se kosun hui thi.

woh apne liye chai banana chaah rahi thi. choti sui 12 ke himse par aa kar thahri to yaka yak kitchen ki daye taraf servant quarters ki taraf jati raahdaari se aawaz buland hui thi.

kholtey pani mein patti dalte hue woh yak dam chonki thi. phir chulha band kar ke woh usi waqt kitcehn se rahdari mein aagai thi. lights off thi. fanoos jal rahe the. nilgon roshni ka madham ta-assur charo su phela tha.

Usne head servant agha Ali ki beti Midhat ko dekha. woh mutfakkar si kamro ke darwaze khol khol kar jaise fikar mandi ke aalam mein kisi ko dhoond rahi thi.

"Yeh shhor kaisa tha?"

kandhe se phisalte dupatte ko wapas jamate hue bokhlahat ka shikaar Midhat ne apni malikan ko dekha.

"Wo jee..."

Uski hawaya urr gayi theen.

"Tum is waqt yahan kya kar rahi ho?"

"Woh m-mein"

Midhat bokhla gayi. samajh mein nahi aaya kya jawab day. aur tab hi store room se khatpat ki aawaz aayi thi. Jamila ne be sakhta hi sar utha kar isi taraf dekha tha.

lights off thi, darwaaza khula huwa tha. andar koi tha. yaqeenan koi tha. magar Mudhat ki zabaan sath nahi de rahi thi. jane woh Azam shirazi se khaif thi ya phir usey batane ki himmat nahi kar pa rahi thi.

ab ke Jamila ne usse puchne ke bajaye store room ka rukh kiya. adh khule darwaze ko andar ki janib dhakel kar us ne light on kar di. Jarakar roshni char su feli. be shumaar curtains, furniture ka samaan, ghair zaroori ashya.

Usne be sakhta qadam uthaye the. Mudhat uske peechay thi. woh ab kuch keh rahi thi. kuch bta rahi thi. mafi bhi maang rahi thi. pareshan bhi ho rahi thi. yeh uski ghalti thi ke woh servant quarter se yahan aa gaya tha. yeh uski betawwazo thi ke ghar ke makeeno ke samnay agaya tha.

woh yahan tha, magar samne nahi tha. woh store room mein furniture ke samaan mein hi kahin chhup gaya tha. lekin uski siskariyon aur hichkiyon ki aawaz lab bheenche Jamila dawod apni jagah khadi reh gayi. Mudhat taizi se aage badi thi. woh ab usey aawaz mein deti hall numa store room mein usey talaash kar rahi thi.

Usne gum ho jane ke liye aik aisi jagah ka intikhab kiya tha jahan Mudhat nahi pahonch sakti thi. deewar rukh khadi almaari ke nichale hisse mein jane woh kaise ghus gaya tha. magar yeh tay tha kisi mard ki madad ke baghair Mudhat nah to almaari ko hila sakti thi aur nahi usey nikaal sakti thi.

pareshan aur hawaas bakhta ki woh aik baar phir Jamila se moazrat karne lagi.

mein abhi abba ko bulaa lati hoon, usey le jaoon gi, dobarah kabhi aisa nahi hoga. taiz taiz qadam uthaati woh wahan se chali gayi thi magar Jamila dawood apni jagah se aik inch na hil saki thi.

dheemi dheemi siskariyon ki aawaz bohat wazeh thi. Uske qadam be sakhta uthe the. woh ghoom kar deewar ki taraf aakar ruk gayi thi aur ab kanch ke un tukdo ko dekh rahi thi jo deewar ke paas hi toote bikhare parre thay. usey yaad aaya, nichale khane ke tamam

sheeshe toot phoot ka shikaar hue the. panjoo ke bal baithte hue usne andar jhakka tha.

thar thar kanpta wujood larazte hon't aanso-on se bhari hui surkh mutwaram aankhen.

woh saade paanch saal ka bacha khauf zada aur mathos sa apne aap mein simat kar betha tha. Jamila ka saans ruka, dhadkane theen. Us aik lamhe mein usey kuch huwa aur usne be sakhta hi daraz se apna haath aage barha diya. usey bahar nikaalne ke liye.

Be shumaar ajnabi cheharon mein aik aur chehre ka izafah huwa to bacche ne rote hue uski pahonch se bhi dur hona chaha. usey apna baap chahiye tha. maa chahiye thi. woh ab bhi rote hue, chikhte hue aawaze diye ja raha tha.

Jamila ka haath pathar huwa. dil kanp kar reh gaya. Usse bacche ki haalat bilkul dekhi nahi gayi

Mudhat, agha Ali ko liye haazir hui to apni malikan ko wahi betha dekh kar pareshan hogayi. Azam shirazi ka sakht hukum tha ke woh ghar ke makeeno ke samne kabhi na aaye. ghalti se bhi nahi. head servant agha Ali ne poora zor laga kar itni jagah zaroor bana li thi ke usey bahar nikala ja sakta tha.

magar usi fallak shagaaf cheenke. aur paanch se dur ho jane ki deewana waar justojoo.

Isse pehlay ke agha Ali aage barhta, is se pehlay ke Mudhat hi usey nikaalte ki sae karti, Jamila dawood ne aik hi jist mein usey baazu se pakar kar, uski tamam tar muzahmat aur cheekho pukaar ke bawajood bahar nikaal liya tha.

agle hi lamhe woh uski baho mein tha.

woh ro raha tha, woh tadap raha tha. woh uski girift se niklne ki koshish kar raha tha. magar woh usey chhor nahi

rahi thi. uska hisaar mazboot tha, mazboot hi raha tha.

apni girift har lehaaz se pukhta kiye woh usey seenay se laga chuki thi.

aglay chand lamhe mein bacche ki har muzahmat dam tod gayu. rote, kurrate laate hue woh be dam ho gaya. jaise is mein mazeed himmat na rahi ho. jaise woh thak gaya ho. haar gaya ho, mar gaya ho usey seene se lagaye Jamila dawood daal apni jagah ban baithi reh gayi thi.

kapkapata nanha wujood aur uska shiddat se dhadkta dil jaise abhi Seena cheer kar bahar aa jaye ga.

"Yeh zakham.."

Mudhat ne ghabra kar uski surkh padtee aasteen oopar ki thi. ghaliban almaari ke andar jagah banate waqt is ka bazu keel se ragra gaya tha tab hi jald utar gayi thi.

"Driver se kaho gaadi nikale."

kaafi der baad Jamila kuch kehne ke qabil hui thi. phir woh usey baho mein liye uth khari hui thi. Mudhat bhi uske sath thi, kuch heran, kuch pareshan aur khaif bhi.

Shirazi mansion se hospital kaafi doori par tha. tab hi Jamila dawod ke hukum par driver ne gaadi ka rukh dr. mustafa ke cilinic ki taraf mourr diya tha jo un ke family Dr. bhi the. woh duty par mojood thay.

Family talluqat ke baais faris ko bhi unhon ne attend Kiya tha. ghante baad hi usey andar aane ki ijazat mili thi.

zakham par teen stitches lagey thay. drip, khawab aawar injection ke baad woh pursukoon neend so raha tha.

"Pareshan mat ho, he is stable now.!

woh usse keh rahe the. qadre faasle se hi woh bhut bani usey dekh rahi thi. ankhen nam thi aur haath dupatte se ulajh rahey the. lehaaf achi tarah se odha kar jab nurse ja chuki to Dr. mustafa uske paas aa gaye.

Jamila ne sar utha kar unhen dekha. woh uske mualim thay. meharban ustaad, aik behtareen naaseh.

"Aap theek hain beta?"

"insaan un sawalaat ka kiya kare jo neend urha de, be qarari mein baha de, jin ka koi jawab ho, na mantaq, na Daleel jaise jung, be cheeni, be sukooni bees dard, aziyat, karb.."

uski aawaz rund gayi. zindagi mein pehli baar woh apni kefiyat ko samajhne mein na kaam ho rahi thi.

"Sawal zameer uthata hai. jawab imaan dilaata hai."

woh keh rahe the.

"imaan batla raha hai, mein bhatak rahi hoon."

uski ankhen chhalak pari.

"imaan batla raha hai, tum ab sahih raste par ho."

bohat narmi aur Matanat se keh kar woh chale gaye the. hamesha ki tarah is baar bhi unhon ne koi sawal nahi kiya tha. woh uske mamlaat ki geherai mein

utarne ki koshish nahi karte the. sirf sunte the aur jawab de diya karte the.

Usne himmat kar ke apna rukh badla. aik baar phir par sukoon nind sotey is bacche ko dekha jis ki wajah se woh guzashta kayi raton se so nahi pa rahi thi.

zarkar roshni mein uska chehra wazeh tha. woh apni maa ki shakal tha. ho baho uski copy. Bas uske baal hi Haroon shirazi ki tarah seedhe the. qadre lambe peshani par bikhar gardan ko chhute

hue. rangat dhudhiya thi aur ankhen..

Jamila ne surkh o mutwaram band aankhon ko dekha. palken bheegi hui theen. surkh galoon par aanso-on ki lakerain thehri theen. aisay jaisay woh rote rote aika aik pursukoon ho gaya ho. aur aisi hi aik sukoon bhari kefiyat Jamila dawod ne bhi apne andar mehsoos ki thi.

❏❏❏