â¢â¢â¢
"Pareshani ki ab koi baat nahi hai. He is all fine now!"
"Yeh kuch medicines hain jo likh kar de raha hoon, isey de dejiyega. aur uske khane peene ka bohat khayaal rakhen."
Agle din check up ke baad Dr. mustafa Jamila se keh rahe the aur Jamila use hi dekh rahi thi jo abhi tak apni neend ke assar se mukammal tor par bahar nahi aaya tha. Mudhat uske liye kheer bana kar layi thi. Jamila ke ishare par hi usne taizi se pyaale mein nikaali. jab tak usne bohat ahthiyat se bacche ko utha kar bithaya, tab tak woh pyalaa aage kar chuki thi.
Aik baazu se usey apne hisaar mein liye, doosre haath se beech bhar kar woh us ke labon ke qareeb layi to usne inkaar nahi kiya. bohat aaraam se pehla chamch le liya. woh soti jaagti kefiyat mein tha. hosh mein tha bhi aur nahi bhi lekin woh koi bhi muzahmat nahi kar raha tha.
Mudhat heran thi. na woh roya tha, na chikha tha. na usne koi wawela kiya tha na bhagne ki koshish halaanke khud use aik chamch ke liye kitni koshish karna padtee thi. bohat aaraam aur tasalii se Jamila ne usey kheer khilai thi. nim garam doodh bhi pilaya tha, phir medicine bhi di thi jo Mudhat cilinic ki pharmacy se le aayi thi.
is douran woh mukammal tor par pursukoon raha tha. yaqeenan with injection ke zair assar hi tha. ya phir woh thak chuka tha aur ab koi bhi muzahmat nahi karna chahta tha.
das bajey usey discharge kar diya tha aur wo usey ghar le aayi thi.
is ke baad woh dopehar mein usey dekhne aayi thi tab woh so raha tha. phir shaam mein jab woh gayi thi to woh khidki ki chokhat par kohniyan tikaye sheeshe ke sath gaal mis kiye bahar un roshiniyo ko dekh raha tha jo wasee o Areez sabza zaar par jagah jagah jal rahi thi.
Azam shirazi ke yahan aaj kuch siyasi naamwar shaksiaat ki dawat thi. khane ka intizam bahar lawn mein kiya gaya tha.
"Ab kaisa hai?" Usne madham aawaz mein Mudhat se poocha.
"Pehlay se bahot behtar hai jee! aaj is ne mujhe bilkul bhi tang nahi kya."
Mudhat ne khush gawaar herat ke sath aagahi di thi magar Jamila ko is aagahi ne ajeeb si wehshat mein mubtala kar diya.
jab tak umeed thi, tab tak muzahmat thi. jab umeed tooti to muzahmat bhi toot gayi.
woh kuch der tak darwaze mein khadi rahi thi. phir woh uske paas aakar baith gayi thi. bazu khidki ki chokhat par tikaye usey dekhnay lagi. kuch mohabbat, kuch unsiyat, kuch tarhim se bacche ne uski mojoodgi ka koi khaas notice nahi liya tha.
Jamila un aankhon ko dekhne lagi jin mein teen behtareen rangon ki amayjis thi. sabaz, halka brown aur sunhera rang ye aankhen aarzoo Jahangir ki ankhen thi. Agle kayi lamhoon tak aik khamoshi si haail rahi. bacha abhi bhi usey mukammal nazar andaaz kiye hue tha.
"Hello!"
Majbooran se hi mukhatib karna para. Bacche ne zara si nazar utha kar Jamila ko dekha, magar jawab nahi diya.
"Mera naam Jamila hai aur tumhara?"
yeh tarifi marhala tha, usey kuch mushkil laga. woh un bachon mein se yaqeenan nahi tha jo ba aasani ghul mil jayen warna woh Mudhat ko itna tough time kyun deta? dam sadhe woh khaali khaali aankhon se usey daikhta raha lab baahum paivest rahe.
"Let me guess, kahin tumhara naam shehriyar to nahi?"
"Arslan..?"
Aik lamhe ko ruk kar kuch socha.
"Ya phir...?"
"Faris Haroon Shirazi"
apne naam se mutaliq woh yaqeenan bohat bachi tha. faris tha to phir faris bhi tha. Haroon ka beta shirazi khandan ka saput aur koi naam aur koi maqam aur koi pehchan usey qubool na thi. kya Azam shirazi uski pehchan ki tarah ab is ki yad dasht se is ka mukammal naam bhi hata payege?
"Naam to bohat pyara hai aapka! waisey faris ka matlab kya hai?"
narmi se apni kam Ilmi ka aitraaf karti woh zara sa aage jhuki thi. ghane siyah balon ki kuch late uske chehre par bikhairain. sone ki choorian bhi khanak utheen. woh lab bheenche uski aankhon mein ajnabi nigahon se daikhta raha.
"Mujhe sochne do, shayad mujhe yaad aa jaye."
aik lamhe ka tawaquf kya, phir yun zahir kya jaisey usey achanak yaad aa gaya ho.
"Faris ka matlab hai shah sawaar, horse rider woh jo ghode par baithta hai aur talwar pakar kar fight bhi karta hai."
Na to woh ghode par betha tha, na talwar pakar kar fight karta tha. Usne chehre ka rukh morra aur aik baar phir bahar dekhne laga.
Jamila dawood chand lamho tak usey dekhatii rahi. phir usne apna haath badhaya.
"Yahan aao."
Usne aik baar phir Jamila ko dekha tha. ab ke zara si khafgi se. yaqeenan Jamila ki mudakhlat usey pasand nahi aa rahi thi.
"Mere paas aao?"
magar woh nahi aaya tha.
"Papa ke paas jana hai?"
Uske chehre ke tasurat yaka yak badle. ankhen aanso-on se bhar gayeen. lab bhinch gaye.
"Aao.."
ab ke Jamila ne haath barha kar apni taraf bulaya to woh foran hi uth gaya.
pakar kar apne qareeb gaya to uski baho mein sama gaya. aur phir woh rone laga. Jamila ki dharkane tham gayeen. apne seene se lagaye uski pusht sehlate hue woh khud bhi ajeeb
si kefiyat se dochar hogayi.
faris ko apna baap apni maa chahiye thi. woh un ke liye tadap raha tha.
kuch soch kar woh usi waqt faris ko sath liye shirazi mension mein aagai. study room mein sofe par baith kar usne Haroon ka number milaane ke baad receiver faris ke kaan ke sath laga diya. kuch hi der mein call receive karli gayi.
"Hello!"
baap ki aawaz samaat se takrate hi uski ankhen bhar gayeen.
"Hello Papa.."
Dusri taraf se aik dam sannata chhaa gaya. mout bhara, wehshat bhar sannata. agley hi lamhay call disconnect ho gayi lekin faris baat kar raha tha. woh apne baap ko aawaze diye ja raha tha. Usne be ikhtiyar receiver le kar cradle par rakh diya.
"Usey le jao Mudhat!"
aur khud woh isi waqt uth kar apne kamre mein aagai thi. usey sambhalne mein kuch waqt laga phir usne Haroon Shirazi ko phone Kiya.
"Aapne, apne bete se baat kyun nahi ki?"
Lehja darasht tha. Uska bas nahi chal raha tha Haroon uske samne ho aur woh usey jhinjhod kar hilade larjade.
"Tum baba ke faisle ko bhool gayi ho?"
woh tham kar reh gayi. yeh kaisa jawab tha jo usne diya tha? yeh kaisa uzr tha jo is ne paish kiya tha? woh Haroon mein faris ka baap dhoond rahi thi aur badle mein usey Kiya mila tha? Azam shirazi ka beta!
"Aap ka beta aap ke hi ghar mein servants quarter mein reh raha hai Haroon!"
aur Haroon ne phone band kar diya. receiver haath mein liye woh apni jagah khadi reh gayi thi.
"kal tum faris ko yahan layi theen?"
Agle din Azam ki adalat mein uski paishi hogayi thi. woh intehai ghusse mein the magar tahammul se pooch rahe the.
"Jee. Mein Haroon se uski baat karwana chahti thi."
Azam shirazi ne muthiyaan bhinch kar khud par qaboo pa liya tha.
"To.. koi baat ki usne?"
"Nahi!"
un ke tane hue asaab dheele ho gaye. labon par jandaar muskurahat phail gayi.
"Mein jaanta tha, woh yahi karega."
Jamila ne sar utha kar unhen dekha. woh bohat mutmaen aur pur sukoon dikhayi de rahe thay.
"Waisey tum faris ke muamle mein itni dilchaspi kyun laine lag gayi ho?"
"Halanke uske sath na tumhara koi rishta hai nahi koi talluq."
"Aap ko us par reham nahi aata?" usne ulta sawal kar liya.
"Reham?"
woh istijayi andaaz mein muskuraye.
"Mujhe nahi lagta uske sath koi zulm ho raha hai. woh achha khata hai, achha pehnta hai. ab shehar ke behtareen school mein bhi jayega. warna tum socho mein uske sath kya nahi kar sakta tha."
"Isse barh kar aur bada zulm kya ho ga ke aap ne apne pote se, uski shanakht aur pehchan chhin li hai, baap bhi dur kar diya hai."
"Hamare khandan ki naslen khandani shareef aurton se chalti hain Jamila!"
Azam shirazi ki aankhon mein Ghaiz o gazabb ka samandar thathe maarne laga.
"Mene Haroon ki doosri shadi ko tasleem Kiya hai na us bad chalan aurat ko apni bahu maanta hai."
kaat daar lehjey mein kehte hue unhon ne sakht pathreli nigahon se usey dekha tha.
"Ab tum ja sakti ho."
Unhon ne darwaze ki taraf ishara kar diya.
"aindah mein na sunu ke tum is nich aurat ke bacche ko is ghar mein layi ho, yeh nah ho ke mein koi sakht qadam uthane par majboor ho jaoon."
Usne sar utha kar Azam shirazi ko dekha. woh dhamki nahi de rahe the, apne iraadon se aagah kar rahe the. jo kehte the, usey kar dikhaane ka hosla bhi rakhte the. mazeed kuch bhi kahe bina, woh bhaari dil ke sath murr gayi thi.
koi farq nahi tha uske apne baap bhaiyon mein aur sasur aur shohar mein. sab hi aik se the. taaqat ke nashe mein chor, doulat ke ghamand mein jabir aur mutakbbir.
â¢â¢â¢
Azam shirazi ki tanbeeha ke bawajood woh agle din khud ja kar faris ke liye be shumaar khilone aur kapre khareed layi thi. naye furniture ke sath usne poorey kamre ko bhi apni nigrani mein set karwaya tha.
is douran woh kone mein khada tukur tukur usey daikhta raha tha.
khilonon ka aik dhair tha jo uske samne rakha tha. naye kapre, school bag, colouring books story books, be shumaar pencils colours, aik writing table jisey stickers se Jamila khud hi sajane mein lagi hui thi. kamre mein haqeeqi rang to bikhar hi gaye the magar uski aankhon mein zindagi ka koi rang abhi bhi nahi ubhra tha.
woh ab bhi khincha khincha sa ajnabi nigahon se kabhi Jamila aur kabhi mulazimo ko taktaa almaari ke sath kone mein hi simat kar betha raha tha. ajnabi chehre usey wehshat mein mubtila karte the. Anjana sa khauf barhta tha to uske chehre ka rang urr jata tha.
"Khana laga dun jee?"
Mudhat ne Jamila se madad chahi thi. chhotey se rack mein kitabe set karte hue is ne asbat mein sar hilaya .
is din faris ne doosri baar uske haath se bohat sukoon aur tasalii se khana khaya tha. khana khate hue woh kayi baar sar utha kar usey dekh chuka tha.
Jamila muskura deti magar uske chehre par muskurahat ka koi aik rang bhi na khilta.
agle din woh uske school bhi gayi. principal ke sath sath class teacher se bhi mili. class room ka bhi jaiza liya. phir usne faris ki haalat ke paish e nazar uske liye jagah ka intikhab khud kya. itne saarey bachon mein usne goblu aur bohat ziyada batuni bacche ko uske barabar bithaya. woh friendly qisam ka tha lamho mein dost bana kar baatein karne lagta tha. khade khade usne Jamila se bhi dosti kar li thi aur chocolate le kar hi tala tha.
"Your mummy is so pretty!"
Chocolate ka wrapper utarte hue usne faris ko bataya tha. jo ab Jamila ko dekh raha tha.
jane se pehle haath hila kar woh aik baar phir muskarayi thi. shayad ab wo bhi muskuraye. shayad ab ke wo bhi apne ehsasat ka izhaar kare magar faris ke lab baahum paivest hi rahay the. chehra har ta-assur se aari tha. muskurana, hansna, baatein karna to woh jaisay bhool hi gaya tha.
kuch waqt darkaar tha usay sab kuch naye sirey se naye andaaz mein aur naye logon se seekhnay ke liye. baap aur betay ki is jung mein nuqsaan faris ka ho raha tha. 6 saal ka woh bacha un chand hafton mein kamla kar reh gaya tha. nafsiati tor par itna disturb tha ke usne bolna bhi band kar diya tha.
Khana woh baa-mushkil khata tha aur school mein bhi koi khatir khuwa karke bhi nahi dikha raha tha. thak haar kar Jamila ne aarzoo Jahangir ko dhoonda tha. bohat mushkilo se mili thi woh bohat zatano se mulaqaat ho payi thi.
"Mein shadi kar rahi hoon!"
faris se mutaliq saari baat sun Laine ke baad aarzoo Jahangir ne kaha bhi to bas yahi. koi fikar, pareshani, andesha, aisa koi bhi to ta-assur nahi tha uske chehray par. Jamila ko dukh huwa. kya wo maa thi, kya woh waqai mein faris ki maa thi?
ghunghrale soonahere balo ko clutcher mein jakde. jeans par mungiya rang ki stylish shirt mein malboos woh taang par taang rakhe heels mein muqeed dahine pair ko junbish deti bohat mutmaen aur pur sukoon baithi lime juice se lutaf andoz ho rahi thi.
"Mein tum se tumahre betay ki baat kar rahi hoon?" Usne kaha.
"Kya wo sirf mera beta hai?"
Apni dhudiyi kohniya maiz par tikaye wo kuch aage si hui thi.
"Waise tum kyun mere bete ke gham mein itna halkaan ho rahi ho? tumhare bete ki jagah na lele isliye?"
"Pehle mister shirazi tumahre bete ko qubool to kar len."
intehai burudat se Jamila ne uski aankho mein dekha tha.
"Aw.. come on!" woh hans di.
"Sab jaanta hai woh bloody old men!"
ghusse aur hiqarat se Azam shirazi ka naam lete hue usne phir Jamila ko dekha.
"Mein tumhari in baton par yaqeen karne wali nahi hoon. aur agar yeh haqeeqat hai bhi, tabbhi yeh mera sar dard nahi hai. Haroon ne sepration ke waqt usey apne sath rakhne ka faisla kiya tha."
"So please agar koi baat tumhe karna bhi hai to direct Haroon se karo. mujhe is sab mein mat ghaseeto!"
Apna hand bag shoulder par daalte hue woh jane ke liye uth gayi thi aur Jamila kitni hi der tak apni jagah baithi rahi thi.
pehle Haroon ke ravaiye ne usey makhmase mein dala tha, ab aarzoo Jahangir ka rawaiyya usey watra hairat me daal raha tha. Uska khayaal tha faris ke bare mein janne ke baad aarzoo usey yahan se le jaye gi magar woh to jaise Jamila par apna muaqqaf wazeh karne aayi thi.
arzoo se mulaqaat ke baad agley kayi dinon tak uska zehen uljha raha.
Aik do baar usne Azam shirazi ka dil faris ke liye naram karne ki koshish bhi ki magar har baar woh uska naam sun kar hi yun bharak uthte jaise Jamila ne un ke potay ka nahi, kisi dushman ka naam le liya ho.
Doosri taraf Haroon yun khamosh ho jata jaise usne kuch suna hi nahi ho. aur tab hi usne aik faisla kar liya.
Agar woh shirazi mension mein nahi bhi rehta, tab bhi woh itna bhi dur nahi ke Jamila ki mohabbat, tawajah aur apnaa-iyat se mahroom reh sake.
masla un baap bete ke darmiyan hai. uske aur faris ke darmiyan to nahi.
saare wade, qaide Haroon se jude hain, uske sath to hargiz nahi.
âââ