Chapter 27: •CHP-26•

کِسٹ نمبر 5

𝒌𝒂𝒃𝒉𝒊 𝒕𝒂𝒎𝒂𝒏𝒏𝒂 𝒌𝒆 𝒓𝒂𝒂𝒔𝒕𝒐𝒏 𝒑𝒂𝒓

𝒏𝒊𝒌𝒂𝒍 𝒑𝒂𝒅𝒐 𝒕𝒐 𝒌𝒉𝒂𝒚𝒂𝒂𝒍 𝒓𝒂𝒌𝒉𝒏𝒂!

𝒉𝒂𝒘𝒂𝒆, 𝒃𝒂𝒂𝒅𝒂𝒍, 𝒇𝒊𝒛𝒂𝒚𝒆𝒏,

𝒎𝒂𝒖𝒔𝒂𝒎, 𝒌𝒉𝒂𝒚𝒂𝒍 𝒄𝒉𝒆𝒉𝒓𝒆

𝒃𝒂𝒅𝒂𝒍 𝒃𝒂𝒅𝒂𝒍 𝒌𝒂𝒓 𝒕𝒖𝒎𝒉𝒆 𝒎𝒊𝒍𝒆𝒏𝒈𝒆

𝑻𝒐 𝒍𝒂𝒎𝒉𝒂 𝒍𝒂𝒎𝒉𝒂 𝒃𝒂𝒅𝒂𝒍𝒕𝒆

𝒓𝒂𝒏𝒈𝒐𝒏 𝒌𝒆 𝒔𝒉𝒐𝒌𝒉, 𝒅𝒉𝒐𝒌𝒆

𝒎𝒆𝒊𝒏 𝒂𝒂 𝒏𝒂 𝒋𝒂𝒏𝒂..

𝒌𝒂𝒃𝒉𝒊 𝒋𝒐 𝒄𝒉𝒂𝒓𝒐𝒏 𝒕𝒂𝒓𝒂𝒇 𝒕𝒖𝒎𝒉𝒂𝒓𝒆

𝒌𝒊𝒓𝒂𝒏 𝒌𝒊𝒓𝒂𝒏 𝒂𝒑𝒏𝒂 𝒌𝒉𝒂𝒘𝒂𝒃 𝒔𝒂

𝒃𝒂𝒅𝒂𝒏 𝒏𝒊𝒌𝒉𝒂𝒓𝒆, 𝒛𝒂𝒎𝒆𝒆 𝒑𝒂𝒓 𝒖𝒕𝒓𝒆,

𝒕𝒐 𝒅𝒉𝒖𝒏𝒅𝒍𝒌𝒐 𝒎𝒆𝒊𝒏 𝒔𝒂𝒎𝒂 𝒏𝒂 𝒋𝒂𝒏𝒂

𝒌𝒂𝒃𝒉𝒊 𝒋𝒐 𝒂𝒂𝒏𝒌𝒉𝒐𝒏 𝒎𝒆𝒊𝒏

𝒄𝒉𝒂𝒂𝒏𝒅 𝒉𝒂𝒏𝒔 𝒉𝒂𝒏𝒔 𝒌𝒆

𝒄𝒉𝒂𝒏𝒅𝒏𝒊 𝒌𝒂 𝒌𝒉𝒖𝒎𝒂𝒓 𝒃𝒉𝒂𝒓 𝒅𝒆 𝒕𝒐

𝒂𝒑𝒏𝒊 𝒂𝒏𝒌𝒉𝒆𝒏 𝒌𝒂𝒉𝒊𝒏

𝒌𝒉𝒂𝒍𝒂𝒂 𝒎𝒆𝒊𝒏 𝒈𝒖𝒎𝒂 𝒏𝒂 𝒂𝒂𝒏𝒂

𝒌𝒆 𝒚𝒆𝒉 𝒏𝒂 𝒉𝒐 𝒑𝒉𝒊𝒓 𝒋𝒐 𝒌𝒉𝒂𝒘𝒂𝒃 𝒕𝒐𝒐𝒕𝒆

𝒅𝒉𝒂𝒏𝒌 𝒅𝒉𝒂𝒏𝒌  𝒌𝒂 𝒔𝒂𝒓𝒂𝒂𝒃 𝒕𝒐𝒐𝒕𝒆

𝒌𝒆 𝒋𝒊𝒔𝒎 𝒐 𝒋𝒂𝒂𝒏 𝒑𝒂𝒓 𝒂𝒛𝒂𝒂𝒃 𝒕𝒐𝒐𝒕𝒆

𝒂𝒖𝒓 𝒕𝒖𝒎 𝒃𝒂𝒂-𝒎𝒖𝒔𝒉𝒌𝒊𝒍 𝒍𝒂𝒓𝒛𝒕𝒆𝒚 𝒉𝒂𝒕𝒉𝒐𝒏 𝒔𝒆

𝒌𝒊𝒓𝒄𝒉𝒊 𝒌𝒊𝒓𝒄𝒉𝒊  𝒃𝒂𝒅𝒂𝒏 𝒔𝒂𝒎𝒃𝒉𝒂𝒍𝒆

𝒌𝒂𝒉𝒊𝒏 𝒃𝒖𝒍𝒂𝒏𝒅𝒊 𝒑𝒂𝒓 𝒄𝒉𝒂𝒓𝒉 𝒌𝒆

𝒓𝒂𝒔𝒕𝒊 𝒉𝒖𝒊 𝒏𝒊𝒈𝒂𝒉𝒐𝒏 𝒔𝒆

𝒘𝒂𝒑𝒔𝒊 𝒌𝒆 𝒏𝒊𝒔𝒉𝒂𝒂𝒏 𝒅𝒉𝒖𝒏𝒅𝒐!

𝒖𝒋𝒂𝒅 𝒈𝒂𝒚𝒂 𝒋𝒐 𝑱𝒂𝒉𝒂𝒏 𝒅𝒉𝒖𝒏𝒅𝒐

𝒕𝒂𝒎𝒂𝒏𝒏𝒂 𝒌𝒆 𝒓𝒂𝒂𝒔𝒕𝒐 𝒑𝒂𝒓 𝒏𝒊𝒌𝒂𝒍 𝒑𝒂𝒅𝒐

𝒕𝒐 𝒌𝒉𝒂𝒚𝒂𝒂𝒍 𝒓𝒂𝒌𝒉𝒏𝒂 𝒌𝒂𝒉𝒊𝒏 𝒔𝒆

𝒌𝒉𝒂𝒂𝒍𝒊 𝒑𝒂𝒍𝒂𝒕 𝒌𝒆 𝒂𝒂𝒏𝒂

𝑩𝒂𝒉𝒖𝒕 𝒌𝒂𝒕𝒉𝒊𝒏 𝒉𝒂𝒊 !

𝑩𝒂𝒉𝒖𝒕 𝒌𝒂𝒕𝒉𝒊𝒏 𝒉𝒂𝒊 !

𝑩𝒂𝒉𝒖𝒕 𝒌𝒂𝒕𝒉𝒊𝒏 𝒉𝒂𝒊 !

❏❏❏

woh is aurat ko nahi jaanta tha jo uske ghar ke bairooni gate se bahar nikalti hui nazar aayi thi. usey herat hui. is tarah koi bhi ajnabi itni aasani se us ghar mein daakhil nahi ho sakta tha. aankhon mein uljan liye woh andar daakhil huwa to usey wajdan house mein aik ghair mamooli pan ka ehsas huwa. aqsa pareshani ke aalam mein bhagti hui uske paas aayi thi. woh rote hue ab kuch keh rahi thi, kuch bta rahi thi.

faris ne shock ke aalam mein sar utha kar mrs. Shirazi ki taraf dekha. herat aur sadma bhare tassurat liye woh apni jagah sakit baithi thi magar un ki nigahein kisi aik jagah par thehr nahi rahi theen. labon ko junbish dete unhon ne faris se kuch kaha. aqsa ne bokhla kar mrs. Shirazi ko dekha.

aur ussi lamhe faris wajdan darwaaza khol kar ujlat mein qadam uthata taizi se bahar bhaga tha.

bairooni gate se bahar sadak par pahunchte hi woh sarta pair mukammal tor par barish mein bhig chuka tha.

"usey dhoondo Faris! aisa nah ho woh kuch kar baithe"

agay badhte hue woh charon taraf dekh raha tha magar jannat Bint kamaal usey kahin bhi nazar nahi aa rahi thi. har guzarte lamhe ke sath uski ghabrahat mein izafa hota ja raha tha.

bhaari tanaffus ke sath aik mohom ki umeed liye usne mrs Yazdani ko call ki. jannat un ke ghar nahi gayi thi. Aima ka mobile off ja raha tha. woh waise bhi Islamabad mein mojood nahi thi. agar hoti bhi to Jannat itni jaldi itni kam muddat mein us tak nahi pahunch sakti thi. Yakeenan woh abhi tak yahin aas paas hi kahin thi. woh usey talashte hue park ka rukh kar chuka tha. mausam ki kharabi ke baais wahan ikka dukka hi log the.

aage masjid thi aur masjid ki doosri taraf markazi shahrah thi. aur isi markazi shahrah par qadam dharte hi traffic ka shhor yaka yak uske liye Samat huwa tha. zindagi se bhar poor fiza aik khalaa mein badal gayi thi.

zameen ne qadam jakde, wujood bhaari patthar ho gaya. usey laga woh apni jagah se hil nahi sakay ga. Jara sa hille ga to paash paash ho jayega.

(Flashbacks)

"Tumhe lagta hai, Allah ne hamein bachaya hai?"

"haan, Allah ka boht boht hai shukar baji!"

"Esa bhi to mumkin hai ke yeh aik warning ho, mere liye tumahare liye ya shayad kisi aur ke liye"

chhatri khul gayi thi. gaadi ke qareeb woh phisal kar giri thi. uska haath jhatak kar apne sahare uth rahi thi.

"Jo kuch sun chuka hoon, woh sab mummy ko batau ga to woh kya sochen gi? aik aisi ladki ko baho bana baithi hain jo infertile hai."

"Jis ne apni sotan ke bacche ki jaan laine ki koshish ki hai, jis ke khandan ke log usey achhut ki tarah treat karte hain aur jo apni maa ki mout ka sabab bani hai."

parking area mein gaadi start karta woh aankhon mein dhair saari nami liye, kuch be basi aur aazuardghi se usey dekhati jannat kamal. Char so tariki chhayi aur manzar badal gaya.

"Agar tum is tarah mere sar par musallat rahe, to mein auntie ko sab kuch bta dun gi."

"shoq se jao! mein bhi tumhari pol unke samne khol dun ga, hisaab barabar!"

"Tum aisa nahi karo ge."

Lehje mein khauf tha, aankhon mein wehshat.

"Kar sakta hoon, mein to ab un se yeh bhi keh sakta hoon ke meri biwi banjh hai, mein doosri shadi karna chahta hoon."

usne chandi ki is soorat ko hazaar tukdo mein bikharta dekha.

"Faris please darwaaza kholo please!"

Bilak Bilak kar rote woh is ke kamre ka darwaaza bajaye jarahi thi.

"Aik bacche ki jaan laine ki koshish? aakhir tum mein itni himmat kahan se aagai thi?"

aur phir usne slight door poori qowat se band hote dekha. ab woh kamre se bahar, december ki Sard raton mein balcony mein khadi thi.

"Allah ke fazl se bahut se back up plans hai mere, aur sab hi survival based hain, nahi mera sar pathega, nahi mein doob kar maroon gi."

jatati nigahein, mazboot lehja, shujaiat liye anokha andaaz jaisey woh duniya ke har tufaan se bhid jane ki, har chattaan se ladh jane ki salahiyat rakhti hai. uske liye nahi  "Faris" kuch hai, na Talaq kuch hai.

"Mujhe Talaq fori chahiye hogi. tumhe abhi se documents ka intizam kar lena chahiye taa ke munasib waqt par bana kisi takheer ke sign kar ke aik doosre se jaan khulasi ki jaa sake!"

•••

khud par taari is bhayanak jamood ko todte hue woh aage badha. Sadak ke kinare ghair mutawazan qadam uthata woh wahan ja raha tha jahan kuch der pehle aik haadsa paish aaya tha. chalti hui taiz raftaar gaadi ke samne

achanak hi koi ladki aagai thi.

ambulance ka Siren logo ka hajhoom aur shiddat se barasti barish mein mout ko itne qareeb se, is andaaz aur is haalat mein daikhta Faris wajdan apne hawaso mein hargiz nahi lag raha tha.

"Lekin agar kuch wajohaat ki bina par, mujhe qabal az waqt yeh ghar chhorna par jata hai, aur is douran mera thse fi alfoor rabita bhi mkn nahi ho paata to mein aik mah tak ki muddat ko zehen mein rakhon gi. "

muddat mukhtasir thi mukhtasir se mazeed mukhtasir kar di gayi thi. maheena aan ki aan mein hafton aur phir dinon mein badal kar lamhoon par muheet huwa tha.

"Aur yeh mera tum se wada hai, jab jane ka waqt aaye ga, mein khamoshi se chali jaoon gi."

"...aur jannat kamaal wada khilafi nahi karti thi."

yaqeen aur be yakeeni ki kefiyat mein dukh aur sadme se nidhaal usne apne raste mein aane walo ko hatate hue strechar par rakhi us laash tak pohanchna chaha. khoon se surkh hoti tum nam chadar uski muthi mein aayi.

Chehre se chadar sirki baal, peshani phir veeran aankhen wazeh hui. uski saari himmat, sakt aik lamhe mein fanaa hui.

"Tum jitne marzi mansoobe bana lo mister shirazi! khudkushi mein nahi karoon gi, na London ke bridge se, nahi

kisi aur jagah se!"

chadar uske haath se chhut gayi. woh baal, chehra aur aankhen. woh jannat kamaal ki hargiz nahi thi. kamre mein tareeqi thi. Khidkiya khuli hui thi. Hawa se parde lehra rahe the.

Bahar mausam khushgawaar tha magar un ke andar ki udasi har guzarte lamhe bardhti ja rahi thi. mobile haath mein tha. woh ab tak na jane kitni baar Faris wajdan ko call kar chuki theen. kitni hi baar msg bhej chuki thi magar wo koi jawab nahi de raha tha. jannat ka mobile hanuz off tha.

woh abhi tak na usse  baat kar saki thi aur nahi unhen uski kheriyat ki ittila mili thi. kal subah se hi unhon ne khud ko kamre mein band kar rakha tha. na khana kha rahi theen na kisi se koi ma

baat kar rahi thi. dastak de kar Ammar ne darwaaza khola to woh aik dam se tadap kar uthi aur taizi se qadam uthate uske paas aayi.

"Kuch pata chala?"

Ammar ne nafi mein sar hilaya.

"Sabra khatoon ke ghar tala laga hai, padosi keh rahe hain woh do mah se kahin gayi hui hain."

"kahan?"

"Yeh koi nahi jaanta. un ka phone number bhi band ja raha hai."

Saira apna sar hathelio par giraye sofey par baith gayi. khauf aur andesho mein ghira un ka dil wehshat se dhadke ja raha tha. ankhen nam thi, lab kapkapa rahe the.

"Faris usey dhoond raha hai, woh mil jaye gi, haan.. mil jaye gi."

Ammar dukh aur sadme se apni maa ko dekh kar reh gaya.

"Aap abhi bhi us shakhs par bhrosa kar rahi hain mamma?"

Uske lehjey mein shak tha.

"Jis insaan ne apne baap aur bhai ko nahi chorha, woh jannat kamaal ke liye reham dil hoga?"

"Ammar!"

un ki aawaz kapkapa kar reh gayi.

"Mein ne kaha tha aap se, woh acha insaan nahi hai, mein ne roka tha aap ko, magar aap ne meri aik nahi suni."

sard lehjey mein woh kuch mathos ho kar baat kar raha tha.

"Aap sirf chahti thi ke kisi tarah wo hum sab ki nazron se dur ho jaye."

Saira aankhon mein sadma liye Ammar ko dekh kar reh gayi. itne sakht lafzon ki tawaqqa unhono apne betay se hargiz nahi thi. woh bhi is wqat par jab woh jannat ke liye is qader pareshan ho rahi theen.

"Chaar bete hain aap ke is ghar mein kisi ke sath bhi aap jannat ki shadi karwa sakti theen. Faisal bhai, uzair bhai, Ahmed bhai aur mein! mein ne khud request ki thi aap se ke mujhe koi problam nahi hai, aap khamoshi se mera nikah parwa de."

"Is tarah dar dar ki thokare khane se behtar hai, usey apno mein aik mustaqil thikana miley, magar nahi aap bhala aik banjh ladki ko apni bahu kaise bana sakti thi?"

"Aap to bas usse jaan chhurwana chahti thi."

"Aur mubarak ho mamma! aap apni is koshish mein bahut kamyaab rahi."

Saira apni jagah pathrayi hui baithi theen. yeh kaisa chehra tha jo Ammar unhen dikha raha tha. yeh kaisi haqeeqat thi jo woh unhen bata raha tha.

"Mein ne soch samajh kar us uska rishta tay kiya tha Ammar! mein usey Zaman se bachana chahti thi."

unhon ne kamjor aawaz me apni position clear karna chahi un ki niyat mein koi khot nahi tha. woh jannat ka bhala hi chahti thi.

"Faris behtareen intikhab tha."

woh us par yaqeen qaim ra tum rakhna chahti theen. na wo apne faisle ka difaa kar chahti thi, magar ammar unki har koshish nakaam bana gaya tha.

"Aap pareshan kyun ho rahi hain? woh mar jaye gi magar aik zimmedaari aur bojh ke roop mein aap ke ghar bhi nahi aaye gi."

apni baat poori kar ke woh ja chuka tha. aur dil par bhaari boojh liye saira apni jagah baithi reh gayi thi.

palak jhapakte manazair badle the. andhera chhatt gaya tha. Khidkiyo ke parde simat gaye the. Sooraj ki roshni chhin kar tiles par utar aayi thi kayi hafte pehley ka qissa jhalakiyo mein apna aap dohrane laga tha. unhon ne jannat ko dekha. usne safhe glass table par phela diye the. khud woh un ke samne carpet par baith gayi thi.

"Qur'aan mein banjh ke liye do lafz istemaal hue hain. aik hai 'Aaqir' aur dosra hai 'Aqim'.  Jab surah mariyam mein Zakariya alaihi salam ki zozja ka zikar aata hai to woh Allah se dua karte hue kehte hain meri biwi Aaqir hai lekin jab zozja ibrahim ko farishte aulaad ki basharat dete hain to woh kehti hain mein budiya Aqim hoon!"

woh apne isi mehsoos andaaz mein mukhatib thi aur safhe palat kar matlooba ayaat unhen tarjume samait dikha rahi thi.

yeh surah Ash Shuaràa ki aayat hai. ungli rakh kar woh keh rahi thi.

"Aasmano aur zameen mein Allah hi ki badshahi hai, jo chahta hai peda karta hai, jise chahta hai ladkiya ataa karta hai aur jise chahta hai ladke bakhsha hai. Ya ladke aur ladkiya mila kar deta hai aur jisey chahta hai banjh Aqim  kar deta hai. be shak woh khabar daar qudrat wala hai."

phir ruk kar sar uthaye woh un ki taraf dekhne lagi thi.

"Aap ne dekha yahan Aqim likha gaya hai, Aqir nahi."

unhon ne par soch andaaz mein asbat mein sar hilaya tha. Sooraj ki roshni jannat ke shehad rang balon par par rahi thi.

"Aur yaha surah tul anbiyàa ki yeh aayat Zakaria alaihi salam se mutaliq hai."

usne ungli rakh kar pardhna shuru kiya.

"Phir hum ne uski dua qubool ki aur usey Yahya ataa kya aur uske liye uski biwi ko durust kar diya. be shak yeh log naik kamo mein daud parte the, aur hamein umeed aur dar se pukara karte the aur hamare samne aajzi karne wale the."

khatam hoti aayat ghhor wa fikar ke kayi darwaze wajeh kar gayi thi.

"Ab is mein aayat ka yeh hissa ghhor talabb hai, hum ne un ki biwi ko durust kar diya. yani un ki islaah kar di. ab sawal yeh hai yahan kisi islaah ki baat ki gayi hai. jahan tak mujhe ilm hai zozja

Zakaria aik naik aur ibadat guzaar khatoon thi, aisa nahi tha ke naujubillah un ke mabain koi sharr ya fasaad tha, jisey islaah ki zaroorat padti."

aik lamhe ka tawaquf kar ke woh barah e raast un ki aankhon mein dekhne lagi thi.

"Aap ka kya khayaal hai?"

"Mein tum se sunna chahti hoon!"

wo be sakhta keh gayi thi. wo zara sa jhichki, phir muskurate hue goya hui.

"Mujhe lagta hai yeh is bemari ki, is nuqs ki islaah thi. is banjh pan ki jo unhen aulaad se mahroom rakhe hue tha."

un ki khamosh nigahon mein aika aik herat ka ta-assur ubhra tha. andar ke sawalaat ke jawab talashti jannat kamaal unhen bohat mutmaen nazar aayi thi. uska lehja kamzor nahi tha. uske lafzon mein mayoosi nahi thi.

woh yaqeen aur be yakeeni ke darmiyan bhatak nahi rahi thi, usne kinara chunn liya tha, saahil par qadam jama liye the.

"Jahan tak mein apni tehqeeq se samajh payi hoon, banjh pan ki do kisme hain. aik yeh mard ya aurat mein siray se maa ya baap banne ki salahiyat pedaishi tor par mojood nahi hoti aur usey 'Aqim' kehte hain jo ke zozja ibrahim alaihi salam thi. Usi 'aqim' ka zikar surah shoora ki aayat pachaas mein hai. aur doosra banjh pan woh hai jo kisi na kisi nuqs ya bemari ki wajah se hai. aur jis ka ilaaj ya islaah mumkin hai."

Mrs. Shirazi ne gehra tanaffus le kar palken bhickayi. manzar wohi tha, kamra bhi wohi safhe bhi wo ho hain magar jannat kamaal kahin nahi thi.

"Aqir kisi sabab se bhi ho sakta hai aur baghair kisi sabab ke bhi kuch logon ko koi masla nahi hota par tab bhi un ki aulaad nahi hoti. aur kuch logon mein koi nuqs hota hai, is ke bawajood un ke yahan aulaad ho jati hai."

sabz roshnaye se kisi aayat ko underline karti, kisi aur nuqte ki wazahat karti woh aik baar phir unhen mutwajjah kar chuki thi. Qur'aan ne aik 'Aqim' boodhi aurat ko maa bante dikhaya hai. aik boodhi aaqra ko bhi Zakariya alaihi salam ki biwi mein jo nuqs tha woh dua se, umeed se, yaqeen se theek ho gaya. aur zozja ibrahim jin mein siray se maa ban'ne ki salahiyat mojood nahi thi, inhen bhi Allah ne apni qudrat se maa ke rutbe par Sarfraz kar diya."

Pahadiyon par parde phail gaye the. Sooraj ki kiranen simat gayi thi, un ke bed room mein jannat kamaal ab khidkiyo ke paas khadi nazar aa rahi thi .

"Bilaa shuba yeh aik mehroomi hai, aur yeh mehroomi bhi Allah ke chuney hue kitney khaas bando ke hisse mein aayi, yeh baat mein bhool rahi thi."

lehjey mein daba daba sa josh aur aankhon mein aik chamak lehrai thi .

"isi mehroomi ko Allah ne ataa mein badalte dikhaya. jo namumkin tha usey mumkin kar ke dekhaya. aik 'Aqir' aik 'Aqim' do azeem aurtain aur dono ambia ki maaen thehri.

kamre mein ab sirf zarkar lamp roshan tha. is ki roshni mein woh unhen apne barabar mein laitee hui dikhayi di. seene par sar rakhe aik maa mein, apni maa talashti. mayoosi mein umeed ka diya jalatii.

"Intzaar hamesha un hi logon ke hisse mein aata hai auntie! jinhein kuch azeem ataa karna maqsood ho."

Manzar badal gaya tha. jannat un ke kamre mein ab kahin nahi thi. na woh pardo ko doriyon mein bandh rahi thi, nahi un ka likha huwa koi article type kar rahi thi aur nahi un se ab koi aayat discuss kar rahi thi. un ke kamre mein ab mukammal khamoshi thi. aisi khamoshi jo un ke andar aik shore barpaa kiye jarahi thi.

"Bilaa shuba ambia ke liye Muajzaat huwa karte hain. magar woh moazje un ke liye bhi baghair sabr, dua aur aajzi ke nahi hue. yeh points mein miss kar rahi thi."

woh uski har baat ka matlab jaise ab samajh rahi theen. har sawal ke peeche chhupa huwa dard jaisey ab mehsoos kar rahi thi. unhen kabhi pata hi nahi chal saka ke woh reserch uske apne liye thi. woh mehnat, woh uljan aur behas woh sab uske apne liye thi.

"Aik woh log hote hain jinhein sirf bahar ki duniya se ladna parta hai. yeh aik jung hai aur qadre aasaan hai. lekin bahar ki duniya ke sath sath jo jung apne andar, apne aap se ladni padtee hai. yaqeen kare woh bahut mushkil hoti hai."

waqt safhon ki tarah palat raha tha. woh unhen peeche aur bahut peeche liye ja raha tha. jannat ki aansuon se bhari ankhen unhen charon taraf nazar aa rahi thi.

"Aap baar baar marte hain aur baar baar zinda kar diye jate hain. usi aik hi aziyat se baar baar guzarne ke liye jahannum bhi isi liye jahannum hai ke sab baar baar hota rahega. haina?"

unhen yun laga jaisey woh jaye namaz par baithi aadhi adhuri baatein aik baar phir karne lagi hai magar woh baatein

aadhi adhuri nahi rahi thi. woh un ke liye mukammal hoti ja rahi thi.

"woh log bhi to hote hain jinhein baghair kisi intezaar, dua aur tadap ke sab mil jata hai. un mein hum kyun nahi ho sakte? hamein kyun rona parta hai? hamein kyun aik aik khwahish ke liye tadpna parta hai?"

ghadi ki suyyan mutharrak theen. pendulum ki aawaz ab muhim nahi rahi thi. wajdan house mein pehle din se ab tak jannat ke sath hone wali har guftagu unhen yaad aa rahi thi. umeed aur mayoosi se ulajhti uski ankhen mazbooti se kamzor padtee uski aawaz. vra dara sa lehja, sehma sehma sa andaaz aur aanso-on ki ameezish liye labon par achanak se ubharti zindagi se bhar poor muskaan.

"Maa ki bad dua mein bhi bahut assar hota hai. haina! balke sab se ziyada assar hi usi bud-dua mein hota hai?"

un ki tasbeeh samet ti ungelian kapkapane lagi.

"Agar koi maa apni aulaad se nafrat karte karte mar jaye to kya maa ki nafrat bhi mar jati hai?"

"kabhi kabhi aap ko aise jurm ki saza millti hai jo aap se sarzad nahi hota. aisi saza ko jhelne ka hosla insaan kahan se laaye?"

bed crown se tek lagaye woh nam tariqi mein khidkiyo se bahar kahin dekhne lagi. bahar lawn mein lights ki roshniya swimming pool ki satah par chamak rahi theen.

"Aap jaag gayi?"

aqsa barabar hi kursi par baithi thi. uth kar un ki taraf mutwajjah hui. lehjey mein tashweesh numaya thi. aankhon mein fikar thahri thi. mrs Shirazi ki tabiyat guzashta kayi dinon se kharab thi. medicine laine ke bawajood woh theek se so nahi paati theen. aaj phir woh uth kar baith gayi theen. aik baar phir khalaa mein kahin dekhte

kho si gayi thi.

"Faris aa gaya hai?" chand lamho ke baad unhon ne poocha.

"Nahi!"

Mrs. Shirazi ka dil bhaari huwa. aik be naam si aziyat ragg ragg mein utar gayi. khushk labon ko tar karte hue unhon ne aankhen moond li. woh sahih maeno mein ab sona chahti thi magar neend aankhon se koso dur thi. aur sukoon to jaisey usse bhi dur aik be kal sa ehsas un ki ankhe nam kar gaya. woh chehre ka rukh badal gayi. aqsa pareshani se unhen dekh kar reh gayi thi.

---- •♡• ----