Chapter 38: •CHP-37•

کِسٹ نمبر 8

Karvate par karvatein badalti woh kaafi der tak be aaraam rahi. baa-mushkil bara bajey aankh lagi to daidh bajey khul gayi. usne uth kar baithte hue ehtraaf mein nigah dorhayi.

poora ghar khamoshi mein dooba huwa tha. sab hi khawab khargoshi ke maze le rahay the. aik wohi thi jisey aik pal ka aaraam nahi tha.

Usne chappal dhoond kar pahani. kitchen mein ja kar pani piya, phir fatima par theek se lehaaf daalti sidiyo ki taraf ja khari hui. sar utha kar upar dekha. neeche sab so rahe the to upar woh bhi yaqeenan so hi raha hoga. kuch der tak shawl ko kaandhon par daaley kuch kefiyat mein apni jagah khadi rahi.

Wo faris wajdan ko jaga kar Bua ki ghair mojoodgi mein hi uski aamad ki wajah jana chahti thi. aur yeh kaam woh subah se pehle pehle kar lena chahti thi.

janti thi bua mudakhlat se baz nahi ayengi. woh un ke mabain sulah ki har mumkin koshish karen gi aur woh yeh nahi chahti thi.

isi tarah khud se ulajhti woh sidiya charh kar upar aagai thi. khayaal tha woh so raha hoga, magar kamre ki light roshan thi. usne khtr ki ki oot se andar jhakka. kamrah khaali. faris nadarad

"Ye kidhar gaya ?"

yahan wahan nigah dorate woh mundair tak gayi aur yahin se usne sadak ki taraf dekha jahan andhere mein gaadi ka gumaan ho raha tha. kamra aur phir sehan ka chakkar kaat kar achi tarah se jaiza layte woh dayen taraf muri aur agle hi lamhe kisi se takra gayi.

khauf apni jagah jaga doosri magar jo chout naak par lagi thi, uska dard purey jism mein dora gaya. Faris ne usey baazu se pakar kar girne se allag bachaya.

"Iron man ke sagge." uski suji naak sehlate us par phatt pari.

"Dekh kar nahi chal sakte?"

halaank chal to woh rahi thi. Iron man to khada tha.

"Tum theek ho?"

khansi aur zukam ki shikayat liye Faris ki aawaz bhaari tanaffus bhaari aur dil bhi bhaari.

"Tees second pehle tak theek thi."

usne faris ke bukhaar se tapte haath ki girift se apna baazu chhuraya.

"balke saat ghante pehle tak bilkul theek thi mein."

Tap kar, chilla kar jawab daine ke baad uski aankhon mein ankhen dalain.

"Tum yahan kyun aaye ho?"

woh usey dekh raha tha. nim tareqi mein uski hazel aankhon ka ab jaisey koi rang nah tha. sirf siyahi hi thi. har jagah aur har taraf uske tasurat mubhim aur paicheeda the. na uski aamad samajh mein aa rahi thi. na woh uska dimagh parh pa rahi thi .

kuch to huwa tha uski ghair mojoodgi mein yaqeenan kuch to. yaka yak kisi mumkina khadshe ne sar uthaya to dil ki dharkan taiz hogayi.

"auntie theek hain?"

pehla khayaal hi mrs. Shirazi ka aaya. pehli fikar, pehla khauf, pehla andesha hi un ke mutaliq tha. uski wajah se unhen kitni pareshani hui hogi. apne bete ke muamlay mein, apni pasand ko sochkar ke woh kitna depressed hui hon gi. faris ka sar asbat mein hila. uski ruki hui sansen bahaal ho gayi. sad shukar baat un ki na thi. sad shukar woh kher kheriyat se theen.

"To phir?"

usne sawalia abr utha liya. sard hawae safede ke patto se sar serra kar guzri. dharti par phela huwa andher asmat gaya. chandni zameen par utar aayi. baadalo ke aawara tukre siyahi mein numaya hue magar jo khamoshi thi woh kuch der tak tehari.

"us raat..."

faris ke lab hile. magar jumla adhoora reh gaya. woh kehna chahta tha woh uska intezaar kar leti. woh kaise keh de woh uska intezaar kar leti? uska har lafz hai bewaqat ho gaya. har baat, har Daleel , har Hujjat be wazan ho gayi. bawajood koshish ke woh kuch na keh saka. kuch na bata saka.

baat dil ki thi aur dil tak thi. usey zuba par laane ki taaqat nahi rahi thi. himmat ka sharaza bikhar chuka tha. na aitraaf ki sakt rahi thi, na moazrat ka hosla raha tha. jane woh kaisey log hotay hain jo kisi ko rula kar aasani se maffi maang lete hain, isse to nahi ho raha tha. bilkul nahi ho raha tha. usne apne andar ki be qarari par qaboo paate hue balon mein haath phera. uske khayalat muntashir the. uski soch waahmon mein ghiri hui thi. uska dil andeshon ke jaalo se pur tha.

Dard ab har jagah tha. andar bahar aik ki kefiyat ho rahi thi.

"Us raat jo huwa mujhe uska be had afsos hai."

uske ehsasat se qatee be khabar jannat kamaal keh rahi thi.

"Mein auntie ko koi bhi tension nahi dena chahti thi lekin faiza chachhi achanak aa gayi. unhone auntie ko mere bare mein sab bata diya."

Shawl ke kinare se kisi dhage ko khenchte hue woh aankhon mein afsos aur nedamat liye is tarah se baat kar rahi thi, jaisey woh tamam ki tamam baatein, uski pushida haqiqate, uski sachayi, uske aamaal the.

jannat kamaal ke samne khada faris wajdan mom ke putale ki tarah khilne laga. uska dil muthi mein jakra gaya tha, uske seene par wazan barh gaya tha.

"Tum bohat achhe ho baba se bhi achhe!"

uske kamre ke ain wast mein aik saat

sala bachi ne baazu phela kar gol gol ghumte hue khushi ka izhaar Kiya tha. aan ki aan mein bohat si baatein, lehjey, tanz aur tane usey yaad aa gaye. har woh talkh baat jo usse kar chuka tha, har woh zakham jo lafzon ki soorat usey de chuka tha. kitni choute theen, kitna تشد دتھا, kitni nafrat thi, kitna bara azaab kitni barri saza thi yeh usne aik lamhe ke liye bhi nahi socha agar woh tamam ki tamam baatein jhoot saabit huien to ?

"Meri wajah se auntie ko bohat dukh pouncha hoga."

woh abhi tak usi gham mein thi.

"Uske liye I'm extremely sorry !"

Faris wajdan ki maa ko jo takleef pahuchi uske liye uski moazrat! Bahut dil se moazrat! aur woh khamosh tha. bohat ziyada khamosh. usey laga woh saans bhi nahi le raha. yaka yak kisi khayaal ke zehen mein aate hi usne shawl ka sera chhore chhar kar sar uthaya.

"Kahin ab tum is baat ka issue bana kar mujhe koi saza waja daine to nahi aaye?"

ab ke khasi mashkook nazron se usne faris ko ghora. hawa ke zor se baal peshani par jhuke. aankhon mein nami ter gayi. jannat ke sath sath har manzar dhundlaa gaya.

"Ab agar tum ne kaha mein tumhe Talaq nahi dena chahta, saari Umar isi tara latka kar rakhuga, waghera.. waghera... to I swear mein khula ke liye court chali jaoon gi."

sakht lehjey mein dhamka kar usne apne irade wazeh kar diye. woh us par nazrain jamaye munjamid sa khada tha. jannat kamaal usse kabhi nahi dari thi. na pandrah saal pehlay na pandrah saal baad.

"Aur agar tum samajh rahe ho ke mein"

"Aik cup chaye miley gi?"

usey laga agar woh usey sunta raha baar baar uske shak, uske shubhat ke sawalaat ki zad mein khada raha to fanaa ho jaye ga.

jannat kamaal ne achambhe se usey dekha. yahan uski jaan par bani hui thi aur is Ameer zade ko chai ka cup chahiye tha ? woh bhi raat ke dhai bajey ?

dhitkar, nafrat aik taraf lehaaz aur murawwat doosri taraf. Nokro ki fouj bahar haal yahan nahi thi. sulag kar usey dekha.

sirf is liye ke uski tabiyat theek nahi thi aur sirf is liye ke woh Bua ka maheman tha, woh ghusse se paon patak kitchen mein chali gayi.

"Apni chahiti biwi ko sath lana thaana un khidmat darion ke liye.."

burr burahat wazeh thi. woh uske peeche darwaze mein aan khada huwa. labon ko muskurahat chhoo kar guzri. dil mein gham sa tehr gaya.

"Mujhe aik baat samajh mein nahi aati. jab tumhe apni pehli biwi se itni mohabbat thi to tum ne mujh se shadi kyun ki? auntie ne gun point par to nikah nahi prhhwaya tha. tum inkaar bhi to kar satke the?"

khamoshi mukammal khamoshi !

Cylinder jala kar ketli rakhi, dudh dala

"Bhale se tumhe bura lagey lekin aik baat hai tumhari choice hai bohat buri."

Adina Zubair aik baar phir apne tamam tar ghuroor, husn aur nazakat ke sath is ke hawaso par chhaa gayi thi to bhadas nikalna zaroori ho gaya tha.

"mummy ki choice achhi hai?"

"haan bilkul!"

woh be sakhta keh gayi magar aglay hi liye, aglay hi pal jab samajh mein aaya kya keh diya hai to hai. ke ab woh kuch nahi bolay gi. galoon par surkhi daud gayi. lab bhinch kar khud ko dil hi dil me kosa. khamoshi se uski taraf pusht kiye chai bana kar cup mein undail kar muri to kitchen ke darwaze nahi tha. apna mug sath rakh kar woh kamre mein aagai. samne hi woh bed par halki si khansi ki zad mein betha tha. tissue ka packet haath mein tha, roshni mein ab usne dekha tha ankhen surkh aur kinare suje hue lag rahay the. usne chai paish kar di .

"Biscuit nahi hain ?"

woh jane ke liye murri aur phir zabt kar ke palti. biscuits ke sath aik glass pani bhi rakh diya. apne tak hathon mein liye darwaze mein jaa khadi hui. chand lamho tak usey ghurti rahi ke ab woh kuch bolega aur apni aamad ki wajah batayega magar faris wajdan chai aur biscuits ke sath insaaf karte hue usey mukammal nazar andaaz kar chuka tha.

woh andar tak sulag uthi.

"Tumhe pata hai yahan bua ke ghar mere liye kitne rishte aa chuke hain?"

aakhir usey yeh bawar bhi to karata tha ke woh koi giri pari ladki nahi hai. aur agar Faris wajdan ko kayi ladkiya mil sakti hain to usey bhi apnane wale bhi bahut hain.

woh chai mein biscuits dubo kar khate hue lamhe bhar ke liye ruka.

"Bua to has kar taall deti hain, unhen hamare mamlaat ka ilm nahi lekin mein bohat ghhor kar rahi hoon."

"Aik rishta mujhe apne liye munasib laga hai. Bua ka dur pare ka rishta daar hai. biwi ki death ho chuki hai. do choti choti si betiyan hain. larka bhi koi ziyada bari umar ka nahi hai. tum se Talaq ke baad mujhe apne liye bhi kuch sochna hai. ab mein kahaaniyon ki heroen ki tarah yeh nahi ke sakti ke please! mujhe apna naam de do. mein saari Umar isi naam ke sahare tanha rehna chahti hoon.. Blah! Blah! Blah!"

ba qaida chehre ke utar charhao ke sath haath chala kar kaha. chai mein biscuit dubo kar muh tak le jate faris ne ruk kar nazar uthai biscuit tut kar chai mein gira, uska dil bhi.

mug hatho mein liye usse is qadmon ke faasle par ab woh maiz par charhi baithi thi. peeche khidki poori ki poori khuli hui thi. hawa ke zor se dupatta dhalak kar kaandhon par aagra tha. shehad balon ki lambi pony se nikal kar chehre ke etraaf mein dheeli ho rahi thee.

"Tumhare liye rishte aa rahey hain?"

"To kya nahi aa sakte?"

Eyebrows charha kar poocha.

"waisey mein tum se kuch dinon tak rabita karne wali thi. mera samaan bhi tumhare ghar reh gaya hai. tumne kahin phinkwa to nahi diya ?"

Naak onchi kar ke zahir kya usey to ab sirf apne samaan se matlab hai. aik aur biscuit toot gaya. aadha jo muh mein gaya uski mithaas khatam ho gayi. usne pani ke chand ghoont bharay biscuit ka dosra packet khola.

"auntie ko maloom hai tum yahan aaye ho?"

woh khamosh raha .aur yeh khamoshi jannat ke dil mein karb utaar gayi.

zahir hai agar woh unhen batata to kya woh usey aane deti? is jaisi ladki ki ab un ki zindagi mein koi jagah thi. woh is baat par ranjida hoti hongi ke unhon ne faris ke liye uska intikhab kyun kiya ?

"tum yahan kyun aaye ho?"

ghoom phir kar wohi sawal, magar woh jawab nahi day raha tha. na tanz na taane, na koi sakht baat na koi tazheek amaiz rawaiyya na talkh lehja faris wajdan ab kya karne wala tha? woh bhkr mein par gai.

kaafi der tak jab woh kuch na bola to notebook ka safha phaar kar, us mein apni kuch cheeze darj kar ke woh uske paas aagai.

"Tumhare liye be shak kachra hoga, magar mujhe meri cheeze bohat Aziz hain. is liye apne kisi mulazim ke haath bhijwa dena."

faris ne safha le liya. fold kar ke uske Arsalan bhai ki kamiz ki jaib mein rakh diya. woh tap gayi. lekin muh se kuch na kaha. phir unhi bigre tewaro ke sath jane ke liye muri hi thi ke faris ne haath thaam liya.

"Tumhari bua keh rahi theen koi baat hai jo tum mujhe batana chahti ho."

wo apni jagah patthar hui. chehre ka rang faq, ankhen num palken bhaari hogai.

"kuch nahi!"

bharai hui aawaz mein keh kar usne haath chhurana chaha. girift sakht nahi thi magar itni naram bhi nahi ke woh azad ho sakti.

"Mera haath chhoro."

aan ki aan mein uske tasurat badal gaye the. woh tahammul se baat karte hue bhi ghusse ki intehaa par lag rahi thi. faris ne chand lamho ke liye usey pashemani se dekha. usey is nahaj par laane wala woh khud tha. faslo ki deewar usne khud qaim ki thi. narmi ko apni talkhi se nocha tha. umeed ko apne lafzon se mara tha. naazuk kalayi girift se azad ho gayi. usne tray uthai aur kamre se nikal gayi.

kitchen mein deewar se lag kar kayi baar apni aankhon ko musla lab bhinch kar gaal ragar kar khud ko sambhala, khud ko samjhaya ke jis raste par wo kamsan  thi, woh uska ikhtiyar karda hargiz nahi tha. yeh muqaddar ki chaal thi. nafraten, dhitkar aur bila waja ki adawateen is rastay ka khasa theen jo usey kuch logon ki be rukhi se inayat huwa tha.

Faris wajdan, Adina Zubair ka tha, uske dil par Adina ki hukmarani thi. uski zindagi mein jannat kamaal ki koi gunjaish na pehley thi, na ab ho sakti thi. jo tay ho chuka tha usey qubool kar ke usey har soorat apne safar ko jari rakhna tha. usey kamzor nahi parna tha.

woh neechay chali gayi. apni chaar payi par let kar, aasman ko dekhte woh musalsal apne rone par qaboo paati rahi.

Faris ko yahan nahi aana chahiye tha. hargiz nahi aana chahiye tha. uske sukoon mein khlal par chuka tha. uske Laiha amal mein darare par gayi theen. woh uske bachay ka baap tha, jitni nafrat woh usse karta tha, woh aulaad ke muamle mein bhi ab usey kisi naye imthehaan mein daal sakta tha.

•••

karvat par karvat badalte raat guzar gayi. din bedaar huwa, subah ki namaz parh kar sone ki koshish ki to aankh lag gayi. kuch guzashta shab ki be khwabi thi ke woh din charrhey tak soti hi rahi. das bajey uski aankh khuli to Sooraj naizay par aachuka tha. sehan mein dhoop har kone tak pohanchi hui thi. darwaaza band tha, khidkion ki darz se nam tareqi mein roshan lakerain numaya ho rahi theen. pehla khayaal usey Faris ka hi aaya. dimagh az sar no ulajh gaya. tension shuru ho gayi. uth kar bahir gayi to maloom huwa woh to subah se pehle pehlay yahan se ja chuka hai. jannat apni jagah be yaqeen khadi reh gayi.

"zaroor tune hi usey kuch kaha hoga."

Sabra bua usse sakht khafa theen.

"Teri wajah se woh bukhaar mein ghar chhore kar chala gaya."

be dili se wohi ke sath paratha hue woh aankhon mein ubharti nami ko paray dhkelti rahi. Bua ke sawal, un ka gussa, un ki narazi aur saari situation ko kisi tor na samajhne ka yeh amal usey shadeed aziyat se do chaar kar raha tha.

ab kya woh uske paon pakadati ke woh usey Talaq na de? khud ko jitna be mol karna tha woh kar chuki thi. mohabbat se, ikhlaq se, khidmat guzari se us rishte ko bachane ki jitni koshish usne karni thi

karli thi. ab to kuch bhi nahi bacha tha. na mohabbat, na izzat, na himmat na sakkat aur hosla to bilkul bhi nahi. to bardasht bhi aakhri had ko chhu rahi thi. woh phir se kisi imthehaan mein nahi parta chahti thi. phir se koi ghalat qadam nahi uthana chahti thi.

sandal aapa, Arsalan bhai ke sath ghar mein daakhil huien to woh chup ho gayeen. lekin aankhon se wazeh kar diya ke un ki baat abhi khatam nahi hoti hai. sara din woh pareshani mein mubtala yahan wahan tahelti rahi. sukoon to kisi pal nahi tha. aakhir woh kyun aaya tha? aur mamlaat clear kiye baghair kyun chala gaya tha? un ke mabain Talaq ka faisla hona tha to aisey kaisey woh khamoshi se ja sakta tha? us par mustzamid yeh ke uske samaan ki list bhi yahin chhore gaya tha.

Sham ko bua kamre mein aayi to woh esha ki namaz parhne ke baad bed par name daraaz baithi thi. akhbar samne hi khula para tha. zehen uljha huwa tha aur nigah mein khalaa mein kahin bhatak rahi theen.

"usne bataya nahi woh dobara kab aayega?"

Teh kiye hue kapre almaari mein andar rakhte hue unhon ne hanooz khafgi se poocha. usne gardan mourr kar unhen muztarib nigahon se dekha. un ki soch abhi bhi wahin thi.

"Ho sakta hai kuch dinon tak woh mujhe Talaq ka notice bhijwa de."

himmat mujtma kar ke usne keh diya. ab bhallay se bua skht naraaz ho usey parwa nahi thi. woh kuch baatein un par har soorat wazeh kar dena chahti thi.

"Magar Talaq to nahi ho sakti."

almaari band kar ke bua uski taraf murri.

"Ho jati hai bua! aurat hamal se ho, tab bhi Talaq ho jati hai."

magar woh shidra to yahi keh rahi thi ke nahi hoti. apni samajh aur feham ke mutabiq jo unhon ne sun rakhe tha, keh diya tha. bed side table se quran utha kar usne matlooba sourat dhoondli, aur phir matlooba safha khoola, matlooba

aayat par apni ungli rakhi.

yeh dekhen. yahan likha hai.

"Aur hamal walion ki iddat un ke bacha janney tak hai."( surah Talaq )

"yeh aayat mutalqa aur bewa dono ke bare mein hai bua, Talaq har soorat ho jati hai."

Daleel quran se thi, bua ke paas nafi ya inkaar ki koi gunjaish nah rahi. ab woh uljan mein khadi theen. fikar ne az sar no ghair liya tha. inhen ab maamla samjhta ho har gaz nazar nahi araha tha lekin inhen apni taraf se har mumkin sae karni thi. kuch soch kar woh uske paas bed par aa bathain.

"Tune usey khush khabri to suna di thi?"

jannat ka dil bhaari huwa. nazrain jhuk gayeen. kisi qader koshish se uska sar nafi mein hila.

Sabra bua haqwaq usey dekh kar reh gayeen. jannat yeh kya kar rahi thi?

"Tu is baat se usey kaisey be khabar rakh sakti hai janna? kaisey? yeh uske sath zayadati hai beta!"

"Aur jo zayadati mere sath huien woh?"

sabar ka paymana labraiz ho gaya. aawaz bhara gayi.

"Mujhe uske sath ab nahi rehna to kya zabardasti hai?" woh is lamhay bohat pareshan, muzamahil, aur shikast khorda si lag rahi thi. Bua ke dil ko kuch huwa.

"Mein pehle se bohat mushkil mein hoon aur aap aap is tarah ki baatein kar ke mujhe aur mushkil mein daal rahi hain."

uski aankhon mein ansoo jama ho gaye. usey tarhim bhari nazron se dekhte hue hue bohat narmi se uske kandhe par haath rakha.

"Aurat ko rishta nibhane ke liye bohat qurbaniyan dena padtee hain bachay yeh shadi, Umar bhar ka aik faisla hota hai. Ise yun jazbaat mein aakar nahi toda jata. ghar basane ke liye aurat ko bohat kuch bardasht karna padhta hai."

us ne sar utha kar takleef deh nigahon se bua ko dekha. baat ghar basane, rishta nibhane aur bardasht karne ki intehaa par jane ki thi. Bua andaza nahi tah faris wajdan ke sath apne is rishte ko bachane ke liye usne kya kuch bardasht nahi kiya tha. Uska sabr uska thammul, uska intezaar kya abhi bhi na kafi tha? Wo khud mit chuki thi aur uska Safar baki rehna chaiye? Uski himmat, uski bardasht, Tahammul baki rehna chaiye? Ye kesi  mantaq thi? yeh kaisa tareeqa tha? kitni hi der tak woh apne aap se ulajhti rahi. andar hi andar khud ko konsti, kholti rahi. Muhasib shuru ho chuka tha. paanch saloon ka mawazna paanch mahino se hone  laga tha .

Burhan, aik taraf tha to Faris wajdan doosri taraf woh do gharo ke darmiyan aik weraan gali me khadi thi darwaze  dono taraf se band the. aur woh khud ko jaanch rahi thi. dil mein ja kar maazi ki taklifoo ko sahte hue mustaqbil ka khauf uthate hue. Uske andar ki uljhanein barh gayeen. sawal barh gaye. iztiraab barh gaya.

sar utha kar usne Bua ko dekha. ab tak jane woh ghar basane se mutaliq usey kitney gun bta chuki theen. un ke lab mutharrak thay. aankhon se aik aas chehray se umeed jhalak rahi thi. woh bohat pyar se usey samjha rahi theen.

"Bua! aik baat to bataiye."

woh aik lamhe ko khamosh huien to us ne akhbar samaitt kar aik taraf le rakh diya. zara sa agay sirak kar un ke qareeb hui.

"Aurat nikah naame par sign kis liye karti hai?"

Nam aankhon mein aik saada sa sawal liye wohab un se pooch rahi thi . Bua ko is ka sawal samajh mein nahi aaya.

"Zillat? dhutkar? be izzati? tanj? tehqeer? mehroomion ke liye? kiya yeh sab bardasht karne ke liye shadi ki jati hai? is azaab ko jhilne ke liye qubool hai kaha jata hai?"

Bua ko saktah sa sun-hwa. lyon ko junbish day kar kuch kehna chaha magar aawaz ne sath nah diya. jannat yeh kya pooch rahi thi? is nuqte ki taraf kyun jarahi thi jis nuqtay se yeh rishta aaghaz pokarta tha. woh eejaab o qubool ki ghari, jab do log aik hote the? aur jab do log aik hote te to rsht nibhane ke muamlay mein woh do allag kyun ho jatay the? safar ka sara boojh sirf aik ke kandhe par kyun aa jata tha? rishta bachane ki saari mehnat phir kisi aik fareeq ko kyun karni padtee thi ?

"Shadi hamare Nabi “ﷺ” ki sunnat hai. kiya hamare nabi ki sunnat yeh kehti hai apni izzat fanaa kar den. apna wujood mita den, apne haq ke liye aawaz na uthaye, aur zulm bardasht karen aur marte dam tak karte jaye ?"

Bua be basi se usey dekh kar reh gayeen.

"Aap hi mujhe samjha den yeh ghar basanay ka, rishta nibhane ka konsa tareeqa hai bua ?"

uski aawaz kapkayi.

"Aurat nafsiati mariza ho jaye aur uff tak na kare? andar se mar jaye mit jaye, fanaa ho.jaye lekin aah tak nah kare ?"

woh baaes sala jannat kamaal..dr mustafa ki nawasi. titliyon ke peeche bhagnay wali, paryoon ki baatein karne wali, woh keh rahi thi. aur bola usey dekh rahi theen, usey sun rahi theen. waqt aur halaat ne usay kitna bara kar diya tha. us ki soch kitni pukhta ho gayi thi .

Us ki baton mein kitna wazan aa gaya tha. tasalii daine ko tashfi karne ko un ke paas aik lafz bhi to nahi raha tha .

woh jo kuch seh kar aayi thi aur jin halaat se guzar kar woh un tak pohanchi thi, woh uska safar, uska rasta, uski majboori samjhe baghair is ki har baat kaisay reh sakti thee? kaisey jhutla sakti theen? kaisey ?

"Mein ne Burhan ke sath paanch saal guzaray hain bya. mein ne uske liye uske ghar walon ki har nafrat bardasht ki hai. har tanz, har tana, khud par lagne wale ilzamaat sab kuch mein ne bardasht aur sabr se apna ghar basaanaa chaha tha aur badle mein usne mujhe Kiya diya?"

"Talaq ?"

usne ruk kar un ki aankhon mein jhakka.

"Paanch salo ka sath tha hamara. usne mujhe paanch second mein azad kar diya. mein uske ghar walo ko bardasht kar rahi thi, woh bhi to mujhe bardasht kar sakta tha? mein uski be rukhi par sabr kar rahi thi. woh bhi to mujh par sabr kar sakta tha? woh jaanta tha mera koi nahi hai. woh acchi tarah se jaanta tha mujhe to meri saggi maa bhi qaboolne ko tayyar nahi. iske bawajood usne mujhe apne ghar se nikaal diya. usne mere munh par jo thapar mara, uski jalan mujhe aaj tak mehsoos hoti hai."

Uska chehra aansu se mukammal tar ho chuka th.

"Usne rawayya badla, tarjeehat badli haqooq badle, meri jagah kisi aur ko di. mera waqt kisi aur ko diya. mera haq kisi aur ko diya aur mein khamosh rahi. aakhir kis liye ?" uski aawaz bheegi.

"sirf is liye ke mera ghar bacha rahe. mujhe bataiye mera woh ghar phir kyun nahi bacha? kyun tukre tukre ho kar meri aankhon ke samne bikhar gaya ?"

jannat ke ansoo, uski shiskiyan, uska dard, uske sawal unhen takleef pouncha rahe the. woh aankhon mein nami liye usey dukh se sun rahi thi.

"mujhe ab khud se nafrat hoti hai bua! gussa aata hai, mein khamosh kyun rahi. maine yeh sab kyun hone diya. Maine khud ko itna kyun jhukaya? itna kyun giraya? mein ne apne haq ke liye aawaz kyun nahi uthai. agar mein waqt se pehley khud koi step utha laiti, agar mein khud Burhan se allag ho jati, to ammi ammi kam az kam is sadme se to nah marti ke un ki beti aik qatla hai. yeh drama, yeh hungama to nahi hota Bua ! meri wajah se meri behnain ammi se juda to nahi hoti. meri tarah woh bhi yeh rishta to nah khoti."

Bua ne be sakhta uska haath thaama. woh usey mazeed rota huwa nahi dekh sakti thi.

"mein ne apne aur faris ke rishte ko bachane ki har mumkin koshish ki hai bua! aap khud bataye kon ladki chahay gi uski doosri shadi bhi khatam ho jaye? usey doosri baar bhi Talaq ho jaye?"

aawaz ne sath chorra to usne ankhen ragar kar saaf kee.

"mein ne yahan bhi sabr kya, bohat sabr kiya hai, lekin yeh ghar bhi aap ki janna ka nahi hai. aap ki janna is dusre mard ki bhi nahi hai Bua!"

un ka dil kirci kirci hua. woh aabdeedah ho gayeen. kon keh sakta tha, zindagi se bhar poor hansti muskarati larki ka naseeb aisa ho ga? uske raste mein aisay pahad ayenge. aisi aazmayshin aur aisay imthehaan.

"Nana kaha karte the sabr halaat par kya jata hai zulm par nahi. zulm insaan tab bardasht kere, jab uske paas bachao ka koi rasta na ho."

hathon ki pusht se ansoo saaf kar ke, chehray ke atraaf mein seedha girti laton ko usne kaan ke peechay kya. is ki naak, gaal, ankhen gulaabii ho rahi theen lekin woh muhtammil lag rahi thi. jaisey usne khud ko sambhaal liya ho .

"Mein ne jo ghalti pehley ki, wohi ghalti dobara nahi duhrana chahti. aap yeh mat samjhain ke jazbaat mein liya huwa faisla hai. jazbaat mein aisa karna hota to bohat pehley kar laiti. jahan meri koi jagah nahi wahan mein jabarjasti jagah nahi banana chahti. apni aulaad ko istemaal karke to bilkul bhi nahi."

baat khatam ho chuki thi. woh uth kar bahar chali gayi thi. apne andar bohat si khamoshiyan liye Sabra khatoon apni jagah gum sum baithi reh gayi theen.

•••

mrs. Shirazi do pehar ka khana khane ke baad chai ka cup liye bed par baithi theen. mulazma ne laptop un ke samne rakh diya tha. kamre mein ab woh akeli theen. muntazir nigahon se screen ko sakti woh fikron mein ghiri baithi theen. guzashta shab Faris se rabita nahi ho saka tha magar subah usne apni kheriyat ka maseeh arsaal kar ke kaha tha woh do pehar tak zaroor call karega.

kuch hi der mein call mil gayi. screen par kamre ka muntazir numaya huwa. mobile ko stand position mein rakhe woh samne carpet par betha tha.

shower le kar bahar nikla tha. siyah tank top mein kasrti bazu numaya ho rahe thay. baal abhi bhi geele the. aqab mein deewar geer khirkiyan, bed aur wardrobe nazar aa rahi thi. woh yakeenan hotel ke kamre mein tha.

maiz par klhniyan tikaye ab woh kher kheriyat pooch raha tha aur woh bohat ghhor se usey dekh rahi theen. surkh aankhon mein halki si soojan thi.

"kaisi hai meri bahu ?"

usne nazar utha kar mrs shirazi ko dekha, phir mineral water ki bottle uthali. aadhi bottle khaali kar ke french fries

ki plate qareeb kar li.

"Achhi hai." jawab mukhtasir tha.

"Sirf achhi hai ?"

"Keh rahi thi bohat rishte aa rahe hain uske, aur agar mein usey chhore sakta hoon to usey apnane waley bohat hain. "

Mrs shirazi ke lanon par muskurahat ubhri jisey lab bhinch kar unhon ne daba liya.

"Aur?"

"Mujhe dekh kar usey bilkul bhi khushi nahi hui. aik cup chaye pilane par das baatein sunai hain."

"Usey lagta hai yaqeenan mein usayi koi saza daine aaya hoon."

Woh batate hue french fries bhi kha raha tha.

"Achha." unhon ne goad mein cushion rakh liya.

"woh chahti hai wade ke mutabiq ab mein usey azad kar du. nahi kiya to woh khula ke liye court chali jayegi."

aur is aakhri baat par mrs shirazi faris ko baghor dekhne lagen. woh jannat se milne ke baad kuch had tak par sukoon tha magar aankhon mein abhi bhi fikar aur gham thehra huwa nazar aa raha tha.

"Aur tum ne kuch nahi kaha ?"

ruk kar, us ne nazar uthai. apni maa ko dekha. woh bachon ko sa Ishtiaq liye ab Usey dekh rahi thee. woh jzbz huwa.

un ka beta sab khamoshi se sunta raha hoga, aisa to nahi ho sakta tha lekin aisa ho chuka tha.

Usne plate se haath uthalya. pani ki bottle khaali kar ke side par rakh di.

"Mein usey kehna chahta tha woh mujhe maaf kar de, mere sath wapas aa jaye magar nahi keh saka."

sar utha kar aik baar phir un ki taraf dekhne laga.

"kyun nahi keh sake?pahad jitni aziyate bardasht karne wale ke liye chand lafz bhaari, chand lafz mushkil parh gye the ?"

"Sirf aik lafz se to sab theek nahi ho sakta mummy! paanch mahino ki aziyat hai. paanch minute mein to khatam nahi ho sakti."

uska lehja, uska andaaz, uski aawaz, ankhen aur tasurat. un ka dil dooba.

"woh mere kehne par kabhi wapas nahi aaye gi. aur zabardasti mein nahi karna chahta."

sar jukaye ab wo kalin ke resho par hath jamaye dahine hath ki ungli se lakeere kech raha tha. Amal ger iradi tha. Kate ka nishan, manfi aur jama fir jama fir jama se manfi ka nishan.

"Koshish bhi nahi ki aur radd ho jane par yakeen kar liya?" Unhone narmi se poocha.

"Maine use bahut dukh diye hai mummy!"

Uska sar jhuka, deewar gir khidkiyo se tirche ho kar Suraj ki roshni sidhe uske balo par parh rahi thi. Hazel aankhon ka rang ayaa, hasa ayaa dard bhi ayaa tha.

"Tum mudawa bhi to karna chahte ho?"

"Madawe se pehle ek baat ahem hai mummy! wo mujh par aitbaar kabhi nahi

Karegi."

Manfi, jama ka khel ab khtm ho chuka tha. Aur sar jhukaye gumsum betha tha. Pachhtawo me ghira hua. Naseeb aur kismat ke is anokhe khel ko samjhne ki koshish karta hua. Koi aur bhi to ho sakti thi jisse uska nikah hua hota Jannat kamal hi kyu? Dr. Mustafa ki nawasi hi kyu? Uski bila wajah ki nafrat aur advato ka samna Jannat kamal ke hisse me hi kyu aaya? Uski takleef badh gayi , nadamat badh gayi. Dard badh gaya.

Mrs. Shirazi ab kisi gehri soch me gum bilkul khamosh bethi thi. Wo bhi chup tha. Kehne ko mazid ab kuch naa raha tha. Sare raste masnud, deeware majbut, aur hasaas fir se kayam hone laga tha.

"Me khud ko kasoorwar samjhti hu, ye jante hue bhi ki wo mere mohsin Dr. Mustafa ki nawasi hai , maine uske liye ye mushkil rasta chuna!"

Faris wajdan aziyato me gum gaya.

"Tum shadi nahi karna chahte the. Maine tumhe majboor kiya, maine galat kiya, me sirf itna chahti thi. Tum maazi ko bhulakar apni nayi zindagi shuru karo, biwi aayegi bachche hoge to sab theek ho jayega lekin.. shayad me galat thi shayad me galat hu. zulm to phir zulm hai, aur chunke Mera faisla tha me khudko buri alzmh nahi samjhti."

"Mummy!" Usne be basi se kehna chaha magar unhon ne haath ke ishare se rok diya.

"Mujhe tum se yeh umeed nahi thi faris! bilkul bhi nahi thi."

woh sar jhuka gaya. biwi ke sath sath maa ka dil bhi buri tarah se dikha chuka tha.

"Aadil Ahmed ko address bhaij do. mein tumhari taraf aana chahti hoon"

unhon ne itnay achanak se kaha ke woh herat zada sa betha reh gaya. is ki maa yeh kya keh rahi theen ?

"Aap yahan ayen gi?"

"mein mazeed intzaar nahi kar sakti. mujhe apni bahu se milna hai. tumhare uske masle apni jagah magar ghar usne meri wajah se chorra hai ke auntie ko woh baatein pata chal gayi jo pata nahi chalni chahiye theen. jo mera rishta hai woh kisi soorat khatam nahi ho sakta."

usey shadeed herat mein mubtala kar ke unhon ne aqsa ko aawaz di. baithe baithe mulazma ko kapron ka order jari kya. zaroori samaan ki packing, khane ka intizam aan ki aan mein sab se paaya jane laga.

"Mausam kaisa hai?"

yahan wahan saare hukum naame jari kar ke unhon ne faris se poocha.

"Barish ki wajah se kuch thanda hai." Uske lab hille.

woh shock mein nahi tha, magar shock mein hi lag raha tha.

"Aap by air.."

"Nahi, mein by car hi aana chahoon gi."

unhon ne wazeh kiya.

"raste mein hum aqsa ke gao se bhi hote aaye ge. kyun aqsa?"

"jee jee bilkul!"

aqsa ki khushi se bhar poor aawaz.

jannat aapi aane wali thi, uski khushi alag, maa se milne ki khushi alag aur mrs shirazi ke sath itni bari gaadi mein safar karne ki alag.

"Safar lamba hai mummy!"

"Aisey safar lambe hi hote hain."

agle kayi lamhe woh khud par khamoshi taari kiye betha raha.

"aik request hai mummy !"

"Bolo!"

wo faris ki aankhon mein dukh, fikar mandi, kuch kho daine ka khauf wazeh tor par dekh saki thi.

woh jo keh raha tha usey suntey hue aik baar phir un ka dil dooba tha. baat khatam hui to unhon ne chand lamhey kuch soch kar asbat mein sar hila diya.

call disconect hui, chehra gayab huwa. balon mein ungelian chalate hue usne maiz par head down kar liya.

deewar geer khidkion ke us paar aasman par roi ke galoon jaisey baadal. Sooraj ki kirno se dakhte hue nazar aa rahay the.

❏❏❏