Chapter 34: •CHP-33•

•••

Raat ka jane kon sa pehar tha jab rone ki aawaz sun kar uski aankh khul gayi thi. aawaz jannat ki thi. woh taizi se uth kar bahar aaya tha. samne hi Dr. Mustafa usey baho mein bhare sidiyo par baithe the.

"woh zor se gira upar se uska sar phataa itna khoon beh raha tha baba"

hichkiyon ke beech baa-mushkil lafz ada karti, shiddat se roti jannat uske ain samne thi. dam sadhe woh apni jagah khada raha.

"Guriya! woh sirf aik haadsa tha. ghalti se huwa. Isme aap ka koi qasoor nahi."

Dr. Mustafa uski pusht sehlate hue usey samjha rahe the.

"Ammi maaregi. baba!"

khauf aur wehshat ang ang se ayaan thi. woh ba qaida kapkapa rahi thi.

"Baba! husnain mar gaya."

unhon ne bhinch kar usey khud se laga liya.

"Shhh! kuch nahi huwa. aap ne kuch nahi kya. yeh sirf khawab tha beta."

baat karte karte un ki nazar nim tareqi mein faris par pari.

"Nahi baba! ammi aayi thi. ammi maar rahi thi." woh Bilak Bilak kar roye ja rahi thi.

"Hum subah mouni ke ghar jayen ge. neelam se milne, park bhi jayen ge. khilone bhi khareedege"

parh parh kar us par phoonk rahe the.

"Abhi aap so jayen."

Uski pusht thapthapate woh usey behla rahay the. aur jane kya kuch shiddat se rote, bolte sakte woh yaka yak par sukoon hone lagi thi. faris darwaze mein hi khada unhen khamoshi se daikhta raha.

jab woh pursukoon ho kar so chuki to usey kamre mein sulaa kar woh neeche aagaye the. woh raahdaari mein khada tha.unhen kitcehn mein jata dekh kar unke peeche chala aaya.

"Sab kheriyat hai?"

uski samajh mein nahi aaya baat kaise shuru kare.

"Haan!"

pani peene ke baad unhon ne khaali glass maiz par rakhte hue gehra saans liya.

"Jannat theek hai?" usey jane kyun fikar ho rahee thi.

"Haan, woh theek hai, bas neend mein dar gayi thi."

agley kayi lamhoon tak taiz hawaon ka shor hi un ke mabain khamoshi mein mukhil hota raha. phir unhon ne lafzon mein usey sab bata diya. woh jannat ko kab aur yahan kyun laaye the. woh un ke sath kyun reh rahi thi. woh itna ro kyun rahi thi. faris unhen suntey hue apni jagah sakit sa khada tha. jannat ko dekh kar bilkul nahi lagta tha, woh kitney bade trauma se guzri thi. go ke woh bata rahey the ke child psychiatrist ke paas uska chhe mah tak ilaaj chalta raha tha aur ab woh pehley se bohat behtar thi magar phir bhi woh heran huwa tha.

"Jo bhi huwa, nadani mein huwa. magar meri beti jannat ko qasoor waar samjhti hai. bohat nafrat karti hai usse."

woh bol rahe the to lehjey mein dard pahuncha tha.

"Agar meri apni aulaad aisa na kar rahi hoti to shayad! mein kabhi maanta hi nahi ke maae bhi aisa kar sakti hain."

apni baat khatam kar ke woh karb se muskuraye aur uth khade hue.

"so jao kaafi raat ho chuki hai."

uska kandha thapthapa kar woh chale gaye magar faris wajdan kitni hi der tak apni jagah khada raha tha. uski aankhon mein jannat ka hanstaa muskurata chehra tha aur kaanon mein siskariyon ki aawaz goonj rahi thi.

Jin khush qismat tareen bachon ke sath woh apne naseeb ka mawazna kar ke khud ko bad qismat tareen grdanta tha, un mein aik hanstaa muskorata wujood to bilkul uske jaisa tha thukraya huwa nafratoon se ghira na mukammal raha aur adhoora sa. magar phir bhi khush mutmaen aur bohat par sukoon.

agley din woh phir se hashash bashaash chehre ke sath ghar ke main gate ke samne khadi thi. itni khush aur aankhon mein itna sara intzaar samoye.

jane kyun woh nazrain chura gaya. woh bhaag kar uske paas aayi.

ba aawaz buland itna lamba Good morning keh kar bag ki straps par girift jamaye uske agay agay chalne gayi. aur mamool ki tarah raste mein kahin se Mouni, kahin se Kaka, kahin se Tipu aur Shaka shaamil hote gaye. unhen bari herat hui ke aaj faris ne unhen sakht, talkh kuch kaha nahi tha aur nahi ouncha bolne se mana kar raha tha, woh shor karne par unhen rok bhi nahi raha tha. yeh aik anhoni thi, woh us anhoni par bare khush hue magar yeh khushi unhen ziyada der tak raas nah aayi.

khailte bhagte jannat is qader zor se giri ke kisi pathar se ragar kha kar apna ghatna chilwa baithi. takleef ki shiddat se cheekh cheekh kar aasman sar par utha liya.

"Mein to mar jaoon gi."

woh rote hue kahe ja rahi thi.

"Itni si chout lagne se koi nahi marta"

usne narmi se kaha.

"Mein to.. mein to mar jati hoon."

Faris apni jagah tham gaya thehr gaya. zara si nazrain utha kar usne jannat ko dekha. uski shiskiyan hichkiyon mein badal chuki thi. aansuo se chehra tar aur laal ho raha tha. dard sirf aik ghata chhilne ka nahi tha. dard sirf kisi aik zakham ka bhi nahi tha .

usne jaib se tissue nikaal kar uske ansoo saaf kiye, baazu se pakar kar uske kapre jhare. phir uski taraf pusht kiye panjoo ke bil jhuk gaya. aao ghar chalein. gardan mein bazu Hamael karti woh pusht par sawaar ho gayi. kuch der tak woh uski shiskiyan sunta raha, phir woh chup hogayi. mouni, kaka, shakka, Tipu barri hi sogwari ke aalam mein un ke peeche aa rahe the.

ghar pahonch kar zakham saaf kar ke saniplast lagane ke baad woh phir se. aur waisey hi chahekti phir rahi thi. jaise usey kabhi chout aayi hi nahi thi. aur woh gum sum betha usey daikhta reh gaya tha.

•••

Shirazi mension ke sarsabz ihate mein uske foot baal se khelti jannat kamaal, aur uska bhar poor sath deta woh manzar mukammal tha ke woh khush tha. woh tasweer hamesha hamesha ke liye uske album mein sajh gayi thi. muskurahat to woh hoti hai jo aankhon mein jhalakti hai, jo zindagi se bhar poor lagti hai to faris wajdan ki muskurahat Jamila dawood ke baad jaise ab zinda hogayi thi.

woh kam go tha magar woh jannat se baatein karne laga tha. uske ltifon par behne laga tha. woh uske kamre mein bhaag bhaag kar cheeze dekhti thi to woh usey rokta nahi tha. qeemti ashya ko chhairne ki koshish karti thi to usey dat-ta nahi tha aur Mudhat khush gawaar herat ke sath uska bdlao dekhatii rehti. kabhi muskura deti, kabhi faris ke tasurat se mehzooz hone lagti.

Jannat aik tang kothari mein thandhi hawa ke jhonke jaisi thi. uski mojoodgi mein Shirazi mension ke us allag thalk hisse mein jaise zindagi ki lehar daud jati.

woh jab bhi milne aati, apna bag nayi nayi cheezon se bhar kar lati hi. aik aik cheez nikaal kar faris ko dikhati jati. yeh balon par aise lagaye jate hain aur inhen aisey baandha jata hai. aur aisey lapeta aur jata hai. aur jata hai. uske paas to khilona make up kits bhi theen. faris ko un cheezon mein koi dilchaspi nahi thi magar general knowledge samajh kar woh be dili se hmm haan mein sar hilataa sunta jata.

Aik baar woh apni kisi neelo aapa se neel polish le kar aayi aur faris se apne dono hathon aur pair ke nakhun par lag wali. baad mein dr mustafa se bhi sad jhuka kar daant sun li. phir agle din woh nail polish uske paas amanat rakhwa kar gayi ke jab kabhi lagwani hogi to woh us ke paas aakar lagwa jayegi aur Mudhat kitni der tak hasti rahi thi.

"Rang achha hai. soch rahi hoon mein bhi tum se lagwa lu."

ankhon mein shararat samo kar usne kaha.

"Aap mujhe disturb kar rahi hain!"

Faris ne kitaab aage kar ke apna chehra mukammal chhupa liya. woh zair lab muskurate hue almaari mein uske istri shuda kapre rakhti rahi.

mulaqaat ki muddat aik mah pachees din thi aur shayad yeh uski zindagi ki sab se khoob soorat tareen muddat thi. yeh uska khayaal tha ke uski zindagi mein kuch shararat bhare rang, aur muskurahat bhari khusihyan jannat ki wajah se aayi thi. yeh uski aur uske doston ki sohbat ka assar tha ke ab usey inki baatein. sharartein, latefe aur kahaniyan samajh mein aane lagi thi. kisi mazahiya baat par ab usey hansi aa jati thi.

kisi anokhe qisse ko woh enjoy kar liya karta tha. ab jab woh chaand par ki  charkha kat-ti budiya ka zikar karte the to woh for maan laita tha. kaka ki tadpole machhliyan hain. Tipu ka ghora jab bara hoga to uske par niklege. phoolon par pariyan mandlati hain. darakhton ki jaroon mein un ke chhootey chhootey ghar hain aur shehar mein jal pariyan rehti hain.

woh bohat si pareshaniyon aur uljhano ke sath shirazi mension aaya tha magar ab usey apni mehroomion ko sochne ki fursat nahi millti thi. un bachon ki sangat mein woh jaise sab kuch bhool bhaal jata tha. shayad khushi aisi hi hoti hai jo Sabqa har gham, har ajiyat bhula deti hai. jo aane wale har din se mutaliq khush gumani mein jutla kar deti hai. yeh ehsas khoob soorat tha. woh us ehsas ke sath jeeney laga tha.

---- •♡• ----