Chapter 32: •CHP-31•

•••

pardo ki darz se jhankti Sooraj ki taiz roshni chehre par pari to usne kasmasa kar ankhen khol di thi. uth kar baithte hue usne tayrana nigah kamre mein dorhayi. woh Dr. mustafa ke guest room mein moujood tha. wall clock subah ke aath baja rahi thi. gehra saans le kar us ne apni peshani ko chuva. bukhaar ab nahi tha, tabiyat bhi pehley se kaafi had tak behtar thi.

woh uth kar wash room gaya. mun haath dhote hue usne khud ko aaiine mein dekha. hont khushk, be rang aur ankhon ke kinare surkh ho rahe the.

woh kamre mein wapas agaya. usey bed par baithe thori der hi guzri thi ke Dr mustafa aagaye. unhon ne light on kar di. khidki se parde bhi hata diye.

"Ab kaisi tabiyat hai?" usne sar utha kar unhen dekha.

"Behtar hai."

unhon ne uska muaina kiya. aur muaine ke baad usey daant bhi pilayi ke aakhir woh apni sehat ke hawaley se is qader laa parwa kyun ho jata hai. woh chup chaap sunta raha. unhon ne parhai se mutaliq poocha to hmm haan mein mukhtasir jawab deta woh side table lamp ko hi on off karta raha.

pandrah sala Saleem tray mein nashte ke lawazmaat sajaye andar aaya to woh uth kharray hue. tum nashta kar lo, phir medicine bhi leni hai. uske balon mein mohabbat se haath phertey woh Saleem ke sath bahar chalay gaye. kuch der tak woh be maqsad nigahein yahan wahan dorata raha, phir nashta karne laga. zehen mukhtalif socho ki aamajgah bana huwa tha. waswase aik baar phir sar uthane lagey the. usey Azam Shirazi ki aawaz atraaf mein gunjti mehsoos ho rahi thi.

mera sirf aik hi hota hai. Hammad shirazi mein kisi Faris Haroon ko nahi jaanta. pehley aik dastak hui phir doosri phir teesri chothi baar dastak kam aur thak thak ziyada thi.

usne soup peete hue be sakhta sar utha kar aawaz ki simt dekha. khidki ke sheeshe par nanha sa haath baj reh tha. phir chehra qareeb huwa. yaqeenan uske mutwajjah hone ki tasdeeq ki jarahi thi.

phir khidki ke sheeshe par lafz ubhar ne lagey.

'Get well soon!'

pyalaa haath mein liye woh apni jagah betha reh gaya. chand lamho ke baad khidki ka sheesha aik taraf slide huwa. do poniyo wala sar andar huwa, dhair sara tajassus liye shehad rang aankhen numaya huien. phir ghulaab ki

pankhari jaisey lab kuch herat aur Ishtiaq se wa hue.

ab woh usay dekh raha tha kuch herat se aur woh usey dekh rahi thi kuch tajassus se.

chokhat par apni position mazboot karte hue usne aik aik kar ke saare safaid phool andar farsh par pheink diye ke agar woh aisa na karti to phoolon ke kachoomar ke sath hi nazil hoti.

Doosre hi lamhe woh surkh frock samait khar ki phalang kar andar thi. foran phool samete gaye. aur aik istehqaq ke sath side table par rakhe khaali Gul daan mein daaley gaye. phir safaid coat ki jaib se fold kya huwa paper nikala gaya. phir us paper ko nanhi munni hathelion mein rakh kar is ke samne paish kya gaya. aik haath mein chamach liye, doosray haath mein soup ka pyalaa thaame 14 sala faris apni jagah patthar ka patthar usey abhi tak yeh runuma hone wali situation samajh mein nahi aayi thi.

qadmon ki aahat raahdaari mein gunji to bachi hawaas bakhta ki apne gulaabii labon par ungli rakh kar "shhh" karti bed ke neechey chhoup gayi.

"Mein abhi clinic ja raha hoon, phir mulaqaat hoti hai."

Dr. mustafa baat karte karte thitak kar ruk gaye. adh khuli khirdki se hoti hui un ki nigah side table tak gayi aur woh jaisey poori hekiyaat samajh gaye.

"Janna?"

Wahi khade khade unhon ne kuch khafgi se aawaz di. aur janna nami woh makhluq, jo bed ke neechey do zaano baithi thi, jhat se bol pari.

"Jee baba?" Doosre hi lamhe apni ghalti ka ehsas hotay hi usne dono haath labon par jama liye.

"Kahan hain aap?" yahan wahan dekhte ab woh poochh rahe the. kuch hi der mein woh bahar thi.

"Mein aap ke friend ko get well soon kehne aayi thi."

andaaz aisa tha jaisey yeh bohat zaroori kaam ho.

"Aap bahar chalein."

khirki band kar ke faris se moazrat chahte woh usey haath se pakar kar bahar le gaye faris ki nazar is teh kiye hue safhey par ja thehri jo farsh par guzara gaya tha. soup ka pyalaa rakh kar usne paper utha liya.

aasman, ghar, darakht, do parinde aur neechey likha tha 'Get well soon'

"Yeh bachi kon hai?"

Saleem bartan uthane aaya to usne poocha.

"Kon? jannat! woh dr. sahab ki nawasi hai jee!"

"Jannat?" zehen ke pardo par aik manzar lahraya.

judwa behan bhai aik jannat aur doosra shayad hassan, husnain ya Hussain tha. dr mustafa baar ha zikar karte rehte the. usey kuch yaad aaya.

khayalat jhatak kar woh uth khara huwa. uski tabiyat pehley se behtar thi so usne Shirazi mansion jane ka irada kar liya. Sweater coat pehan kar bahar aaya to dr. mustafa ki nawasi sofe par ondhe pari thi.

ronay ka shugal farmaya ja raha tha. Saleem poorey ghar ki safai ke baad halkan sa samne betha tha. Sabra Bua kitchen mein kaam kar rahi theen. maloom huwa faris ki wajah se dr mustafa ne jannat ki billi Saleem ko de di thi ke jab tak faris yahan hai to billi is ghar mein nahi rahegi aur jannat kamaal to apni billi ke baghair reh hi nahi sakti thi to bas aur jannat kamaal to aik billi baghair nahi us zulm par ehtijaj ho raha tha. woh chupkay se ghar se nikal gaya.

backpack  kandhe se latkaye jab woh baagh ke raste bairooni darwazese andar daakhil huwa to mali ko Hadayat deti Mudhat ki nazar achanak us par pari aur woh apni jagah ruk gayi.

nigehain aik hi maqam par thehr gayeen be yakeeni ka ta-assur herat mein aur herat ka ta-assur khushi mein badal gaya. ujlat mein qadam uthaati woh us ke paas aayi. uske haath aur phir usey kaandhon se pakar kar us ne dekha. us ke samne das gayarah saal ka chhota sa bacha nahi tha, chodan pandrah baras ka aik handsome teenager tha.

jadeed style se tarashe hue baal aaj bhi qadray lambe the. halka sa kham liye seedha peshani par karte they aur naik caller ko chhute the, dhoop mein baal sunehri lag rahe thw. Hazel aankhon mein kuch aur rangon ka izafah ho chuka tha. poorey teen saal baad usne shirazi mansion mein qadam rakha tha. woh usey dekh kar bohat khush ho rahi thi.

"Kaisi hain aap?" usne poocha. Mudhat nam aankhon se muskurayi.

"Mein to theek hoon, mujhe yaqeen nahi aa raha tum aagaye, tabiyat kaisi hai ab?"

"Theek hai, halka sa bukhaar tha bas."

Madhham si muskurahat uske labon par ubhar kar madoom hogayi. woh usey sath liye servant quarter ki taraf barr gayi. uska kamra hamesha ki tarah saaf suthra aur saliqey se set tha. Albata furniture aur kamre ki setting kuch had tak badal di gayi thi.

Bed, wardrobe, writing table, computer ke sath araishi qeemti ashya ki thi. mashriqi deewar geer almaari sath mein uska purana samaan hatta ke khilone, kitabe, trophies tak mehfooz theen .

aik tayranah nigah etraaf mein dorate woh be ta-assur chehre ke sath bed par ja betha. Mudhat usey baghore dekh rahi thi. aur kuch kuch fikar mand bhi thi.

"Mein tumahre liye kuch khane ka intizam karti hoon."

"Mein nashta kar chuka hoon, sirf aaraam karna chahta hoon."

Joote utaare, woh bed par daraaz ho chuka tha. Mudhat ne chand lamhon tak usey dekha phir asbat mein sar hilati chali gayi.

darwaaza band huwa to usne ankhen khol di. karvat badal kar pusht ke bal leta woh chhat ko dekhne laga.

us kamre ke sath Jamila dawood ki bohat si yade judi hui theen. aankhon ke kinare nam hue to usne lihaf sar pe tan liya, usey neend nahi aa rahi thi magar woh sona chahta tha. aur bohat der tak soya rehna chahta tha.

•••

Aaj friendship day tha. ab pata nahi beech beech ka friend ship day tha ya jannat ka khud sakhta tha. woh nahi jante the, bas woh unhen yeh samjhane aayi thi ke doston ko wish card zaroor dena chahiye. aur un ke itne saare doston mein usey sirf faris wajdan ka hi khayaal aaya tha.

Hatta ke baqi sab to safaid dadiyo (beard) waley, kuch ganjay, kuch bari Umar ke uncle aur kuch Umar Raseedah auntiya theen lekin faris un sab se mukhtalif tha magar nana masroof the. unhon ne uske sawalaat ke hmm haan mein jawab de kar bahar bhaij diya.

aur usne socha 'nana ki har cheez uski thi to phir nana ka best friend bhi uska apna huwa na ?'

jhat se kamre mein gayi. mehnat se card banaye. lawn se phool torey, backpack mein gift rakha aur baagh ke raste pahonch gayi Shirazi mansion.

uqbi bairooni deewar mein aik aahini darwaaza tha jo kabhi kabhar khula rehta tha, aik guard wahan har waqt mutayyan rehta tha. andar daakhil hone ke liye dr mustafa ka hawala hi kaafi tha. mulazim usey faris ke kamre ke darwaze tak chhor kar aaya.

usne darwaze par dastak di. kuch hi der mein darwaaza khul gaya. nili jeans par safaid rang ki ooni shirt mein malboos Faris wajdan samne khada tha aur ab kuch herat se usey dekh raha tha.

itne sawere aur is qader thand mein woh gulaabii frock par lamba coat Zaib tan kiye, tooty bag kandhe se lagaye, ooni manzar, keep aur dastane pehne samne khadi thi.

'Kya dr mustafa bhi sath aaye the?' Usne yahan wahan nigah dorhayi, magar woh kahin nahi the.

"Yeh tumhare liye hai." Jannat ne dono haath aage kar diye.

"Yeh kya hai?"

"Cards hain, baba ne bheje hain."

kuch istehqaq aur be thasha Ishtiaq se andar jhaa satke usne kaha tha. aik uljan bhari nazar jannat par daalte usne card le kar khole.

‘Nili Nili roshni kamre mein band hai mein kya karoon mujhe faris pasand hai’

- Dr. Mustafa

‘Peepal ke patte girte rahenge,

hum tum ko khat likhte rahen ge’

- Dr. Mustafa

Bachkani  likhai thi aur itne aetmaad ke sath har shair ke neeche dr mustafa likha huwa tha jaisey is tarah ke shair dr mustafa ke ilawa aur koi likh hi nahi sakta.

‘Dabbe mein dabba, dabbe mein cake

mera dost Faris, lakho mein aik!’

- Dr. Mustafa

woh sanjeeda tha, betasha sanjeeda magar na chahte hue bhi uske labon par muskurahat daud gayi thi.

"Yeh Dr mustafa ne likha hai?"

usne tasdeeq chahi.

"haan!"

"Magar yeh writing kitni kharab hai."

Jannat ko bura laga. usne bhawein sukoor kar apne nana ke best friend ko khafgi se dekha. aakhir yeh uski writing thi, koi mazaaq thori tha?

"Kaisi hai writing?"

woh usey bayan badalne ka mauqa de rahi thi.

"Bacchon jaisi!"

"Doctors aise hi likhte hain." samajh daari se bataya gaya.

"Oh!"

Faris ke lab gol hue.

"Sorry mujhe nahi pata tha."

"It's ok!"

shaan e be niyazi se kehte us ne aik baar phir andar jhankne ki koshish ki.

woh chaah rahi thi faris usey andar anay day taake woh uska wasee o areez kamrah dekh sake. magar woh deewar bana khara tha. sara interview yahin darwaze par kharray kharray lena chahta tha. tang aakar usne back qadmon mein rakha, baith kar khoola, phir uske andar se toote phoote tareeqe se pack Kiya huwa packet nikala. uth kar usey phir faris ki taraf badhaya.

"Ab yeh kya hai?"

"Gift hai!"

"Gift?"

Nasamjhi ke aalam mein usne packet le kar khola. teen chocolate baara rang barangi candies, chewing gum, chips ke packet. chili mili aur jane kya kuch zahir ho gaya. barre khule dil ki maalik thi dr mustafa ki nawasi. jis Umar mein bache apna bukhaar kisi ko na den, woh chocolate candies deti phir rahi thi. woh khasa mutasir huwa.

"Tum mujhe andar nahi aane doge?"

ukta kar usne poocha to faris ne darwaaza wa karte hue usey andar aane diya. bag utaar kar farsh par rakhti woh tajassus aur istehak  ke sath andar aagai. ghoom kar charon taraf dekha. kitna bara aur kitna pyara kamrah tha is khadus ka.

Mudhat samne hi carpet par baithi shirt par button laga rhi thi. usey dekh kar muskarayi.

"Arrey yeh nanhi pari kahan se aayi?"

Jannat ke gaal laal tamatar hue. woh batana chahti thi pariya to hamesha urr kar aati hain magar woh chal kar aayi. bare adab se woh uske paas gayi. salam Kiya, chand lamho ke liye tak kar baithi rahi. aakhir yeh bhi to thi batana maqsood tha ke woh mohazab maheman hai taa ke uske aane jane par hargiz pabandi na lagai jaye.

aik nazar nana ke dost ko dekha jo samne writing table ki aaraam da kursi par betha tha aur usey hi dekh raha tha.

'Kya ab is ki maheman nawazi nahi hogi?' usne ankhen matka kar yahan wahan dekha. aik jagah tak kar baithna kitna mushkil kaam tha. yeh koi nanhi pari se puchta.

"Mujhe Mango juice pasand hai."

Chand lamho ki khamoshi ke baad usne faris ko bataya. sui se tanka lagati Mudhat has di.

faris ne sar utha kar usey sawalia nazron se dekha. Mudhat ne ishara kiya to woh baithy baithy uski taraf jhuka .

"Indirectly woh tum se keh rahi hai meri maheman nawazi karo."

Mudhat ne dabi dabi muskurahat ke sath sargoshi mein bataya to uski bhanwain suker gayi.

"Kya sab hi bacche aisey hote hain?"

"kaisey?" Mudhat ne bhi uska andaaz apnaya.

"Jaisi yeh hai."

"Kaisi hai?" Mudhat ki aankhon mein shararat chamki.

"Itni friend li kyun ho rahi hai mujh se?" usne ulta sawal kiya.

"Ho sakta hai woh tum se dosti karna chahti ho."

Faris ki aankhon mein herat utri.

"Mujh se, dosti ?"

un ki khusar phusar ke douran kab jannat kamaal uth kar rack  tak gayi, kab usne gulaabii rang ka journal, coloring book samajh kar bahar nikala, aur kab us par kitaaben giri, kuch pata na chala. yeh to jab woh sar pakar kar halka sa chikhi to faris ko hosh aaya. uth kar taizi se uski taraf bhaga.

"Yeh kya kar diya."

woh gussa dikhnana bhi chahta tha aur dr mustafa ki wajah se dikha bhi nahi pa raha tha.

"Y-Yeh khud hi gir gayeen."  wazahati andaaz bhi kamaal ka tha.

"Khud se kaisey gir gayi?" woh bahrka.

"Mein ne to yeh pink wala nikala tha."

Yani gulaabii journal nikaalne par jo baqi saari kitabw been giri, woh apni marzi aur apne shoq se giri, jannat kamaal ka koi amal dakhal nahi.

"Aaram se wahan ja kar betho."

usne journal le kar samne flour cushion ki taraf ishara kiya. aur woh waqai mein wahan ja kar baith gayi. saari kitabe samait kar mura to woh flour cushion par ghutno ke bal khadi maiz par rakhe gadiyo aur ghodon ke mujasmo ko chairr rahi thi.

"Haath mat lagao usey"

foran se lapak kar jannat kamaal ko wahan se daur hataya gaya. woh bara heran hui ke 'haath lagane se kya ho ga ?' ab woh glass almaari ke sath lagi khadi thi aur is mein Nafasat se rakhi trophies ko dekh rahi thi.

Nana theek kehte the. uske paas kitni achi cheeze thi. bohat mukhtalif heran kun aur Khoobsurat.

usey laga us kamre mein duniya ki har shai mojood hai.

kursi par charh kar khidki se bahir shirazi mansion ko dekhte uski masoom ankhen pheli.

"kitna bara ghar hai tumhara."

Mudhat ne be sakhta faris ko dekha. woh be dhayani mein uske diye gaye phoolon ko Gul daan mein rakhta ja raha tha. usne kuch sunaya nahi, magar radd amal ka izhaar nahi kya tha.

"Kya yeh tumhari mamma hain?"

ab woh Mudhat ke bare mein usse pooch rahi thi.

"Mein is ke liye kuch le kar aati hoon!"

isse pehle ke jannat ke sawal koi bad mazghi peda kare, Mudhat uski shirt rakh kar uth gayi.

"Aap isey bhi sath hi le jaye"

woh kaafi se ziyada jhunjhlaya huwa lag raha tha. Mudhat hash di, le jati agar woh meri maheman hoti tab.

Mudhat chali gayi to woh bhanwain sukoor jannat ki taraf mura. woh sar uthaye asbaat ka jaiza le rahi thi ke is ke nana ka dost kitna lamba tha aur woh is se qad mein kitni choti thi.

"Kya tumhare paas colours nahi hain?"

kuch der baad usne poocha.

"Nahi."

"Colouring books ?"

"Nahi."

"Khilone bhi nahi hain?"

woh bohat mayoos nazar aayi.

ghutnon par haath rakhe us par jhuka.

"Mein ladka hoon, mein dolls se nahi khelta."

"Mein bhi dolls se nahi khelti, mujhe cars achhi lagti hain. mere paas aik bohat barri tooty bhi. Aur tom bhi mere pas jerry wala tumhare paas nahi hai?"

Gehra saans laita woh uske samne baith gaya. pata nahi Mudhat itni der kyun lgarhi thi. aik glass Mango juice aur cake is mein kon sa saal lag jane the?

"Nahi mere paas aisa kuch nahi hai."

"Aw.."

Nanhi pari ko afsos huwa.

"To mein tumhen tom de dugi."

"Mujhe tom nahi chahiye." usne tahammul se samjhaya.

"Jerry to mere paas hai hi nahi."

"Mujhe jerry bhi nahi chahiye." woh jhunjhlaya.

"To kya chahiye?"

"Kuch nahi chahiye mujhe. mein khilonon se nahi kheltaa ab."

agle chand lamhoon tak woh palken jhapakaye bina uski aankhon mein dekhatii rahi. phir usne aqab mein ishara kya.

"To mein phir tumhari woh car le lu, wo wahan rakhi hai. red colour wali."

faris ne murr kar surkh rang ki us nanhi model car ko dekha jis mein uski jaan atki thi aur yeh koi khilona car nahi thi.

"Nahi, hargiz nahi."

"Ok!"

Uske kandhe jhuk gaye. nana ka dost, nana jaisa nahi tha.

"Tum yahan aaraam se betho."

baazu se pakar kar usey aik baar phir flour cushion par bithaya gaya.

"Yahan se hilna nahi hai, aur kisi cheez ko mat chhair na! mein abhi aata hoon!"

"Ok"

Usne haami bhar li. lekin amal nahi kiya. kuch hi der baad tray hathon mein liye wo andar aaya to woh khidki ki chokhat par charhi deewar par laga koi sticker utaar rahi thi.

"Mein ne mana kiya tha tumhe"

tray carpet par rakhta woh aik baar phir is ke sir pay tha.

"Bas thora sa reh gaya hai, abhi utar jaye ga."

woh suni un suni karta usay baazuon se pakar kar zabardasti neeche utaar chuka tha. kuch hi der baad woh uske samne baithi thi. Mango juice hathon mein tha.

aik ghoont bharti thi, das baatein karti thi, phir thora sa cake kutarti thi, uske baad phir baatein karti thi. uske samne aalti paalti maare woh sabr ki kari azmaish se guzar raha tha.

"Baatein baad mein karna, pehlay isey khatam karo.!"

woh is museebat ko jald az jald dr. mustafa ke paas chhor kar aana chahta tha.

"Baba kehte hain, aaraam se khana chahiye."

woh ulta usey samjhane lag gayi. apne balon mein haath pherte woh carpet par dhay gaya. goya haar maan li ke bhallay se do teen ghanton mein khatam karo magar khamoshi se karo magar nahi usne kisi maryam urf mouni ke phisal kar girne se le kar kisi kaka ki cycle totnw aur kisi neelo aapa ki murghi chori hone tak ke tamam waqeat suna diye.

usne yeh bhi bataya ke jab siyah rang ki itni barri barri gaadiya uske ghar mein aati hain to woh sadam par khade ho kar haath bhi hilati hai. aik baar kisi sahab ne gaadi ka sheesha neeche kar ke usey toffee bhi di thi.

aur aik woh koi alizey shirazi woh maheena bhar is ke itne saare bare ghar mein reh kar gayi thi. aur yahan wahan har waqt ghhoomti rehti thi. Basti se gaon khaiton aur bazaar mein bhi aur uske galey mein aik camera tha. woh har kisi ki tasweer mein khinchti rehti thi aur usey to woh zara sa bhi achi nahi lagi thi.

choonti jitni bhi nahi! kisi alizey shirazi ka zikr karte usne mun ke zawiye kayi baar bigadhe. woh kaisey chalti thi, aur

kaisey bolti thi, aur kaisey dekhatii thi. aur kaisey woh aik baar dhalwan raste se utarte phisal gayi thi. aur phir usne, aur mouni, kaka aur shaka waghera sab ne woh manzar apni aankhon se dekha tha aur unhen kitna maza aaya tha aur woh kitna khush hue the.

Faris apna sar pakde betha tha.

aur aik baar aik lamba sa koi larka bhi aaya tha. Wo faris se bhi lamba tha aur jab woh aaya tha to uske agay peeche bohat si cars theen. aur phir uske itne bade ghar mein raat ko roshniyan hi roshniyan thi.

aur dawat par uske baba bhi gaye the. aur aur.. na baatein khatam horahee theen, nah juice aur cake.

"Yeh mein pi lon?" Tang aakar is ne poocha.

aur jannat to thi hi khule dil wali. jhat se glass aage kar diya. aik hi saans mein glass khaali karta, cake ke tukre mun mein dalta, usey baazu se pakar kar uthata, doosre haath mein uska bag leta, kuch hi der mein woh bahar tha.

"Chalo, tumahare ghar chalein."

jannat jo apne aadhe juice aur poorey cake ke gham se abhi bahar nahi nikli thi, is baat par khil uthi.

"haan haan chalo."

woh barri khushi se bhagi. halanke Faris ka kamra usey bohat achhe se dekha tha ke aisi rang barangi munfarid cheeze bhi kya roz ko milti hain. (chalo phir kabhi sahi! )

apne baazu phelaaye woh chiriya ki tarah chahekti sar sabz baagh ke raste, ghaas ke andar se bhaagti ja rahi thi. aur uska tooty bag haath mein liye zara si khafgi ke sath faris wajdan uske peeche tha.

jis tarah woh bhaag rahi thi, baazu phela kar gol gol ghhoomti hui, to usey laga woh giregi. aur wohi huwa kisi patthar se atak kar woh is qader mazahiya andaaz mein uchhal kar giri ke uski hansi chhut gayi.

Mudhat jo uska ooni muffler aur long coat haath mein liye uske peeche aayi thi thitak kar ruk gayi.

'Faris hash raha tha?' woh sakit hi apni jagah khadi reh gayi. usne faris wajdan ko is tarah hanste hue pehli baar dekha tha pehli baar!

Jannat ne usey haste dekha to sar neeche karte phoot phoot kar ro di.

"Oh! I'm so sorry!"

usey yaka yak ehsas huwa to baa-mushkil hansi zabt karta taizi se us ke aaya baazu se pakar kar usey uthana chaha to batak kar apna bazo chhurati woh aur zor se rone lagi.

"kya bohat zor se chout aayi hai?" Hasi zabt kar ke bohat mushkil se poocha.

dono haath paon par rakhe woh chillayi

"Tum mujh par hanse." asal gham yeh tha.

"Tum, tum mujh pe hanse"

"Mein tum par nahi hansa woh asal mein.."

Baar baar woh manzar aankhon mein aa raha tha aur na chahte hue bhi hansi aaye jarahi thi.

shehad rang aankhon mein dhair saare ansoo liye woh yu roi thi jaisey us par zulm ke pahad torrey gaye ho.

"Achha, I'm sorry. mujhe hasna nahi chahiye tha." usne foran hi ghalti ka aitraaf kar liya.

"Magar tum tum hanse mein baba ko batau gi tum hanse!"

Faris is iftaad par buri tarah se ghabra gaya.

"Mein sorry kar to raha hoon."

woh nafi mein sir hilati gayi. yani sorry se kaam nahi chalega.

kuch soch kar faris ne pockets se wallet nikala, choti choti cheezon ke liye uski deewangi to apne kamre mein hi dekh chuka tha. Wallet ke sath latkti do talwaro mein se aik talwar usne alag kar ke jannat ki taraf barhai. woh jo bari dil jamee se roney ka shugal farma rahi thi, ruk gayi.

Aankhon mein dhair saari nami liye ghutney se haath hata kar zara aage hui. saaray dard bhulae is nanhi si talwar ko baghor dekhne lagi. phir haath barha kar utha liya.

"Yeh ab meri hai?"

"Haan!"

"Pakka meri hai ?"

"Pakka tumhari hai!"

"Tum kaka ki terhan wapas to nahi loge?"

"Nahi, mein kaka ki tarah wapas nahi luga."

"Pakka nahi loge?"

"Pakka nahi luga!"

"Aur agar liya to ?"

"Nahi luga bhae!"

usne tahammul se kaha. warna jee chaah raha tha, apne baal noch le.

aur woh uth gayi. talwar ko muthi mein dabaye. aankhon mein dhair sara Ishtiaq liye.

"Tumhe chout to nahi aayi?" usne poocha.

"Nahi to!"

woh ankhen ragar kar saaf karte hue boli.

"Aur itna rona dhona sirf is liye tha ke woh hansa?"

uska haath thame woh usey sadak ki taraf le aaya. kinare par ahistagi se qadam uthate woh bas zara sa hi aage chalay the ke sadak ke us paar bachon ka aik tola guzar raha tha.

Jannat ko dekhte hi haath hilaate shor machane lage.

"Tipu, kaka,  mouni mere friends!"

Apna haath chhura kar zor se chillate us ne faris ko bataya.

"Ghar chalo." woh usey baazu se pakde khenchte hue sath le jane laga. aur woh wahein se chalati apne doston ko jane kya kuch batati rahi.

woh ghar puhanche to dr mustafa lawn mein pareshan khade the. Saleem usey yahan wahan talaash karne ke baad thaka haara abhi lota tha, unhen dekhte hi chilla utha.

"Dr. Sahab! yeh rahi jannat"

"Yeh kahan thi?" woh heran hue they.

"kahan ho sakti thi?" Faris ne bhanwain sookde.

un ka mun herat se khula, woh tan tanha Shirazi mansion pahonch gayi thi? goke baagh ka rasta mehfooz tha aur shirazi mansion bhi kuch ziyada doori par nahi tha magar phir bhi jannat ka yeh karnama unhen heran aur fikar mand kar gaya tha.

"Mein ne aap se poocha to tha."

Dr.mustafa us par khafa hue to woh batane lagi.

"Mein ne kaha tha, haan jayege, ye nahi kaha tha aap akeli chali jaye?"

"Mein bilkul khamoshi se gayi thi aaram aaram road to bilkul nahi gayi baag se gyi thi baba! woh jo bohat lambe uncle haina jin ki itni barri barri munche hain. woh jo darwaze par khade hotey hain har waqt"

woh chaah rahi thi dr mustafa takid mein sar hilaye taakay woh baat aage

bhadaye magar woh peshani masle ja rahe they.

"haan! haan."

"Woh bohat acche hain. mein ne un se kaha. mein dr. mustafa ki beti hoon. unhon ne mujhe andar jane diya. mein ne teen baar darwaaza knock kiya tha. teen baar!"

barri samajhdaari se haath hila hila kar wazahaten deti woh intahaa ki masoom aur cute lagi.

"Tumhe tang to nahi kya is ne?"

dr mustafa ne phir usse poocha. woh kehna chahta tha, haan bohat magar chunke dr mustafa ki nawasi thi so az raah murawwat nifi mein sar hila diya.

"shuqar hai."

woh usey baazu se pakde andar le aaye.

"Shaam ka khana hamare sath! ab yahan sukoon se betho."

unhon ne faisla suna diya magar majaal hai jo unki nawasi ne lik ghari bhi usey sukoon se bethne diya ho. woh dahp dahp sidiya chadhti oopar jati thi, aur jitne khilone baazuon mein sama sakte thay unhen laa kar uske samne dhair kar deti thi. woh usey batana chahti thi maheman nawazi aisi hoti hai. cheeze aise dikhayi jati hain. woh dr mustafa ko be basi se daikhta to woh hash dete.

"Aap to bohat enjoy kar rahe hain."

"Haan bohat!"

woh uske tasurat se kaafi mehfooz hue thay. kabhi ulajhta, kabhi uktahat ka muzahira karta. aur kabhi jannat ki kisi baat par hmm haan mein sar hilata woh unhen acha lag raha tha. woh zair lab

muskuratay usey dekhe ja rahe the.

rang bharne wali kitabe, kahaniyan,  stickers aur jane kya kya woh usey utha utha kar dikha rahi thi. Saleem guzarte hue thandhi aahein bharta ke phir sara bakhera usey hi to sametna tha.

Sabra bua ko khane ki Hadayat dete dr mustafa zaroori call attend karne oopar chalay gaye. wapas aaye to Saleem samait faris wajdan bhi blocks jor jor kar jannat ke liye doll house ki tayari mein nazar aaye.

manual match khol kar andaza lagate aik deewar ko doosri deewar se jorhte aur jannat ko hatta ila makaan imarat ki bunyaad se daur rakhne ki koshish karte woh kisi mahaaz ka hissa lagey.

"Mujhe bhi help karni hai." Wo shhor macha rahi thi.

"Tum tor dogi."

dono ne usey ghour kar pare hataya tha.

"Yeh mera house hai."  kamar par haath lagaye jatane lagi. koi response nah mila to ghoom kar doosri taraf aayi.

"Yeh sab mere blocks hain! yeh mere baba ka ghar hai."

Uski suni un suni karte woh dono barri yaksoi se jute rahe

"Mein bol rahi hoon?" dobara shor machaya.

"Mein baba ko tumhari shikayat lagaun gi." usne faris ko dhamkaya.

"Yeh shuru se aisi hai?"

ukta kar usne Saleem se poocha. uska khayaal tha woh dr mustafa ke laad pyar se hi bigad gayi hogi.

"Nah karo jee. iski to aawaz bhi nahi nikalti thi ab to..."

Saleem ne foran kaanon ko haath lagaya. phir hansa.

"Ronaqe lagi rehti hai jee. dr sahab to bara bore karte hain."

khoob soorat doll house ki taamer shaam ke 6 bajey tak mukammal hui to usay utha kar oopar uske kamre mein rakhne gaye aur aik baar phir jannat ne usey apni aik aik cheez dikhayi. aur is baar Faris wajdan ke andaaz mein jhalahat nahi thi. woh khamoshi se sun raha tha, aur uski di gayi ashya ko khol kar dekh bhi raha tha. andaaz mein ab ke tajassus nahi tha magar uktahat bhi nahi rahi thi.

shaam ka khana khanay ke baad woh aatish daan ke samne lounge mein baith gaye the. Double sofe par lehaaf mein dapki, wo apne nana ke seene se lipti Jannat kamaal to wahein sogaie thi magar woh raat gaye tak baatein karte

jagte rahe the.

---- •♡• ----