Chapter 31: •CHP-30•

کِسٹ نمبر 6

•••

dharti par khizaa utri hui thi. darakhto ke pattay jhar rahe the. hanza gehra khushk lag raha tha. har shai rang badal rahi thi. aik rang is ka bhi tha. safedi mein ghulta siyahi mein badalta, nafrat se uljhta rishto mein bhatakta, uska apna rang.

Rishta khoon ka tha, magar khoon se ziyada ahem dada ke liye izzat aur Waqar tha. doulat aur status tha. shohrat aur Naik nami thi. woh har kaam ba qaida mansooba bandi ke tehat karte the, aur har chaal mein apni Maslehat ko muqaddam rakhte the.

Jamila dawood ke jane ke teesre din unhon ne uska dakhla boarding school karwa diya tha. mamlat pehlay se tay the, sar anjam ab diye ja rahe the.

Jamila ki judai, phir ajnabi jagah par ajnabi mahol mein adjust hona uske liye hargiz aasaan nahi tha. nafsiati tor par bohat disturb ho gaya tha. padhai mein uski karkardagi sifar ho kar reh gayi thi.

woh apne class fellows se baat nahi karta tha. apne teachers ko jawab nahi deta tha. kayi baar head office mein uski haazri ho chuki thi. kayi baar uske ghar rabta kya ja chuka tha.

principal yaqeenan Azam Shirazi ke janne wale the, woh uske samne hi call karte, baat karte masla batate. kuch sunte, kuch samjhte aur phone band karte hi usey jane ka ishara kar dete. aur phir wohi routine wo hi aziat, wohi ghutan, wohi khauf aur wehshat bhara ehsas.

woh sambhal jaye ga, yeh sab ka khayaal tha wo sambhal nahi raha tha, yeh aik haqeeqat thi. aur is haqeeqat tak pounchne ki koshish koi nahi kar raha tha.

andar hi andar ghatte marte hue usne faisla kar liya, woh Shirazi mansion ab kabhi nahi jayega. Holidays mein bhi nahi. zindagi aisi hai to phir aisi hi sahi, woh bhi jaise zid par utar aaya tha.

itwaar ki aik subah Agha Ali aaya to uske sath Dr. mustafa bhi the. poore teen hafton ke baad unhe dekh raha tha. mamool ke bar aks usne koi garam joshi nahi dikhayi thi, na haath milaya, nah uth kar un ke gale laga. aik faasla qaim rakhe woh faasle par hi khada raha tha.

woh sarsabz lawn mein bench par baith gaye the. samne school ki imarat aur harey bharay darakhton se ghirey khail ke maidan tha. Bacche khailte kudte phir rahe the.

"Aap yahan kyun aaye?"

Wohi liya diya sa andaaz ke mein to aap ko jaanta hi nahi.

"Kya mein nahi aa sakta?"

unhon ne herat ka izhaar Kiya.

"Nahi!"

apne sweeter ki pockets mein usne muthiyaan bhinch li.

labo par madham si muskurahat liye woh jhuk kar usey baghore dekhne lagey. woh pehle se bohat se ziyada kamzor lag raha tha. rangat zard thi. hont khushk aur be rang the. yaqeenan woh kayi dinon tak bimaar raha tha.

"Hum dono best friends hain faris!" unhon ne yaad dilaya.

"Hamari dosti ab khatam!"

"Dosti khatam?" Dr. mustafa ko sadma pouncha.

"Ham ne to itne wade kiye the yaar! friend for ever hai ham."

bhanwain sukde woh zara si khafgi ke sath kahi aur dekhne laga. goya dosti baghair kisi wajah ke khatam ki ja rahi. magar wajah thi. dr. mustafa samajh chuke the wajah kya thi. woh kyun is andaaz se baat kar raha tha.

kyun aik faasla sabr qarar rakhe hue tha. woh is khauf ko mehsoos kar satke the jo kam Umri mein is ke andar jarr pakar

raha tha. kho dene ka ehsas tanha reh jane ka khadsha bhichar jane ka gham

unhen dukh huwa.

woh kaafi der tak uske paas baithe rahe. idhar udhar ki baatein karte use uljhaate rahe. kisi baat par khud hans parte, kisi baat par hansaney ki koshish karte magar woh sada ka ziddi rukh more bas unhen khafgi dekhata raha.

"Agle hafte mulaqaat hogi?" jane se pehlay unhon ne kaha.

"Mein ghar nahi aauga." usne bhi wazeh kar diya.

"Tum na aao bhai, ham to aate rahe ge."

woh keh kar gaye aur apni baat par qaim bhi rahe. har wake and par woh agha Ali ke hamrah usse milne aa jate. pandrah bees minute woh behas karte hue usey gussa dilate rehte ke jo dosti usne sardhe 6 saal ki Umar mein aik 60 sala buddhe se ki thi woh kisi bhi soorat khatam nahi ho sakti.

Uske baad woh bolte rehte aur woh sunta rehta. kabhi lar parta kabhi rone lagta kabhi gussa dikhata aur kabhi un ke baazuon mein simat jata.

"Mujhe woh bohat yaad aati hain." uski ankhen aanson se mukammal bhar jati. naak, gaal surkh hone lagte.

"Woh bhi tumhe bohat yaad karti hongi."

"Nahi." woh nafi mein sar hilata.

"Woh mujhe bhool chuki hain."

"Jo pyar karte hain, woh kabhi nahi bulte."

"Unhen mujh se pyar nahi tha, is liye woh mujhe chhor kar chali gayeen."

"Tumhe un ki majboori ko samjhna chahiye beta!"

"Woh Hammad mummy hain, sirf aur sirf Hamad ki mummy hain."

Zehen mein sirf aik hi baat reh gayi thi ke agar woh uski mummy hoti to uske paas hoti. dr mustafa gehri saans le kar reh jate. unhon ne baarha koshish ki ke kisi tarah Jamila dawood se rabta kar mumkin ho sake magar woh nakaam rahe the.

waqt ke sath sath kuch had tak woh samajh gaya. samjh bhi gaya magar Jamila dawood ke jane se jo khalaa uski zindagi mein peda huwa woh kisi soorat poora na ho saka. zehen bhatakne ke liye aik masrufiyat darkaar thi aur usne khud ko taleemi sar garmion mein masroof kar liya.

woh parhai mein pehle sirf achha tha magar ab top karne laga. har muqable mein uski pehli position hoti horse riding, swimming, hockey, Volleyball, tennis gharz woh har tarah ke khelo mein hissa laine laga tha.

woh zindagi ko mehsoos karta tha ya nahi magar woh zindagi ki taraf wapas zaroor palat gaya tha aur un tamam tar misbet tabdeelion ka sarf Dr. mustafa ke sar jata tha, agar woh nahi hote to woh aisa nahi hota.

uski shakhsiyat mein itna thehrao itni lagan aur mehnat ke rang na hote. woh khudtarsi ka shikaar ho kar kab ka apne track se bhatak chuka hota.

Uski har kamiyabi par dr mustafa be intahaa khushi mehsoos kya karte the. woh uski trophies ko chhu kar dekhte, certificate hathon mein le kar mehsoos karte, album ke safhe palate jate, jo tasaveer khenchi gayi hoten, un mein se koi aik apne paas rakh lete.

apni choti badi har baat un se share karne wala faris wajdan kabhi bhi unhe apni kamyabion se milne wali aziat se aaga hi nahi day saka tha. woh inhen kabhi nahi bta saka tha. usay trophies sulagtey hue angaron jaisi lagti hain aur jab woh unhen hathon mein laita hai to is ke haath jal jate hain.

Jab school ki intizamia us par fakhr karte hue Asnad se nawaztee hai to is par likha aadha adhoora naam usey gaal par thapar ki tarah lagta hai. jab usay aik yateem ke tor par paish kar ke is ki mehnat aur lagan ko saraha jata hai to woh dhool matti khaak ho kar Shirazi khandan ke qadmon mein kaise bikhar jata hai.

woh unhen kabhi nahi bta saka tha. kabhi nahi. aik jung khud apni zaat se thi to doosri jung usay Azam Shirazi se lrhni par rahi thi. woh hanooz apne faislon par mutmaeen the, kabhi kabhar milne aa jate to itne sakht lafzon mein aur is qader hiqarat se baat karte ke woh zameen ki tahne mein utar kar reh jata. usay har inayat aik khairaat aur har meharbani aik bheek ki tarah lagti .

Aarzoo Jahangir ka zikar har mulaqaat ki bunyaad hota. woh uske haliya daur ke Scandal unglio par ginwate. uske karname aik aik kar ke manaye jatay.

kabhi kisi siyasat daan ke sath affair hai to kabhi kisi barri karobari shakhsiyat ke sath koi chakkar hai. aaj kal woh teesri shadi ki tayario mein thi. kayi baar uske Europe, italy aur france mein mukhtasir maghribi kapdo mein ghoomne phirne ki tasaveer dikhata hue woh usey jata chuke they ke yeh aurat uski maa hai aur is jaisi aurat ka beta hona hi uska sab se bada gunah hai.

aur aisa karte hue woh aik baar bhi is ki aankhon mein nahi dekhte the, uske tasurat ko nahi jhanchte the. woh un ki har baat khamoshi se sun kar uth jata tha. band kamre mein uski nazrain kaafi der tak jhuki rhtin. lab bheenche rehte, aur aankhon mein thehri hui nami gaal par phisalne lagti.

Azam shirazi usey apne roab mein rakhna chahte the. woh itna kamzor ho ke Shirazi khandan ke samne sar utha kar baat nah kar sake. usey apna aap kamtar lagey, usey apni pehchan se nafrat ho. magar woh un ke khauf ya roab mein aane ke bajaye nafrat aur intiqam ke sholon mein lapat jata tha.

woh unhen waisi hi takleef dena chahta tha jaisi woh usey dete the woh bhi unhen todna chahta tha. un ka ghuroor, un ka taqqabur, un ka ghamand woh bhi un se rishte chinna chahta tha. unko tanha karna chahta tha.

"Jis din tum ne mere pote se takkar laine ki koshish ki to yaad rakhna, wo din tumhari zindagi ka aakhri din hoga."

Tareekh paanch November thi. uski 14th saalgirah ka din yeh din usey koi khushi nahi deta tha magar us din Azam shirazi ke yeh alfaaz usey bohat bada gham de gaye they. kitni hi der tak woh sakit sa apni jagah khada raha tha. herat dhamki ki nahi thi. herat iski thi ke woh usey zinda samajte the. kya wo itna zinda tha

ke usey yeh dhamki di jati?

"Pehle aap confirm kar len, aap kis se milne aaye hain? faris Haroon se ya faris wajdan se?"

zabt kar ke usne shadeed ghusse ke aalam mein poocha tha. Hawaa ke zor se parday lehra utthey, khidkiyo ke pitt hille, bahar kahin aahat bhi hui. bachon ka shor madoom hone laga.

agha Ali aur guards bhi Adamm ho gaye. tareqi mein roshni ya to is par thi ya phir Azam Shirazi ke wujood par jo aik shaan se sofe par baithe the.

lekin woh shaan aur Tamkinat , roab aur dabdaba, woh aankhon ki sakhti aur patharile tasurat is aik sawal se hawa hue the woh sawal nahi, sulagta huwa aik angara tha jo kayi haqeqteen aashkaar kar taa jala kar raakh kar gaya tha.

Azam shirazi ki patharili nigahen uske chehre par jami rahi. aur woh muthhiya bheenche un ki aankhon mein ankhen daaley khada raha.

"Mera sirf aik hi pota hai. Hammad shirazi, mein kisi faris haroon ko nahi jaanta."

Woh apni jagah se uth khade hue. walit se kuch raqam nikaal kar maiz par uchali aur shawl durust karte apne guards ke hamrah bahar nikal gaye.

aur woh aankhon mein karb liye kitni hi der tak farsh par bikhare noto ko daikhta raha. yeh uski auqaat thi. woh usey yahi auqaat dikhane aate the. woh dhool, khaak matti tha.

Uski jagah qadmon mein thi. ya shayad qadmon se bhi neeche paise uthane ke liye jhukna zaroori tha. aur woh hamesha usey jukaye rakhna chahte the.

Agha Ali be basi se usey dekh raha tha. woh usse kuch kehna chahta tasalii ke do bol hi sahi magar woh khud mulazim tha. ziyada se ziyada kya keh sakta tha? kis baat ki tasalii de sakta tha? sar jukaye woh khamoshi se chala gaya. us ke jane tak faris sapat chehre ke sath khara raha tha. jaise hi darwaaza band huwa, uske munjamid wujood par darare parne lagi.

pehlay ankhen nam huien, phir gaal tar hue. woh siskte hue ghutnon ke bal jhuk gaya. rote hue apne aap mein simat kar bikhar gaya.

nafrat kya hoti hai? woh pehle nahi jaanta tha. nafrat kaisi hoti hai? woh ab jaan gaya tha. Jamila dawod mohabbat aik dhaal thi. Azam shirazi ki nafrat aik aag. Jab tak dhaal thi, woh aag se mehfooz raha tha aur jab dhaal nahi rahi thi to woh raakh hone laga tha.

mutala abr alood tha. thandhi hawae chal rahi theen. rim jhim barasti barish ka nzara karta woh khidki ke samne stool par betha tha. Uski do mah ki chuttiyan ho rahi theen. Agha Ali usey laine aaya tha. hamesha ki tarah jawab inkaar mein hain tha magar woh usey sath le jane par misar tha.

"Bade sahab ka hukum hai."

sar jhuka kar mazboot lehjey mein kehte hue agha Ali ne us par wazeh kar diya ki ab inkar ki koi gunzaish nahi. Uska khayal tha ke Faris mazid bahes karega ya fir pichhli baar ki tarah hostel ki building mein kahin chhup jana chahega.

Magar woh stool se utar kar almaari tak gaya aur bohat khamoshi se ke ab bag mein kapde rakhne laga. Agha Ali herat se usey dekh kar reh gaya.

Barish aik baar phir shuru ho chuki thi .

samaan pack kar ke woh usi khamoshi ke sath agha Ali ke hamrah bahar agaya. chhatri ke saaye mein woh siyah jeep ki taraf jahi raha tha jab surkh rang ki car sadak ke is paar ruk gayi thi.

gaari dr. mustafa ki thi. woh darwaaza khol kar bahar nikle to usne Agha Ali se backpack le liya.

"Mein inke sath jaunga."

aawaz dhimi thi magar lehza sakht tha. gehra saans le kar agha Ali ne asbat mein sar hila diya. woh dr mustafa ke paas pouncha to woh usey tashweesh se dekh kar reh gaye. uska chehra zard tha, aur ankhen betasa surkh ho rahi theen jaisey woh kayi raton ka jaaga huwa ho. haath bhi garam the. woh sawal karte karte reh gaye. Uski tabiyat theek nahi thi. woh samajh gaye the. woh un ke sath ghar jana chahta hai, woh yeh bhi jaan gaye the.

"Chalein?" Unhon ne kaha.

Passenger seat ka darwaaza kholte kholte woh ruk gaya. do poniyo wala sir kisi kitaab par jhuka huwa tha. yaksoi se kuch likha ja raha tha. woh murr kar pichli nashist ki taraf gaya. darwaaza khol kar baithte hi dharamm se band Kiya. back pack qadmo mein rakh kar nashist par nim daraaz ho gaya. siyah rang ki hoodie thodhee tak khich kar us ne chehra bhi posheeda kar liya.

Dr. mustafa ne driving seat ka darwaaza khoola to do poniyo wali ko khayaal aaya ke 'baba agar yeh hain to phir

peeche kon hai?' drawing book, pencil colours aur zard rang ki tweeti chor chhar woh ghutnon ke bal nashist ki back side uske sath lag kar khadi ho gayi.

koi larka duniya Jahan se khafa, pusht gaah ki taraf rukh kiye leta huwa tha. Us ka stuffed zarafa jisey woh naya naya khareed kar layi thi. woh uske sar ke neeche takiye ke faraiz sar anjaam de raha tha.

"Tumhe sardi to nahi lag rahi faris?"

gaadi start ho chuki thi. Main road par daalte hue dr mustafa ne poocha. woh khamosh para raha. unhon ne gaadi rok kar lihaaf nikaal kar us par dala. tab bhi uske wujood mein koi jambsh na hui.

nashist ke sath lagi woh kabhi herat se apne nana ko dekhatii thi aur bhi usey.

Gaadi apne safar par gamzan hui to faris ko nind aagai. taham woh soti jaagti kefiyat mein tha. kabhi aawaze us ke liye wazeh ho jati, aur bhi muhim ho kar bilkul madoom.

"Yeh kab utthega baba?"

baar baar gardan mour kar peeche dekhte rehne ke baad do poniyo wali ne thak kar poocha tha.

"Shhh aahista!" unhon ne narmi se toka tha.

"Kab se soye ja raha hai! soye ja raha hai."

Uski sargoshi bhi khasi buland thi. aik baar phir poori ki poori gardan mour kar usme apne is jarafa ko dekha jis se khailne ka usey mauqa nahi mila tha. kaisay bichara use sir ke neeche phansa huwa tha. aik lambi saans le kar woh dr mustafa ki taraf muri.

"Kai uske sar ke neeche hai baba!"

"kon kai?"

"Mera giraffe"

woh bohat fikar mand nazar aa rahi thi.

"Gudiya! abhi hum ghar pahonch jayege. bas do ghante ka to safar hai."

"Kai ko saans nahi aa raha hoga."

woh badi ammao ki tarah pareshan ho rahi thi.

woh jante the jab tak uska masla hal nahi hoga, woh bolti rahegi. Sar mour kar peeche dekha to 'kai' ko bachane ke imkaan dur dur tak nazar nahi aaye. zara si harkat faris ki neend kharab kar sakti thi.

"Kai is all fine! aap bas apni drawing kare shabash!"

Unhon ne uska zehen bhatkana chaha.

"No his not, he needs my help!" Wo datt gayi.

"Woh bahar dekho, barish ho rahi hai."

Foran se seedha ho kar usne khidki se bahar dekha. rim jhim barasti barish yaka yak taiz hogayi. woh aankhon mein Ishtiaq liye khidki ke thande sheeshe se lag gayi. ab koi nazam thi jo gungunayi jarahi thi.

yaka yak usey 'kai' ke sath sath apne nanahe dinosour ka khayaal aaya to murr kar peeche dekhte use talasna chaha.

peele rang ka dinasaur to uske qadmon ke neeche tha. nanhe dil par aik ghonsa aan para.

"Baba..!"

"kya huwa meri shehzadi ko?" un ki aawaz madham thi.

"Baba woh tarzan!"

woh aik baar phir shuru ho chuki thi. dr. mustafa gehra saans le kar reh gaye. sara rasta woh un ka sar khati rahi. kabhi konsa khilona yaad aa jata kabhi konsa aur khilono ke naam itne azeeb or muskil, ke wo khud heran hote.

'usey kaise yaad hain?'

hatta al imkan koshish kar ke usey idhar udhar ki bato mein uljhate rahe aur etraaf se be niaz Faris wajdan neend ki wadiyon mein khoya raha.

---- •♡• ----