Chapter 24: •CHAPTER-23•

•••

husnain ki wafaat ke 10 Mah baad car accident mein kamaal junaid ka inteqal ho gaya tha. use achi tarah se yaad tha nana use apne sath Lahore le kar nahi gaye the. woh sara waqt un ke mulazim Noor ul deen ki biwi ke sath ghar mein rahi thi. woh bachi thi. nuqsaan ki itni samajh nahi thi.

kamaal junaid ne, na usse mohabbat ki thi aur nahi uski behno se hamesha ghusse se jhunjhlaye hue raha karte the. jab husnain peda huwa tha, tab hi un ke chehre ke tassurat badle the aur wo kuch naram hue the. magar yeh narmi, khush ikhlaqi aur mohabbat bhara rawaiyya bhi sirf husnain ke liye hi tha.

Woh saat betiyo ke baap the magar un ko khushi husnain ka baap ban kar hui thi. jab tak woh un ke sath ghar mein

rahi thi, usey yaad nahi tha ke unhone kabhi usse pyar kiya ho ya naam se pukara ho. use shak tha shayad unhen uska naam bhi maloom na ho. aisa baap jab duniya se rukhsat huwa tha to bas zara der ke liye usne mehsoos karne ki koshish ki thi ke usne zindagi mein aik ahem rishta kho diya hai. yeh ehsas takleef deh tha.

aankhon mein nami bhi aayi thi. sadma bhi pouncha tha magar woh ro nahi saki thi. shayad is liye ke woh un ke Kareeb nahi rahi thi. shayad is liye bhi ke woh sadhe saat saal ki aik kam Umar bachi thi jise abhi in mamlaat ki theek se samajh na thi ya phir yeh khayaal tasalii bakhash tha ke usne apne waalid ko sidiyo se nahi giraya tha. waalid uski wajah se nahi mare the. magar baap ki mout bhi uske khate mein likh di gayi thi. woh husnain ki mout ki zimmedaar samjhi jati thi, ab woh apne baap ki mout ki bhi zimmedaar thehra di gayi thi.

wo manhoos, bad bakhat uski hi wajah se is ghar ki ronaqe qabro taley ja soi theen. saari khatae uske khate mein thi. saare hisaab uski taraf khulte the.

Nana use sath le kar nahi gaye the. unhon ne in 10 Mah me usey is qader mushkil se sambhala tha ke ab woh nahi chahate the jannat wapas usi ghar, usi mahol mein jaye. tab tak nahi tab tak Nafisa ka dil jannat ke liye naram nahi ho jata. ya woh uske  na karta gunaho ko maaf nahi kar deti.

woh maa thi. bete ke qaatil ko maaf nahi kar sakti thi. beta bhi aisa jo aik lota ho. pandra salon ke taweel intezaar ke baad zindagi mein aaya ho. phir shohar ki hadshati mout.

Un ke liye yeh bare gehre sadme the. abhi tak to unhen husnain ka sabr nahi aaya tha to is hadase par kaise sambhal jati? nana ki ammi se phone par baat huwa karti thi. woh ab bhi Lahore jaya karte the. itna woh janti thi uski maa pehle se behtar thi aur yeh bhi ke use qaboolne ke liye hargiz hargiz tayyar nahi thi. behno ka khayaal tha, woh baa-mushkil sambhli he, jannat ko dekhen gi to unhe husnain yaad aaye ga. aur husnain jise Nafisa nahi bhuli thi

uska chehra yun jannat ke roop mein samne aaye ga to woh hawaas kho baithegi.

Nana ko bhi yahi lagta tha ke yeh soorat e haal sirf un ki beti ki na thi. nawasi ki bhi thi. jannat is tarah ke halaat se dochar thi. aaj bhi woh sote mein uth kar baith jati thi. dar jati thi aur unhen bhi dara deti thi.

"Apni maa ko samjhaya karo, jannat ko bad dua na diya kare, aulaad hai uski. itni buri baatein, koi saggi aulaad ke liye bhi aise sakht alfaaz istemaal karta hai?"

Nana samajhte woh so rahi hai magar woh sun rahi hoti. kabhi woh uski maa ko hi samjha rahe hote.

"Tumhari beti hai, tumhara khoon tum ne janam diya hai usey aisa kab tak chalega beta? choti si bachi hai woh. kuch to reham khao us par bachon ki larai thi. husnain ghalti se gir gaya. itni hi zindagi thi uski." phir ruk jate.

"Aur ghalti tumhari bhi hai. tum ne husnain ko bohat sar charha rakha tha."

jane aage woh rote hue kya kehti ke woh yak dam chup ho jate. kaafi der tak chup hi rehte, phir phone band kar dete. woh bhi aankhen band kar laiti.

Tapti hui do paher amma ki cheekhain maar dhaar shor kohram aur husnain us ki peshani se behta khoon aur guriya ka toota huwa sar kambal hathon mein bhinch kar woh ankhen khol deti.

"kya huwa mere bacche ko?" Nana usey baho mein bhar lete.

"U-Usey mein ne nahi M-Mara tha." seene mein sar diye woh phoot phoot kar ro deti.

"P-Pehley usne mujhe mara, mere baal kheinchain, M-Meri guriya ko toda. Mein ne nahi mara usey m-mein ne nahi mara."

"Jaanta hoon." Nana tassali dete.

"woh sab ghalti se huwa tha. Is mein tumhara koi qasoor nahi." woh har baar kehte. uske nanhe zehen ki girahe suljhane ki koshish karte aur yaqeen dilate.

"woh sirf aik haadsa tha, jannat ka us mein koi amal dakhal nahi." aur woh yaqeen kar leti. woh yaqeen karna chahti thi. magar is yaqeen se rishte daaro ki usse mutaliq raye kabhi nahi badli thi.

woh aaine mein khud ko dekhati, use husnain hi nazar aata. aankhen, chehre ke khado khaal, shehad rang baal. jannat ke roop mein woh bhi tha. bachpan ka sadma, trauma ki soorat ikhtiyar kar gaya tha. ik khauf wehshat bhara ehsas aik pachtawa woh uske sath taa Umar rehne wala tha.

Nana ki sangat mein usne bachpan se larakpan aur larakpan se jawani ki dehleez par qadam jamaye the. unhon ne maazi se azad kar ke use sambhal diya tha. Aane wale waqt se mutaliq mumkina masail aur pareshaniyo ke paish e nazar woh usey pehley se hi tayyar karte rahe the. jab tak woh un ke sath rahi thi, woh apne bachpan ke maazi ko kisi had tak apni zindagi se nikalne mein kamyaab ho gayi thi. woh usey yaqeen dilate rahe the ke yeh aik haadsa tha aur woh is baat par yaqeen kar chuki thi. is arse mein uski do behno ki shadiyan hui theen magar woh kisi aik ki shadi mein bhi shareek na ho saki thi.

jab tayyaba ki shadi tey hui to uski Umar pandra saal thi. Poore no saal baad woh Nana ke hamrah shadi mein shirkat karne ke liye aayi thi lekin yu ke woh barah e raast apni maa se nahi mili thi aur nah hi unhon ne nazar utha kar uski taraf dekha tha. Nana ki wajah se hi woh kuch khamosh thei. ya shayad waqt ne unhe sabr ki rida Udadi thi magar sab kehte the woh bohat khamosh rehti thi. kisi se ziyada baat cheet nahi karti thi. Zinda hote hue bhi koi zindagi se kaise dur hota hai, Nafisa is ki Zinda Javed misaal thi.

bharay purey khandan mein jannat aik ajnabi thi. uske apne to sirf Nana hi the. usey sirf nana hi kaafi the. bazahir koi usey kuch ke nahi raha tha magar khojti nigahon mein ajeeb sa ta-assur zaroor jhalakta tha. usey shadi ke douran mehsoos hota raha tha ke maa usey dekhati rahi hain. uske chehre ke khado khhaal mein apne husnain ko khojti rahi hain.

Agar aaj husnain zinda hota to woh bhi uski tarah aik khoob soorat teenager hota. aur shayad yahi khayaal hi un ki tabiyat kharabi ka mojab bana tha. naye ghar mein, rishta daaron se mil kar, behno se baatein kar ke, un ke sath shadi ki shopping mein masroof ho kar usey bohat acha laga tha. Mayun mehndi ke function usne bohat khamoshi aur dilchaspi se attend kiye thay. yeh Nana ki hi wajah se mumkin ho paya tha ke is ghar mein ab bhoole se bhi maazi ka qissa kam az kam khule aam nahi chheda ja raha tha. behno ka rawaiyya uske sath qadre behtar tha.

Taya, chacha aur fufu ki family ka ikhlaq bhi kuch bura na tha. khamoshi thi to sirf maa ki taraf se thi. faasle the bhi to sirf maa ki taraf se nana ne mana Kiya tha, tab hi woh chupkay chupkay se, dur dur se hi unhen dekh liya karti thi magar un ke samne aane se guraiz karti thi. Nafisa ki aankhon se jo nafrat jhalakti thi, is ki pehchan usey bohat achi tarah thi.

baarat wale din woh siyah aur sunehri frock mein is qader haseen lag rahi thi ke deegar kayi chacha zaat, taya zaat aur phir fufo zaat bhi achanak se haazir ho jane wali is cousin par fida hue the. magar woh to jaisey Burhan ki thi. Burhan ke liye hi banai gayi thi .

Burhan wasif! uske bade taya ka aik lota beta tha. paanch saal bada tha usse khandan bhar ka ladla aur honahaar sapoot. Aate jaate, woh kahin na kahin use rok leta. koi na koi sawal jhaad kar, us ke sakht radd amal ko enjoy karta. woh lift nahi krwa rahi thi. na use na apne khandan ke kisi bhi cousin ko magar hi dil mein woh Burhan ki shakhsiyat aur Wajahat se mutasir zaroor hui thi.

jab woh FSC ke exam se farigh hui to taya ne Burhan ke liye uska rishta maang lia tha. go ke tai is rishte se hargiz khush nahi thi magar bete ki pasand ke aage majboor ho gayi thi. nana ko bazahir sab theek laga. Burhan khush shakal aur parha likha tha. apni university ka topper tha.

uska bright future tha. adab, aadaab, tameez or tehjeeb unhon ne soch vichar ke liye ziyada waqt na liya aur haan kar di. sadgi se nikah kar diya gaya magar rukhsati jannat ki parhai khatam hone tak ke liye multawi kar di gayi.

un hi dinon usey Burhan ko janne ka mauqa mila tha. phone par baat cheet hui. to woh bhi usse mohabbat karne lagi. Nana ke baad uski zindagi mein aane wala woh dusra mard tha jisse us ne khalis mohabbat ki thi. nana ke baad ab wohi uska sab kuch tha .

zindagi mein bazahir sab theek hi chal raha tha ke Nana heart attack ke baad achanak hi duniya se chal base the. woh university ke first air semester se farigh hui thi ke itna bara dhachka laga. Uski duniya to jaisey weraan hogayi padhai ko khair bad keh kar usey foran hi Lahore saira khaala ke paas jana para. Nana unhen wasiyat kar gaye thay so unhon ne usey apni zimmedaari samajh liya tha.

jannat ko is sadme se nikal kar sambhalne mein kuch waqt laga tha. do mah baad hi taya ne rukhsati par zor dena shuru kar diya tha. Nana is ki shadi ki wasiyat kar gaye The magar woh fi al-waqt is ke liye tayyar na thi. Usse badi do behne ghar baithi theen magar Nafisa ko koi aitraaz na tha. woh bhi jaisey yahi chahti thi ke woh jald az jald apne ghar ki ho jaye. 18 saal ki Umar mein woh rukhsat ho kar Burhan ke ghar chali gayi thi.

Zindagi nai dagar par chalne lagi to naye ghar mein naye rishto ko usne apna bana liya. go ke tai ke sath sath Burhan ki behno ka rawaiya bhi uske sath khush gawaar nahi tha magar is ne jaisey Burhan ki mohabbat ko hi apna sab kuch maan liya tha.

Nana sabr aur azm ka sabaq parha kar gaye the use tabhi woh un ke rawaiyo se dil bardashta nahi hui thi. woh parhai mukammal karna chahti thi. Burhan ne usey na roka. nana ki judai ka zakham bhi mundamil nahi ho sakta tha magar zindagi ne khushiyo bhare lamhat diye to woh bhi jeeney ki koshish karne lagi.

aur yahin se aik kari azmaish ka aaghaz huwa tha.

Shadi ke teen saal guzar jane ke bawajood woh maa nahi ban saki thi. uske banjh pan ki wajah doctors ko samajh nahi aa rahi thi. marz laa ilaaj ho to jawab de diya jata hai. usey bhi jawab de diya gaya tha.

Us raat woh ghar aakar bohat roi thi. Burhan kitni der tak usey samajhata raha tha, tasalli dilase deta raha tha. woh usey shehar ki behtareen  gynecologist ke paas le jane ki baat kar raha tha. woh usey ilaaj ki yaqeen dehani kara raha tha.

"Tum ne suna nahi, woh doctor kya keh rahi thi! woh mere liye koi ilaaj tajweez nahi kar sakti." ro ro kar usne apni haalat kharab karli thi.

"Socho jannat! aaj kon si aisi bemari hai jis ka ilaaj science daryaft nahi kar saki?"

"Banjh hona aik bemari nahi hai. banjh hona aik haqeeqat hai."

woh mayoosi ke andheron mein itna ghark ho chuki thi ke usey Allah ki zaat nazar aa rahi thi, nahi apni takhleeq ki

haqeeqat samajh aa rahi thi. zehen khaali sa ho gaya tha. Burhan ki koi Daleel, koi Hujjat uska gham halaak na kar saki. usey umeed nahi dila saki. yaqeen nahi sikha saki.

yakke baad deegre shehar ke kayi bade hospitals se uske test hue. har test ki aik hi report thi. aik hi haqeeqat thi jis ka ihata mukhtalif doctors ne apne makhsoos andaaz mein Kiya tha.

"Mein hi kyun? mere sath hi kyun?" woh apni poori zindagi mein kabhi itna nahi roi thi jitna ke us raat roi thi. uske ansoo tham hi nehi rahe the. dil sambhal hi nahi raha tha. yeh mehroomi uske liye kyun?

uthte baithte aate jaate ab usey apni sasural mein saas aur nando se taane sunne ko milne lage the. nuqs us mein tha to Atab ka nishana bhi wohi ban rahi thi. doosri shadi ka zikar bhi baar baar uske samnay hi cheda ja raha tha. Burhan aik lota beta tha aur tayi apne pote potiyo ko goad mein khilane ka khawab aankhon mein basaye mazeed intezaar ke haq mein nahi thi. woh bas ab jald az jald Burhan ki doosri shadi kar dena chahti theen magar Burhan tha ke maan hi na raha tha.

woh kisi tor bhi doosri shadi ka soch hi na raha tha. usey aulaad ki koi jaldi na thi, na pareshani thi na koi fikar. Parwah  thi to sirf jannat ki qader thi to sirf uske ehsasat ki.

"Agar mere naseeb mein aulad likhi hai to woh mujhe jannat se bhi ho sakti hai." woh aksar keh deta.

"Banjh hai woh banjh maa nahi ban sakti." tai din mein hazaar baar dohraya jane wala jumla uske samne bhi dohra deti.

woh chup ho jata. kabhi gussa karta, kabhi jhunjla kar uth jata. woh un se koi behas nahi kar sakta tha. reports dikha kar un ki raye nahi badal sakta tha.

Tai ne dil ki bemari seene se lagai aur bistar par padh gayi. Ro ro kar apna hashar alag kharab Kiya. Burhan ko apni zindagi mout ke waste diye. jazbati blackmail kiya magar woh phir bhi tass se mass na huwa. woh koi bhi aisa kaam karne ka soch bhi nahi sakta tha jis se jannat ke jazbaat majrooh hote ho.

aur uski mohabbat dekh kar jannat aik lamhay ke liye khud ko duniya ki khush qismat tareen larkiyon mein shumaar karti aur phir apni mehroomi ka soch kar bad qismat tareen mein shaamil ho jati. woh khud naaqis thi, woh Burhan ko

kaamil kaise karti? woh khud mahroom thi, woh uski ataa kaise banti? ghar mein tension bhadne lagi. tai ammi ka rawaiyya uske sath dikkat amaiz ho gaya. ab uska maazi zehre paish laya jane laga. uski bad naseebi aur bad bakhti ke saaye us ghar ki khusiyo par mehsoos kiye jane lage. majboor aur be bas ho kar Burhan ne bil akhir ghar walon ke aage sar jhuka diya tha.

"Theek hai, kar luga doosri shadi magar abhi nahi. aap kuch intezaar kar le jannat bohat up set hai, mein usey mazeed dukh nahi dena chahta."

jannat ki ankhen karb se num hogai. goya woh irada kar chuka tha magar usey kuch waqt darkaar tha. kya woh waqt jannat ke zakham ka madawa kar sakta tha? kya woh waqt jannat ke nuqs ko poora kar sakta tha? Burhan ko waqt kyun chahiye tha? jab irada kar hi liya hai to phir yeh intezaar kyun? yeh intezaar kis liye?

"Awe hi aur kitna intezaar karu? paanch saal ka intezaar kam hai kya?"  fazila tai ka Para hi chadh gaya.

"Mera bhi jee chahta hai apne pota ko goad mein khilau, usey apne hathon se khilaun, jane kitney din baqi hain zindagi ke."

woh jane aur kya keh rahi thi, usne suna nahi. Burhan ko zehni tor par tayyar karne ke liye woh use mazeed kya aur daleelen de rahi thi, usne nahi jana. jaan bhi leti to kya kar leti?

Us raat Burhan kaafi takheer se kamre mein aaya tha. woh bed par ghutno ko seene se lagaye, un ke gird bazu bandhe kisi mujasme ki tarah khamosh aur sakit baithi thi. uski dhudiya rangat  kamla kar reh gayi thi.

Roshan chamakti aankhon ke diye bujh gaye the. un ke neeche halqon ke andhere the. woh uske barabar mein baith gaya tha.

"Jannat!" Uska haath apne hathon mein le kar, usne pukara tha. woh aik baar phir suk pari.

"Ye tum ne apni kya haalat karli hai yaar!"

janti thi woh usse shadeed mohabbat karta tha, woh usey kisi bhi soorat us haalat mein nahi dekh sakta tha. aik mohabbat uski bhi thi. jo shiraakat daari bardasht nahi kar sakti thi. woh to Burhan ki female colleague se bhi jealous ho jaya karti thi kuja ki us ki doosri biwi jis ne Burhan ki zindagi mein aana tha. uska naam lena tha. uske bachhe ki maa bhi banna tha. uski himmat woh kahan se laaye? uska hosla woh kahan se laaye? yeh aziyat ziyada badi thi. yeh zakham ziyada gehra tha .

"Meri aik baat gor se suno jannat!"

mohabbat bharay lehjey mein aik azm tha. aik ehad, aik yaqeen.

"Meri zindagi mein jo tumahari jagah hai, use koi aur nahi le sakta."

kamre mein jalte wahid bulb ki roshni taiz hui thi.

"Mohabbat mein ne sirf tum se ki hai, aur sirf tum se hi karta rahuga." woh uske haath par girift mazboot kiye bohat maan se keh raha tha.

"Hum hamesha sath rahen ge. hamare darmiyan kabhi koi faasla nahi aaye ga." yeh mera wada hai tum se woh yaqeen dehani karate hue usey aindah kal ke liye tayyar kar raha tha.

"Mein kal bhi tumhara tha, aaj bhi tumhara hu aur hamesha rahuga."

Aur jannat, jannat kamaal, apni mehroomi par uski mohabbat ki rida charhaye. uske aik aik lafz par imaan le aayi thi. larakpan se le kar aaj tak usne yahi to kya tha. usey ab bhi yahi karna tha.

woh tai ka aik lota beta tha. bohat khawab the, umeed mein thi ghar bhar ke logon ki uske liye uske baccho ke liye. wo ye julm us par nahi hone de sakti thi. jis se mohabbat ho, uski khushiya apni zaat se badh kar Aziz ho jati hai. usey bhi woh bohat Aziz tha.

jab hi naseeb ke aage sar jhukate hue usne dil par bhaari pathari rakh liya tha. tab hi uske wado par bhrosa kar ke doosri shadi ke liye bhi raazi ho gayi. Jis roz Burhan ka nikah tha, us roz uski tamam tar himmat jawab de gayi thi. woh kamre mein tayyar ho raha tha aur usne rote siskte uske samne haath jor diye the.

"Mat jao Burhan! mein mar jaungi."

Uske haath thaam kar usey bed par bithate hue woh uske qadmo mein baith kar use aik baar phir samajh raha tha. aur woh samajh nahi rahi thi. woh bachon ki tarah phoot phoot kar roye jarahi thi. kya usne apni poori zindagi mein kabhi is waqt ko bhi socha tha? aziyat par mushtamil in lamhoon ka gumaan kiya tha? Burhan ki zindagi mein koi aur aaye gi aur woh usey aane degi? kuch kar hi na sakegi? woh ghadi jab mohabbat ka wastaa bhi kaam nahi aaye ga?

"Tum tayyari karo mein tumhe hafsa aapa ke ghar drop kar deta hoon, wapsi par pick kar luga."

"Nahi, mujhe kahin nahi jana. yahin baith kar tumhara intezaar karna hai."

"Jannat! Zidd mat karo."

"Mein yaha se kahi nahi jaugi." woh hawaso mein nahi lag rahi thi. Nachara se Hafsa aapi ko phone karna para tha. uski nah nah ke bawajood woh usey zabardasti apne sath le gayi thi.

shiddat se rote hue kuch be qaboo ho kar woh us raat ammi ke ghar chali aayi thi. woh un se milna chahti thi. un ke galey lagna chahti thi. un ke qadmon mein girna chahti thi. magar Hania ne use drawing room se aage un ke kamre tak jane nahi diya tha.

"Wo tum se nahi milegi!"

"Sirf aik baar! sirf aik baar mujhe un se baat karni hai." Khatak ki aawaz ke sath Nafisa ke kamre ka darwaaza mukaffil ho gaya tha. aisa pehle bhi ho chuka tha. Kahin baar ho chuka tha. woh jab bhi aati thi, yahi hota tha. Nafisa uski shakal tak na dekhna chahti thi. woh khud ko kamre mein band kar leti thi.

Hania ko raste se hata kar woh un ke band kamray ka darwaaza zor zor se bajane lagi thi. hamesha ki tarah kuch aziyat, kuch dukh, kuch karb, aur be basi ke sath.

"Mujhe dua de de ammi! mujhe aik dua de de. sirf aik baar mere liye haath utha le, sirf aik baar ammi ammi!" woh rote hue un ki minnate kar rahi thi. girgara rahi thi.

"Mujhe maar len, mera mun noch len, meri jaan nikaal len lekin yeh na kare please yeh na kare" magar doosri taraf hamesha ki tarah khamoshi chhai rahi thi.

"Allah ke liye darwaaza khol de ammi. mujhe aap ki zaroorat hai, bohat zaroorat hai." rote bilakte woh ghutnon ke bal gir si gayi.

"Un ki tabiyat kharab ho jaye gi jannat, ab jao yahan se." Hania ne use kandhon se pakar kar wahan se hatane ki koshish ki thi magar usne haath jhatak diye thay. darwaze ko pakar liya tha.

"Aaj uska nikah hai. ammi!"  Siskiyon ke beech woh baa-mushkil keh payi.

"Mein abhi tak maa nahi ban saki to is liye woh doosri shadi kar raha hai." lab bhinch kar, aankhen ragar kar usne darwaze par dastak di.

"Ammi! aap sun rahi hain mujhe?"

bohat pyar, bohat mohabbat aur lajajat se woh darwaze se lag gayi thi.

"Ammi! mein is waqt sirf 6 saal ki thi." Us ka gala betha huwa tha. aawaz kamzor si thi.

"Sirf 6 saal ki thi ammi!" jism laraz raha tha. dil tarap raha tha. ankhen baar baar bhig rahi thi. woh kisi nanhe masoom bacche ki tarah toot toot kar apni safai de rahi thi.

"Mein ne use nahi mara tha, mera yaqeen kare. mein ne use" uski hichikiya badh gayeen.

"Mujhe maaf kar den. Allah ke liye mujhe maaf kar den. mujhe dua de den. dekhen Nana bhi nahi rahe. Burhan bhi nahi rahega. mein akeli reh jaugi. ammi Allah ke liye sirf aik dua, mere liye sirf aik dua."

lekin dua nahi mili. darwaaza bhi nahi khula. hamesha ki tarah us raat bhi Hafsa aapi use  zabardasti wahan se utha kar le gayi thi.

Burhan baar baar phone kar raha tha. uski kheriyat maloom karna chaah raha tha magar usne phone par usse baat nahi ki thi. neend ki goli le kar aaraam karna chaha magar uski be cheeni aur be qarari mein kisi soorat afaqa nahi huwa tha.

"Agar jo ye nuqs uski zindagi mein na hota? agar jo ye mehroomi uska muqaddar na hoti?" usne laakh koshish

ki wapas ghar jane ki magar Hafsa aapi ne use jane na diya. yeh bhi Burhan ki hi khwahish thi ke woh kuch roz un ke yaha hi thehre. fazila tai ghar ko saza rahi thi. nai dulhan ka kamra set ho raha tha, deegar rasme ada ho rahi thi.

is soorat mein woh jannat ko waha nahi lana chahta tha. Albata office se wapsi par woh roz hi uske paas aata tha. mohabbat ka yaqeen dilaata tha, uska khauf, is ke khadshaat ko khatam karne ki koshish bhi karta tha. jab tak woh paas hota, woh har aik baat par yaqeen karte hue halki phulki si ho jati. sirf yeh ehsas ke Burhan sirf mera hai, use tamam khadsho se mubara kar deta, himmat jaga deta, hosla barha deta. aur jon hi woh nazron se oojhal hota, tanhai use saanp ki tarah dasne lagti.

mehromiyaa naye sirey se sar uthati aur woh khud aziyat ki daldal mein chali jati.

"Ye aziyat, ye dukh, ye karb, ye mahrumi meri zindagi me kyun?"

---- •♡• ----