Chapter 23: •CHAPTER-22•

کِسٹ نمبر 4

woh bed side ke sath pusht tikaye farsh par do zaano baithi thi. kamre mein nil jagi si roshni ka madham sa taassur tha jo uski aankhon ki weerani ko ayaa kar raha tha. rangat zard lab baaham paivest. aur aik hi nuqtey par jame barahemiyat se.

aik aag thi jis mein sab jal raha tha. khawab bhi khwahisaat bhi umeed bhi yaqeen bhi! paas hi mobile para tha. screen roshan thi. anjaan number se arsaal ki gayeen faris aur Adina Zubair ki shadi ki tasaveer khuli pari thi.

zindagi bhar se bhar poor muskurahat, sanjeeda magar kuch narmi liye tasurat, hashash bashaash chehra magar jannat kamaal ki tamam tar tawajah un Hazel green aankhon par markooz rahi thi jin se jhalakte mohabbat ke haseen rang use un paanch mah mein aik baar bhi nazar nahi aaye the. jannat ki sangat mein to jaise woh adhoora tha. mukammal to woh Adina Zubair ke sath lag raha tha. jodi bhi kamaal ki thi. pehli nazar mein khayaal aaye to bas yahi ke bane hi aik dosre ke liye hain.

'Agar mein use haan keh du. zara socho! tumhari hesiyat kya reh jaye gi?' dil mein aik hook si uthi. ankhen mukammal tor par num ho gayi. "hesiyat" zehen ke parde par lamhe bhar ke liye aik manzar ubhra, phir dosr, phir teesra, aankhon mein thehre ansoo galoon par larakh gaye. maazi mustaqbil mein dhalne laga. aziat roop badalne lagi. chehre katmak hone lagey.

maheen ki jagah "Adina" aagai thi. Burhan ki jagah "Faris" le chuka tha. waqt aik baar phir wohi hekiyaat likh raha tha. jis ka aaghaz be shak mukhtalif magar anjaam ab bhi aik sa tha. hesiyat jutla kar, aib batla kar, raste juda kar dena. uske sath aik baar phir wohi ho raha tha. woh aik baar phir usi takleef se guzarne wali thi. us par khaar raste par chalne wali thi. khail ab bhi naseeb ka tha. farq sirf itna tha ke ab ki bara se koi khawab nahi dikhaya gaya tha, umeed nahi dilae gayi thi. na aitbar jatayaa gaya tha, na mohabbat dikhayi gayi thi. ab ki baar jazbaat me banawat nahi thi, na andaaz mein Halawat thi. ab ki baar woh sacha khada insaan apni nafraton mein bohat khalis tha, apne iraadon ka pukhta, apne faislon par aaj bhi qaim tha.

bhatak to woh gayi thi jo yeh soch baithi thi sab theek ho jaye ga. theek nahi bhi huwa, to woh sambhal jaye gi. qismat jis raste ka intikhab kare gi, woh chal padegi. jis manzil ka taayun kere gi, woh us tak pahonch jaye gi. magar woh saari himmat, woh poora ka poora hosla, woh umeed se bhara yaqeen, us ka azm, uska faisla sab lamhe mein fanaa huwa tha. woh bikhar kar simatne ke bajaye mazeed reza reza hone lagi thi. aakhir woh kyun har baar khaali haath, tahii daman reh jati thi? kyun Adm ho jaya karti thi? kyun nafi kar di jati thi?

'Mummy ko bahu chahiye thi woh apni marzi aur pasand se tumhe yahan le bhi aayi, mujhe life partners chahiye hota to mein kam az kam tumhara intikhab na karta.' andar kahin aawaz gunji thi. sard, khushk, jala kar bhasm kar daine wali aawaz

'Auk surprise hai tumahre liye.' chehra hathon mein chhupaye woh phoot phoot kar rone lagi. ghutno par sar rakhe rote siskate usne apne gird bazu bandh liye. woh apne aap ko, apni girift mein le kar jaise sambhalne ki koshish kar rahi thi, magar woh sambhal nahi rahi thi. uska dil ro rha tha. uski rooh tadap rahi thi.

'positive socho bacche!' nana tehelte hue aksar kahe jate the. aaj bhi un ki aawaz baaz gasht ban kar uske andar gunji thi

"Is haalat mein bhi?" woh hichkiyo ke beech baa-mushkil bol payi.

"Is haalat mein bhi baba? Is haalat mein bhi baba?"

"Dard aur takleef ki intahaa par agar tum positive nahi sochogi to phir kab sochogi?" woh muskuraye.

usne aansu se tar chehra upar uthaya.

kamre mein uske alawa aur koi nahi tha.

"Roshni mein yeh gumaan rakhna ke rasta mil jaye ga, qadre aasaan hai." woh khidki ke paas khare bahar dekh rahe thi. "Asal kamaal to us ka huwa jo azmaish ki tariqi mein us soch par qaim raha, us waqt jab koi rasta tha, na roshni baqi rahi thi." ab woh uske samne panjoo ke bal baithe the. uska haath thame, uske ansoo ponch rahe the aur woh be basi se roye jarahi thi. woh himmat kar ke aaj nana se keh dena chahti thi.

jeene ki har khwahish khatam. ab bas mout mil jaye. aik naye imthehan mein parney se pehle, aik nai azmaish ko jhelne se pehle. woh bas kisi tarah mit jaye. ab ki baar woh khaak ho aur phir khaak hi rahe. ab ki baar jab uski mout ho to jagah qabar hi bane. bas ab aur nahi. ab mazeed aur nahi.

bahar aasman par baadal phail rahe the. hawae taiz ho rahi theen. apne gird bazu he woh qaleen par simat kar late gayi thi. woh sona chahti thi. apne dard se laa talluq hona chahti thi, magar andar ka shor hamesha ki tarah Us khwahish par badh gaya tha.

baadalon ki ghann garaj ke sath hi unki aankh khul gayi thi. golion se chhalni wujood, khoon se surkh hoti safaid shirt chaal mein larkharaht wheel chair par Barajman adhe zindah adhe be jaan wujood ke samne panjoo ke bal jhukta woh.

unhon ne palken jhapkai, sidiyon ki aeni ralling ab sahara ho chuki thi. woh baa-mushkil apne qadmon par khari theen. baa-mushkil apna focus uske chehre par jamaye hue thi.

"Jo khail aap ne apni taaqat se shuru kiya tha, uska injaam yahi hota tha." Ladkhadati, rondhi hui, raiyat waqt mazbooti se kamzoree ki taraf bardhti hui aawaz.

"Mera mera beta kahan hai?"ab ke woh mathos ho kar aage badhi thi.

manzar badla, roshni andhera hui thi, magar ehsasat wohi rahe the, dard bhi wohi, aziyat bhi wohi, maazi bhi wohi.

woh takiye ke sahare uth bathain. haath barha kar lamp roshan kar diya. unka chehra mukammal tor par aanso-on se tar ho raha tha. wujood par aik kapkapi taari thi.

deewar geer khidkion ke parde doriyon mein bandhe hue the. lawn ki lights ki jarkar roshiniyon mein barish shiddat se barasti nazar aa rahi thi. andar aur bahar ka mausam aik ho raha tha.

"Aap ko kabhi mujh se mohabbat nahi thi. aap ko hamesha woh nazar aaya hai. hamesha uski fiqr rahi hai."wo shishak pari.

"Yateem bachon ko sabr aa jata hai ke woh jante hain, un ke maa baap qabro mein hain, agar jo wo zindah hote to un ki haalat aisi na hoti lekin jin bachon ko maloom ho, un ke maa baap zinda hain aur tab bhi un ki yeh haalat hai. zara socho inhen sabr kaise aata hoga?"

manzar badal rahe the. magar pendulum ki aawaz wohi thi. woh har manzar mein, har haqeeqat mein, har khayaal mein aik si thi.

'insaan un sawalaat ka kya kere jo neend ura den. be qarari mein baha de. jinka koi jawab na ho, na mantaq, na Daleel , bas aik sarah jais jung, be cheeni, be sukooni, bas dard, aziyat,

kar woh hospital ke corridor mein khadi thi.

"Sawal zameer uthata hai. jawab imaan dilata hai, imaan batla raha hai, mein bhatak rahi hoon! imaan batla raha hai tum ab sahi raste par ho!"

unhon ne aziat se lab bhinch liye. ab woh be aawaz ro rhi theen.

'Mein agar use udaan ke liye par de raha hoon to munasib waqt par laine ka ikhtiyar bhi rakhta hoon, mein jis waqt usey hudood o quyood se nikalta daikhon ga, usey wapas uski auqaat mein le aaunga , magar jo tum kar rahi ho, us par tum bohat pachhtaogi.'

unhon ne Gehra tanaffus le kar apne asaab par qaboo pane ki koshish ki. zehen ko maazi ki girift se chhurana chaha, magar nakaam rahim

"Mein kya hoon mammy? mein kahan hoon?" Unhen laga wo un ke samne aan khara huwa hai. aankhon par hath rakhe woh be aawaz roti rahi. deewar geer khirkion ke us paar barish se num hoti bojhul fiza mein kahin bijli chamki thi. doosri manzil ke bed room mein carpet par laiti, neend ki gehri wadiyon mein utarti jannat kamaal ne zara der ke liye ankhen khol kar band kar li.

mobile silent par tha. andhere mein screen roshan ho rahi thi. aur isi roshni mein side table par rakhe guldaan mein thehre phoolon ki pattian toot kar neeche aa giri thi.

sara din aasman baadalon ki lapait mein raha tha. mausam toofani tha. waqfay waqfay se barish bhi do teen baar baras chuki thi. siyah rang ki ae line kamij par halke rang ka lamba uni sweater zaib tan kiye, woh us waqt kitchen mein khansama ke sath raat ke khane ki taiyari kar rahi thi. surkh o mutwaram aankhon mein khamoshi thehri thi. chehra zard ho raha tha. tabiyat nidhaal lag rahi thi.

uska zahen uljha huwa sa tha. woh cabinet kholti to kuch lamhoon tak sochti rehti ke kis liye khoola hai. fridge ke andar se jo cheez nikaal kar lati. uski zaroorat hargiz na hoti. aur jis ki zaroorat hoti woh cheez ba wujood talaash ke use na millti. saare kaam usse ghalat ho rahe the.

Mrs. Shirazi bilkul samne glass walls ki taraf rukh kiye baithi thi. sheeshe par phisalte katro par nigah jamaye kisi soch mein doobi hui theen. kaano mein air phones lga rakhe the. mobile par yaqeenan woh kuch sun rahi thi. aur kaafi der se sun rahi thi.

aik nazar un par daalte hue woh aahista se muri aur agle hi lamhe uska sir chakra gaya. usne bekhasta counter table ko thaam kar khud ko girne se bachaya tha. mulazma ne uska baazu pakar kar use sahara daine ki koshish ki.

"Mein theek hoon"  bazu chhurate hue usne doosre haath se maiz ka sahara liye rakha. phir kursi khech kar baith gayi. tashweesh se uski taraf dekhte hue mulazma ne taizi se glass mein pani

daal kar diya tha. chand ghoont bharne ke baad woh peshani masalne lagi thi. sar dar se phataa ja raha tha. woh raat bhar so nahi saki thi. Upar se pareshani ke baais bhook bhi taqreeban khatam ho chuki thi. na woh theek se nashta kar saki thi, na do pehar ka khana kha saki thi. aur jo khaya tha, woh ziyada der pait mein thehr nahi saka tha. shadeed depression aur Anxiety mein us

ke sath yahi hota tha.

chand lamhon tak woh maiz par sir daale baithi rahi thi. phir kisi ehsas ke tehat is ne sar utha kar mrs shirazi ko dekha tha. sad shukar ke woh uski taraf mutwajjah nahi theen, warna woh uske liye kitna pareshan ho jati.

guzashta raat jo kuch huwa tha, uska hawala usne mrs Shirazi ko nahi diya tha. woh Adina Zubair se mutaliq puchne ki himmat nahi kar payi thi. na is baat ka shikwa karne ki sakt rakhti thi ke yeh baat usse kyu chhupayi gayi thi. Saira khaala bhi to uski haqeeqat chhupa gayi theen. uska maazi uski pehli Talaq ki wajah kuch bhi to nahi bataya tha unhone phir woh shikwah karti bhi to kaise?

yaka yak mrs. Shirazi ka mobile baj utha faris ki call thi. woh airport se ghar ki taraf rawana ho raha tha. usse baat karne ke baad mrs Shirazi aik baar phir Sabiqa kaam mein masroof ho gayi theen. woh subah se jane kyun kuch pareshan aur khamosh hi thi.

bahar ghanti baji thi. Intercom par baat karne ke baad aqsa ne mrs Shirazi ke paas ja kar unhen kisi khatoon ki aamad ke bare mein aagahi di. mrs. Shirazi pehle heran hui phir asbat mein sar hila diya. khansama ko zaroori Hidayat deti woh uth kar lounge ki taraf aane lagi. isi Isna mein saddar darwaaza khil gaya tha. mulazim ke hamrah daakhil hoti khatoon par nazar padhte hi Jannat apni jagah patthar ho gayi.

Faiza chachhi maheen ki ammi woh yaha? uska dil ruk sa gaya. sansen tham gayeen. ghar mein daakhil hote hi un ki pehli nazar jannat padi thi. wo heziyani andaaz mein chikhte hue uski taraf badhi theen. buddua, dahaiya, kose dete use par chillane lagi thi. mrs shirazi ke samne woh is ke aik aik gunah, aik aik ghalti ki pitare khole uski zaat ke parkhacche ura rahi thi. woh us par jhapatna chahti theen, use jaan se maar daalna chahti theen, yeh to aqsa hi thi jo aik dam se uske aage aayi thi. wohi unhen peechay hatate hue use bachane ki koshish kar rahi thi. aur jannat to yun thi jaise us mein jaan hi na rahi ho.

"Meri bacchi ki khushiyo ki kaatil, is ne jadu karwaya. is ne.."  jannat ka zehen maoof hone laga. kaan saaien saaien karne lagey the.

aasman par kahin bijli chamki thi, badal bhi garje the. barish shiddat se barsne lagi. aur woh dehshat zada si apni jagah khadi reh gayi thi. uski himmat na hui woh mrs shirazi ki taraf dekh lati. saari qowat aur sakat jaise us aik lamhe khatam ho kar reh gayi thi.

woh un ki aankhon mein apne liye herat, sadma, be yakeeni jaise tasurat nahi dekh sakti thi. wahid hasti jin ki woh nafrat nahi reh sakti thi. usne aik lamhe ke liye bhi rukh nahi badla. aik lamhe ke liye bhi un ka chehra nahi dekha. aansoo se num aankhon ke sath roti sakti woh be ikhtiyari ke aalam mein saddar darwaaza dhakelti bahar nikal gayi.

mausam ab bhi toofani tha. barish ab bhi baras rahi thi. sah pehar ka waqt tha. Jaise raat ki tariqi jaisa ho raha tha. bairooni darwaaza uboor kar ke foot path par ujlat mein qadam rakhte hue woh aage badhti gayi. yahi aik rishta tha, yahi aik aitbaar jise woh khona nahi chahti thi. yahi aik be los mohabbat reh gayi thi jis se woh mehroom nahi hona chahti thi. woh is ghar mein un ki wajah se thi. woh is ghar mein un ki wajah se rehna chahti thi. magar yeh kya hogaya tha? kyun ho gaya tha? uska dil shiddat gham se phatne laga. woh be ikhtiyar ho kar rone lagi. woh kahan jarahi thi usey maloom nahi tha. woh kahan chale jana chahti thi use andaza na tha. dimagh maflooj ho raha tha. sochne samajhne ki salahiyat jaise mafqud ho kar reh gayi thi. sadak cross karte woh kisi gaari ke taley aate aate bachi thi. park ke us goshe mein masjid ki uqbi side par deewar ke paas rakhte hue uska jee chaha to woh cheekh cheekh kar royi magar muh par haath rakhe, apni cheekhon ka gala ghonte woh neeche baith gayi thi.

zehen ki screen par maazi kisi film ki tarah ubhar ne laga tha. manazair wazeh hone lage the. zakham udhrne lage the. sansen tham rahi thi. aawaz doobne ko thi aur dard tha ke badhta hi ja raha tha, Badhta hi ja raha tha!

woh maazi uska maazi uski galtiyan us ke gunah uska ehatasab! ab ke bijli lamhe bhar ke liye chamki to dharti par andhera badha gayi. sah pehar ka sooraj mukammal ghuroob ho chuka tha. barish hanooz baras rahi thi.

uski zindagi ki dhundli tasweeron mein kuch ajnabi sanasa sa chehre the. shanasa is liye ke khooni rishte the. aur ajnabi is liye ke uski pehchan liye rakhte ths. ammi, abbu aur hasnain. zindagi in teen logon se judi thi. magar un teeno se kat kar bhi khatam nahi hui.

Husnain uska judwa bhai tha. chhe behno ke baad uske sath peda hone wala kamaal junaid ka aklotaa beta! jis ki paidaiesh se Nafisa aur kamaal junaid ki zindagi mein baharen utar aayi theen. har waqt taane aur tanjiya daine wali dadi ke ravaiye mein mithaas ghul gayi thi. Tarah tarah ki baatein banane wale apno aur ghairo ke muh bhi band ho gaye the. Nafisa mutmaen theen ke ab doosri shadi ka mauzo bhi zair behas nahi laya jaye ga, na betiyo ke taane diye jaye ge. na kamtar samjha jaye ga ke ab woh aik bete ki maa theen aur saat baityon ke baad aik bete ki maa hona koi choti baat hargiz nahi thi.

Unhen ab sirf husnain yaad tha. khayaal tha bhi to sirf uska. aur jannat wahan kahan thi? shayad kahin bhi nahi thi. Nafisa ko to yaad bhi nahi tha ke unhon ne hasnain ke sath aik beti ko bhi janam diya hai. Husnain ka naam to is waqt rakh diya gaya tha magar woh apne wujood ki tarah kitne hi dinon be naam rahi thi.

yeh to nana the jin ki tawajah us par pari thi. naam bhi unhon ne khud rakha tha aur jane kya soch kar kya samajh kar woh uski badi behan hafsa ko khaas tor par takeed kar gaye the ke woh uska khayaal rakhe. sada ki shukar guzaar, sabar karne wali khamosh tabi Hafsa ne yeh baat jaise apni girah se bandh li. woh jannat ke liye maa ho gayi. doodh usne feeder ka hi piya tha ke Nafisa ne apna doodh pilane se inkaar kar diya tha. hasnain ke baad na unhen apna koi hosh raha tha na ghar ke kisi fard ka khayaal raha tha aur jannat to phir nanhi bachi thi. jis ki mojudgi ka ehsas bhi uske rone ki aawaz se hota tha.

zindagi ke ibtidayi paanch saal usne be fikri ke aalam mein Hafsa ki sangat mein guzare the. un paanch saloon mein aisa kabhi nahi huwa tha ke maa baap ya dadi mein se kisi ne use pyar kiya ho ya bulaa kar apne paas bithaya ho. kuch kaha ho, ya phir suna hi diya ho. ghar ki un teen hastiyon ki zindagi to jaisey hasnain se shuru ho kar hasnain par hi khatam thi.

Lekin woh hassas thi. balaa ki samajh daar bhi hasnain ko har waqt maa ke sath dekhatii to uska bhi dil chahta ke woh use bhi bulayen. use bhi pyar kare. uske liye bhi qeemti kapre khareede aur dhair saare khilono ka ambaar laga de. bachi thi. na samajh thi yeh nahi janti thi ke jab yeh khwahisaat uski doosri behno ki poori nahi hui thi to uski kaise ho jati.

ehsas kamtaree mein ghiri kamaal junaid ki sab hi betiya Adm tawajhi ka shikaar thi. maa aik aurat hote hue bhi un ka dard, un ki aziyat, un ki shakhsiyat ke khalaa ko pur karne se qassir! shayad pandrah saloon ki zehni aziat ne unhen bhi normal nahi rehne diya tha. shayad logon ki zubano ne un se un ka ehsas bhi chhina tha. woh bas ab aik bete ki maa thi. aik bete ki maa hi rehna chahti thi.

Jab Hafsa ki shadi hui to uski Umar chhe saal thi. hansi khushi naye kapro mein is ne har taqreeb dulhan bani Hafsa ki goad sambhale rakhi thi. lekin jab rukhsati ka waqt aaya to us par yaka yak hi inkishaaf huwa ke woh usey chhor kar ja rahi hai.

bohat shor machaya tha usne bohat royi aur chillayi thi wo. dulhan bani Hafsa ke seene se chimti usse judda hone ko bhi tayyar na thi. Uski behno ne hi use baa-mushkil Hafsa se alag kiya tha. use jhooti tasalliyan dilase bhi diye gaye the. use bataya gaya tha woh abhi ja rahi hain, kal aa jayegi lekin wo 'kal'

phir kabhi nahi aayi thi.

Hafsa ke jane ke baad use ehsas huwa woh bhari duniya mein bilkul tanha reh gayi hai. un ki judai se peda hone wale is khalaa ne jannat ki shakhsiyat mein ajeeb se rang bhar diye thay. ab imaan usey apni zimmedari samajh kar sambhaal rahi thi magar woh phir bhi us ka is tarag khayaal nahi rakhti thi jaisey Hafsa rakha karti thi. uske muamle mein bas yahi zaroori samjha jata ke use waqt par khila pila diya jata. Nehla dhula kar kapre badal diye jate. home work karwa diya jata. magar use to mohabbat or dekh bhaal ki zaroorat thi.

Imaan to use apne sath sulati bhi nahi thi ke is tarah use neend nahi aati thi jabke usey Hafsa ke seene se lag kar sone ki aadat thi. jab se hafsa ki shadi hui thi, woh ghar ke aik aik fard mein use talashti phir rahi thi. magar nah uske jaisa kisi ka rawaiyya tha, na uske jaisi kisi ki mohabbat thi. phone par usse baat hoti to ro ro kar usey wapas aane ka kehti aur woh dhair saare khilonon ka wada kar ke uska dil behlaane ki koshish karti. doosre shehar mein thi. jald aa bhi nahi sakti thi. doosri behno se, khaas tor par maa se bhi kehti, woh Hasnain ki tarah use bhi kuch waqt de. magar hamesha ki tarah koi bhi uski baat ko khatir mein nahi lata tha.

Jannat jitni gumsum, hasaas, masoom tarin thi Husnain utna hi shararati, badtamiz, aflatun kism ka baccha tha. Ladh payar se sar chadha or kuch hadd tak bigda hua bhi. ghar me kamzor sirf jannat hi thi. uska bas bhi sirf usi par chalta tha. wo bilawajah se usse ladh padhta, copiya phad deta, jara jara si bat par sikhayat lagwa kar datt padhwa deta. Baal pakadta, khilone bhi tod deta.

Jawaban wo use kuch bhi nahi keh sakti thi. Keh deti to hungama barpa ho jata tha. Nafeesa ulta use hi datt deti thi.

"Ek hi bhai hai tumhara agar kuch keh bhi diya hai to kya ho gaya hai?"

Uski kisi bhi sikhayat ko khatir me nahi laya jata tha. Ulta Husnain ki un galtiyo ko enjoy kiya jata tha. Uski badtamizi ek masoom si harkat mehsoos hoti, uski hathdarmi par payar Kiya jata.

jannat ko apna judwa bhai acha nahi lagta tha. woh pehley usse sirf darti thi, magar ab nafrat bhi karne lagi thi. uski tamam tar koshish yahi hoti ke woh kisi tarah husnain se dur rahe. kam nuqsan nahi the hi jo wo uske kar chuka tha. Hafsa jitne bhi khilone uske liye bhejti, woh unhen toar phore kar rakh deta. Khelne ki nobat hi na aati.

maa ke ghair munsifana ravaiye se wo din badin sher hi hota ja raha tha. doosri taraf saade chhe saal ki jannat andar hi andar se ghut rahi thi magar na kisi ko bta sakti thi aur nahi uski shikayat laga sakti thi kyun ke woh saat behno ka ek lota bhai tha. Nafisa aur kamaal junaid ka ek lota beta!

Uski har ghalti maaf thi. uski har khata par dar guzar, woh jo chahe kar sakta tha. use koi rok tok na thi. use laad pyar ne use itna bigad diya tha ke wo ghusse mein ghar ki cheeze bhi tor deta tha. uske ghusse ka ziyada nishana banti thi. behno se ulajh parta use woh din aaj bhi yaad tha jab Hafsa aapi purey chhe mah baad Lahore aayi thi. uske liye guriya aur kapre bhi layi thi. layi to woh bohat kuch husnain ke liye bhi theen magar husnain se to jaise uski khushi khaas tor par jannat Ki khushi bardasht hi nahi hoti thi.

Sunhere lambay balon wali baar bi hathon mein liye is din woh be intahaa khush thi. Bade chhote sab aik doosre se mehv guftagu the. baatein ho rahi theen. aur woh guriya haath mein liye bramde mein aagai thi. phir wahi se us ne sidiyo ka rukh kya. upar kamre mein uska trunk para tha. husnain ke Atab

ka shikaar toote phoote khilono ko tape se jod jod kar usne wahan ekhatta kar rakha tha. koi aik khilona bhi aisa nahi tha jo salamat raha ho. aur koi aik khilona bhi aisa nahi tha jise usne kachre mein pheink diya ho. jo cheez tut ti woh is ke dil ke ziyada qareeb ho jati thi. woh sunhere balon wali is guriya ko bhi apne is truck mein rakh dena chahti thi. wo khud Hussain se mehfooz nahi rehti thi magar apni guriya ko mehfooz rakhna chahti thi. janti thi uska junooni bhai is guriya ko bhi nahi chhorega.

chulhe mein jhonk dega ya phir uski gardan alag kar ke uski tangen tod maror kar pheink dega. woh zair lab muskarati khushi khushi sidiyan chadh rahi thi aur Hussain uske peeche peeche chhupke se aa raha tha. kisi ehsas ke tehat usne ruk kar peeche dekha tha aur phir khauf se wahi tham kar reh gayi thi.

"Jannat tum ne mujhe apni doll nahi dikhayi?" Jannat ki aankhon mein haras phail gaya. guriya par girift badh gayi. woh sahih maeno mein apne is jungli bhai se darti thi jis ka bas us par aur us ke masoom khilono par chalta tha. aur is lamhe jab woh chhat ki sidiyon par khasi bulandi se is ke haath se guriya chhin raha tha.

To is waqt usne shayad zindagi mein pehli baar himmat dikhata hue apni guria bachane ki koshish ki thi isi khincha tani ke douran Hussain ne is ki guriya ko balon se pakar kar is qowat se khincha tha ke is ke halaq se cheekh nikal gayi thi. aise jaisa sach sach mein husnain ne uske baal khech daale ho.

Kuch aisi hi takleef thi jo uske andar utheen thi, ke ab guria ka sar ab Hussain ke paas tha aur dhar uske hathon mein. aur woh hash raha tha us par uski be basi par uska nuqsaan kar ke ab hans raha tha. phir woh guriya ka dhar hthyane ke liye lapka tha.

Taish ke aalam mein kuch ghusse aur be basi se is ne rote hue usne husnain ko khud se pare dhakela tha. aur tab hi woh ladkhadaya tha. uski aankhon ke samne bohat achanak khail lamhe ka tha ya phir lamhe se bhi kam muddat ka tha.

drawing room se nikalti Nafisa ki aankhon ke samne Hussain sidiyo par ludkta kachi eento ke farsh par ja padha. uska sir phat gaya. khoon behne laga. ankhen band huien aur jism sakit ho gaya. Nafisa ke halaq se cheekh nikal gayi. aur jannat tooti hui guriya apne hathon mein liye khauf se thar thar kaanpti khari reh gayi thi.

husnain mauqe par hi dam toar gaya tha. Nafisa nim pagal si ho gayi. woh bhool gayi ke jannat bhi un ka khoon hai. unhon ne pehli baar us par haath uthaya. itna mara ke woh marne ke qareeb ho gayi.

"Yeh bad-bhakt kha gayi mere bacche ko maar diya is ne mere husnain ko mere bete ko maar diya."

mohabbat to shayad woh pehley bhi nahi karti thi. magar saade chhe saal ki Umar mein ysne saggi maa ki shadeed

tareen nafrat sahi. un ka dimaghi tawazun durust na raha tha. raat ko roti tadapti bahar bhaag jati. husnain ki

qabar se lapat jati. kahin aur bas na chalta to jannat par phut parti. kamaal junaid alag gham se nidhaal the, magar Nafisa ki nisbat kuch muthammil the magar pehle se ziyada khamosh ho gaye the.

unhon ne pehle din jannat par haath uthaya tha magar ab to nazar utha kar bhi uski taraf nahi dekhte the. behne bhai ko yaad kar ke alag roti aur sochti sirf guriya hi to thi magar guriya saade chhe saal ki us bachi ke liye bohat ahem thi. jis ki zindagi mein pyar mohabbat aur rishton ki be intahaa kami thi.

"Yeh peda hi kyun hui? yeh peda hote hi mar kyu nahi gayi? mein ne is ka gala usi waqt kyun nahi ghoont diya."

aur woh dabi dabi si, roi roi si aankhon se unhen dekhati rehti. kamre mein chhupi rehti. maa agar pagal ho rahi thi to normal woh bhi na rahi thi. aik din to intahaa ho gayi thi. Nafisa ne gala daba kar use jaan se marne ki koshish ki thi. agar imaan bar-waqt mudakhlat na karti to shayad woh aisa kar bhi gujrti.

Unhi dinon nana aaye the. ghar ke mamlaat ki khabar unhen pehle bhi thi magar jab jannat ki haalat dekhi to raha nahi gaya. beti par baras parre gum sum damaad ko bhi aade hathon liya. phir uska samaan baandha aur usey apne sath le jane ke liye tayyar ho gaye.

"Yahan rahegi to husnain ki tarag yeh bhi mar jaye gi."

jate waqt unhon ne imaan se kaha tha. woh aankhon mein nami liye nazre chura gayi. bhai ka gham taaza tha. sadma gehra tha. sabar kisi ko bhi to nahi aa raha tha. use kaise aa jata? har chand usne jannat ke liye naram hona chaha magar na ho payi. Lahore se queta ka safar behad khamoshi se kata tha. woh bemaar thi, zehni tor par bhi normal na rahi thi.

Nana doctor the. agle chand din woh un ke clinic mein zair e ilaaj rahi thi. tabiyat sambhli to wo use ghar le aaye. woh itni

khauf zada aur harasa thi ke un se bhi darti thi. bolna to usne taqreeban chhor diya tha. khana baa-mushkil khati thi.

sote mein chikhte hue uth kar baith jati. un ki girift mein chilla chilla kar roti rehti. har bara se lagta amma use maar rahi hain. har bara se lagta husnain sidiyo se uski wajah se gir raha hai. nana ki agosh mein woh kuch sambhal jati. naram rawaiyya aur mohabbat se woh kuch behal jati. rote rote wo so jati magar chehre par takleef da asraat neend ki haalat mein bhi thehray rehte.

"w-wo meri guriya t-todna chahta tha." seene se lag kar, un ki kamij ko muthiyo mein bhinch kar woh roti.

"M-Mein ne nahi giraya tha, woh K-Khud gir gaya tha baba"

Nana uski zehni haalat ke paish e nazar kaafi pareshan rahe. unhon ne uska child psychiatrist se muaina karwaya. kuch arse tak sessions hote rahe. ilaaj chalta raha. rafta rafta woh normal hone lagi. magar   raton mein ab bhi rote hue uth kar baith jati thi.

uska zehen bhatkane ke liye aur zindagi mein use masroof karne ke liye unhon ne uska school mein admission karwa diya tha. kaafi had tak na sahi, magar waqt ke sath sath woh kuch had tak zaroor sambhal gayi thi.

---- •♡• ----