Chapter 18: •CHAPTER-17•

کِسٹ نمبر 3

𝑯𝒂𝒂 𝒕𝒉𝒊𝒌 𝒉𝒂𝒊 𝒎𝒆 𝒂𝒑𝒏𝒊 𝒂𝒏𝒂𝒂 𝒌𝒂 𝒎𝒂𝒓𝒆𝒆𝒛 𝒉𝒖, 𝒂𝒂𝒌𝒉𝒊𝒓 𝒎𝒆𝒓𝒆 𝒎𝒊𝒛𝒂𝒂𝒛 𝒎𝒆 𝒌𝒚𝒖 𝒅𝒉𝒂𝒌𝒂𝒍 𝒅𝒆 𝒌𝒐𝒊?

❏❏❏

Uski aankh khuli to raat ka daidh baj raha tha. uth kar baithte hue usne seenay par dhari kitaab coffee table par rakh di thi. Lahore se wapsi ke baad aksar aisa hone  laga tha ke woh sittting area mein hi so jaya karti thi. aur ab jab

shadeed sardi ka ehsas huwa tha to woh uth kar kamre mein aagai thi.

kamre ke andar daakhil hote hue use aika aik hi ghair mamooli pan ka ehsas huwa tha. Zarkar fanoos aur lamp roshan the. bed par be tarteebi se cushion yaha waha bikhare the. uski nigehain be ikhtiyar wash room ki janib uth gayi theen. adh khule darwaze se woh Faris ko wash besin par jhuka dekh sakti thi. woh khanste hue ulti kar raha tha.

Nichala lab yuhin be khayaali mein danoton taley dabatay hue woh sofe par ja baithi. woh kuch hi der baad bahar aaya tha.

madham si roshni mein uska chehra wazeh tha. muzamahil wujood nidhaal lag raha tha. rangat udi hui, hont khushk, be rang, nam ankhen betasha surkh aur kuch sooji hui theen. kapre shikan alooda, huliya bikhra huwa sa woh qadam utha rhatha to uski chaal mein wazeh larkharaht thi. phir woh khanste hue bed par dhey gaya tha. tangon par comforter pheilatay hue jannat usey bed par be qarari se karvat badalte aur be tarah khanste hue dekh kar kuch be chain hui.

pehla khayaal yahi aaya ke woh uske muamle mein nah hi parre to hi behtar hai. jaisa ke woh Lahore se wapsi ke baad se iradah kiye hue thi aur dosra khayaal yeh tha ke usey uth kar uski tabiyat se mutaliq istafsaar karna chahiye.

magar chahate hue bhi uski himmat nahi hui thi. woh aik baar phir uth kar wash room mein gaya tha. aik baar phir wash besin par jhuka huwa tha.

jannat ne iztirabi kefiyat mein wall clock par nigah dorhayi. 'kya saari raat uski yahi haalat rahi hai?' woh bahar aaya to jannat uske samne thi. kuch mutfakir aur matamail si.

"Is everything alright?" usne himmat kar ke poocha tha .

aik haath se deewar ka sahara lete hue usne darwaze ki knob ko thaame rakha. baar baar woh palken yun jhapak raha tha jaise aankhon par chhai hui dhund hataane ki koshish kar raha ho. manzar kuch wazeh huwa to jannat ko darashti se hatate  hue woh agay badha.

agley hi lamhey usa tawazun bigad gaya. usse qabal ke jannat usey sambhaal paati, woh poorey qad samait farsh par aa gira.

"FARIS, FARIS!." ghuti ghuti cheekh ke sath woh us par jhuk gayi.

Gaal thapthapate hue, aawaz dete hue usey hosh mein laane ki sae karne lagi. mehez chand lamhoon ke liye paas out honey ke baad usne jhat se ankhen khol di theen. agley hi pal usay khansi ka shadeed dora para. uske chehre aur gardan par surkh dhabbay ubhray hue thay. surkh aankhon se pani beh raha tha.

'allergic reaction' pareshani ke aalam mein jannat ke zehen mein pehla khayaal yahi aaya tha. phir usne taizi se uth kar side table par rakhi tablets ka jaiza liya. pani ka aadha glass bhi rakha tha. goya woh allergy ke liye medicine

le chuka tha magar 'usey abhi tak afaqa kyun nahi huwa tha? agar Bar waqt afaqa nahi huwa tha to..'

yakdam uske andar khatre ki ghanti baji. side table se usne faris ka mobile utha liya. uske dahine haath ki finger prints se lock khol kar Dr. bukhari ka number contacts me se nikala.

baa-mushkil saans lete Faris buri tarhan se khasey jaa raha tha.

woh ab Dr. bukhari se mukhatib thi. unhen uski soorat e haal se aagahi de rahi thi jabke matli ke shadeed ehsas ke sath hi faris ko yak dam se ubkai aayi thi. woh uthna chahta tha magar Bar waqt aisa nah kar saka. majbooran usey farsh par hi jhukna para. Dr. bukhari se baat kar ke woh aik baar phir uski taraf mutwajjah hui thi.

"It's ok! pareshan mat ho, relax raho"

woh uski pusht thapthapate hue keh rahi thi.

"Dur raho!"  kuch ghusse, kuch jhnjhlaht aur kuch bebasi ke aalam mein usne baen haath se jannat ko paray dhakela. andaaz aur ravaiye se nafrat aur jhalahat numaya thi.

jannat dukh aur sadme se usey dekh kar reh gayi. bohat koshish se woh deewar ke qareeb huwa taa ke sahara le kar baith sake. dahina haath gardan par tha. woh apne sweeter aur shirt ke button kholna chahta tha magar khol nahi parha tha.

yeh kaam bhi jannat ne sar-anjaam dena chaha tha aur usne aik baar phir, shadeed ghusse aur chirr chiray pan se usey paray dhakela tha.

"Stay away from me!"

Jannat ka dimagh ghoom gaya. agley hi lamhay is ne faris ke haath jakad kar pakde the.

"Is haalat mein bhi tumhe apna attitude dikhaane ki pari hai. is haalat mein bhi?"

Woh uspar phatt padhi, surkh padtee aankhon mein sadma liye faris wajdan usey dekh kar reh gaya. mehez aik lamhey ke liye usey saktah huwa tha. Us ke baad use khansi ka dora para to woh haal se be haal ho gaya. jannat ne taizi se uske sweeter aur shirt ke oopri button khol diye. gardan se neechey seene par bhi surkh nishaan they.

"Mein ne Dr. bukhari se baat ki hai. woh abhi ate honge." woh is se keh rahi thi.

"kya tum koi aur dawa lete ho? Severe  reaction" faris ka sar jhuk gaya. nam khuli aankhon mein aik khaali pan tha. chehra safaid khans khans kar uski haalat ab-tar ho chuki thi.

"Faris ..?" Uska sar uthate hue, gaal thapthapate hue usne aik baar phir usey mutwajjah kiya tha. magar woh mutwajjah nahi huwa tha. koi jawab bhi nahi de raha tha.

"Faris meri taraf dekho, meri baat suno" aika yak hi uski gardan dhulak gayi. wujood be jaan sa ho gaya.

"FARIS?"  jannat ke halaq se ghutti ghutti cheekh niklee.

Aankho mein khaufo khraas phail gaya.

dahna haath muh par jamaye woh mathos si ho kar peeche hatt gayi thi. Faris saans nahi le raha tha. uske wajood mein ab koi harkat nahi rahi thi.

woh ro dainay wali ho gayi. Dr. bukhari abhi tak nahi puhanche the. Uski kuch bhi samajh mein nahi aa raha tha ab kya kare?

"Jaanat!"

usey yun laga jaisey nana ne kandhe par haath rakha ho. himmat badhayi ho. hosla diya ho. aik sath kayi manzar uski aankhon mein lehraye the. khud par taari jamood ko torte hue woh yak dam harkat mein aayi. faris ko seedha lita te hue usne nabz check ki, phir usey CPR dena shuru kiya.

behti hui aankhon aur leraztey dil ke sath woh usey tab tak CPR deti rahi jab tak Dr. bukhari nahi aa gaye the. Uski haalat ke paish e nazar usey fori hospital le jana para.

Emergency room tak wo uske sath sath thi. lekin is ke baad thanday sard corridor mein khari woh tanha hi doctors ke amle mein afra-tafri dekhne lagi. waqt badal gaya tha lekin khauf usi andaaz mein usi rastay se aa lipta tha. ehsasat yun hue thay jaisey wohi aziyat aik baar phir apna aap dohra rahi ho.

aakhri baar is tarah ki emergency situation mein woh apne nana ke sath aayi thi. unhen heart attack huwa jo jaan lewa saabit huwa tha. usey yaad tha woh un ke chehre se safaid chadar hata kar doctors ki minnaten karti rahi thi ke woh unhen zindagi ki taraf wapas le aaye. Usdin jab usme nana ka haath pakra tha to woh sard tha. Faris ka haath bhi to kitna thanda ho raha tha.

usne Dr. bukhari ko ICU se bahar nikalte hue dekha to us mein itni himmat nahi thi ke woh khud uth kar un ke paas jati.

"Fiqar ki koi baat nahi hai, woh khatre se bahar hai." unhon ne qareeb aakar kaha to usey laga jaisey kaafi der baad usey saans aaya ho.

"Agar aap usey CPR na deti to ham usey nahi bacha paate." aik lamhay ki takheer bhi usey mout ke ghaat utaar sakti thi.

"usey kya huwa tha?"

"Cat allergy! is baar reaction ziyada shadeed ho gaya tha."

"Cat allergy?" jannat ki ankhen pheli.

woh ab barah e raast uske sath faris ki condition discuss kar rahe the, sath sath tasalli aur dilasa bhi de rahe the.

"Mein is ke liye auto injector likh kar duga. is tarah ki emergency situation mein faida mand saabit hoga. tabiyat is had tak nahi bigre gi. is liye pareshan hone ki zaroorat nahi hai."

Dr. bukhari ja chuke the. magar woh apni jagah pareshan khari reh gayi thi. agar woh kamre mein nah jati, bar waqt dimagh kaam na karta aur woh usey CPR bhi na deti to shayad use agey jannat se kuch bhi socha na gaya. usne mrs. Shirazi se phone par baat ki jo faris ke liye had darja fiqarmand nazar aa rahi theen. un ka bas nahi chal raha tha woh abhi uth kar uske paas hospital aa jaye.

"woh ab khatre se bahar hai auntie! usey jaisey hi hosh aaye ga, mein aap ki baat karwa dugi, aur aap bilkul pareshan na ho, mein huna uske sath!" Usne kaha tha.

aur uska yeh kehna hi mrs. Shirazi ko mutmaen kar gaya tha. un se baat karne ke baad woh kaafi der tak be qarari se corridor mein hi tehlti rahi thi .

usey jab mukammal tor par hosh aaya tha to dharti par andheraa phail chuka tha. kamre mein nilgo bulb jal raha tha. jis ki madham si roshni mein usey edraak huwa tha ke woh hospital mein hai. Oxygen mask utaar kar gardan par thehrte hue uski nigah be sakhta jannat kamaal ki taraf gayi thi. dayen taraf kursi par baithe bistar ke kinare sar tikaye jane kab uski aankh lag gayi thi.

apna dahina haath usne ghair mehsoos andaaz mein peeche hata liya tha jo us ke balon ko chhu raha tha. yaka yak usey seene mein dard ki lehar uthti mehsoos hui. ankhen moonde woh agley kayi lamho tak gehri sansen laita raha magar bawajood koshish ke bhi apni krah nah daba saka.

jannat ne harr bara kar sar uthaya. phir foran uth kar uski taraf mutwajjah hui. Us ke thakan zada, nidhaal chehre ki rangat zard thi. aankhon ke bhaari papoote (eyelids) suje hue lag rahe the. lekin gardan aur seene par ab rashes nahi the.

"Ab kaisi tabiyat hai?" woh pooch rahi thi .

"Mummy kaisi hain?" aawaz bhaari aur kuch had tak badli hui thi. jannat usey kuch herat se dekh kar reh gayi .

nim ghunodghi ke aalam mein usey yaad thi bhi to uski maa! fikar ho bhi rahi thi to sirf unki.

"Woh bilkul theek hain" jhuk kar usne madham aawaz mein tasalli di.

"Tumhe kuch chahiye?"

"Pani" usne bhaari tanaffus ke beech kaha.

mustadi se glass mein pani undail kar us ne faris ki gardan ko sahara de kar glass labon se laga diya. usne chand ghoont laine ke baad takleef se chehre ke zawiye bigharte hue glass dur hata diya. Galey ki soozish aziyat ka baais ban rahi thi.

chand lamho tak khaali nazron se kisi ghair marayi nuqte ko dekhte rehne ke baad usne ankhen band kar li dobara usey hosh din ke ujale mein us waqt aaya tha jab mashriqi deewar ki tamam khirkion par se jannat kamaal ne parde khech kar hata diye the. dhoop ki sunehri kidnein uske chehre par parney lagen to soti jaagti kefiyat mein usne ankhen khol di theen. khirki se bahar sar nikaal kar jane kise zoro shor se haath hila kar woh haste muskurate chehre ke sath seedhi hui to faris wajdan par nazar parte hi is ki muskurahat simat gayi.

woh phool jinhein woh haath mein pakde thi, un ki dandiya bhi dhalak si gayi theen. faris ne button daba kar bistar ko sitting position mein add just kya. woh apni jagah khari yaka yak ajnabi ho gayi. khamosh ho gayi. sapat ho gayi. kuch der pehley tak uske chehre par jitne bhi rang bikhare the, woh ab aankhon mein bhi na rahey the.

shaan be niyazi se usne apna rukh badla  guldan mein phool daale aur bahar nikal gayi. dobara uski aamad dr. bukhari ke hamrah hui thi. magar woh khud andar nahi gayi thi .

"Mein ab theek hoon, ghar jana chahta hoon." check up ke baad woh dr bukhari se mukhatib tha. aur woh naakhun ke sath khelti darwaze ke sath lagi khadi thi.

"Is par hum kal baat karen ge, filhal tum rest karo. dr. bukhari keh rahe the.

"Aap samajh nahi rahay. mujhe kal meeting..!"

"FARIS!" unhone kuch sakhti se uski baat kaati thi.

"Mere khayaal se is waqt tumhe apne liye thori si sanjeedgi dikhani chahiye. tumhe andaza nahi hai kal tumhe kisi haalat mein hospital laya gaya hai."

doosri taraf khamoshi chhaa gayi.

"Tumhari biwi bohat bahadur hai, aisi situation mein to family members hosla chore dete hain, par usne himmat nahi haari!"

darwaze par khari jannat kamaal ne apna dahina haath peshani par mara

'yeh dr. bukhari uff! Credit dena zaroori tha kya?'

"Ambulance ke aane tak is ne tumhe CPR diya." woh tafseelat mein jarahe the. kuch ghabra kar woh un ki baat qata karne ko taizi se andar aagai. dono ne sar utha kar usey dekha.

Dr. bukhari muskuraye. woh apni udi hui rangat ke sath muskura tak nahi saki. us ne faris ki taraf dekhe baghair mrs. Shirazi ka number mila kar mobile uski taraf barha diya.

"Auntie se baat kar lo." phir isi saraiyat se woh kamre se nikal gayi thi.

Hospital ke VIP room mein woh coach baithi saib kaat rahi thi jab achanak hi usey apne chehre par nigahon ki tapish ka ehsas huwa tha. be sakhta sar uthaya to nigahein faris se takra gayeen jo sapat chehre ke sath usey hi dekh raha tha. usne nazron ka zavia badalney ki koi koshish nahi ki thi. jannat ne ulajh kar nazre hata li.

aisa pehley to kabhi nahi huwa tha ke us ne yun usey apne hisaar mein liya ho. chand lamho ke baad usne phir sar uthaya. woh ab bhi usey hi dekh raha tha. chehra be ta-assur tha magar aankhon ka ta-assur ghair wazeh na gussa, na narmi, na sakti, na adawat pursoch nigahon mein kuch aur tha jin par jaib si ghabrahat taari ho gayi. kahin woh uske thapar ko yaad kar ke intiqam ka to nahi soch raha. Us ke chehre ka rang faq huwa.

yeh baat to woh bhool hi gayi thi. ab woh fikron mein par gayi. 'mein usey zahir nahi honey dun gi ke aisa ka kuch huwa hai. us ne socha. saaf muqar jaoon gi. bolon gi tumhara vahm hai. tumhe apna hosh nahi tha to thapar ka hosh kahan se agaya?'

himmat mujtma kar ke usne faris ki taraf dobara dekha. is baar sahih maeno mein faris ki nigahon ka ta-assur us par wazeh huwa tha. shayad tehzheek ka ta-assur tha. Isthijaya nigehain theen. kuch to tha kuch to tha aag aur barf jaisa munjamid padhta jala kar raakh karta huwa. jannat ke lab bhinch gaye. bhanwain suker gayeen. Lahore se wapsi ke baad khud se kiye jane wale saars wade usey aik hi lamhey mein yaad aa gaye. In hudood o quyood aur faislon ka bhi idraak huwa jin ki Paidaish mein usne wajdan house mein apni naqal o harkat ko kam kar diya tha. usey yaad aaya. chobees ghantey pehlay tak woh faris wajdan ki taraf nazar utha kar dekhatii bhi nahi thi aur yeh bhi ke usne khud ko uske ghar mein ajnabi musafir kar liya tha.

apne talluq ko jaisey mrs. Shirazi se shuru kar ke mrs. Shirazi tak hi mehdood kar liya tha. magar ab? ab woh pichlle chobees ghanton se uske sath hospital mein mojood thi aur faris wajdan ki mrs. honey ke naatey kuch kaam woh bhi sar anjaam de rahi thi. yani ke uske sath sath rehna. yeh saib

kaatna aur us par bhi faris ki nazrain woh janti thi faris wajdan kabhi bhi uske bare mein missbit nahi soochey ga. woh har baar aur hamesha ki tarah uske uthaye gaye har iqdaam ke peechey koi gharz dhoondega. is se qabal ke woh ab bhi aisa hi kere, usey uski nazron mein giraye, toheen kare ya phir uski izzat e nafs par chot kare, behtar hai woh kuch baatein khud hi us par ayaa kar de.

"Yeh mat samjhna ke tumhe impress karne ke liye saib kaat kar de rahi hon, Dr bukhari ka hukum hai." sakht lehja tha. gussa tha. Kafgi thi.

"Ab mein tumahre dil mein apni jagah banane ki koi koshish nahi kar rahi hoon, is liye tum mujhe tazheek amaiz nigahon se mat dekho."

bistar par aaraam de haalat mein nim daraaz woh usey khamoshi se dekhe gaya. usne doosra saib utha liya. usey lab bhinch kar Nafasat se katne lagi. jaise saza kai jati hai bilkul waise hi.

"Mein ne tumhari jaan nahi bachaai khud ko bewa hone se bachaya hai. apna bhala socha hai."

"Warna jis tarah tumhe meri koi parwah nahi hai bilkul usi tarah mujhe bhi tumhari rati barabar parwah nahi hai."

Sar utha kar sard nazro se faris wajdan ko dekhna chaha. mobile screen par nigah jamaye uska munbassim chehra.

jannat sakit ho gayi.

'woh muskura raha hai? ba khuda woh muskura raha hai? kis liye? koi lateefa sunaya hai usne?'

"Aur yeh bhi mat sochna ke.."

"Mein kuch nahi soch raha."

apni baat adhuri reh jane par aur Bar waqt is ka response mil jane par woh chup hui thi. woh apne mobile ki taraf mutwajjah tha. kuch type kar raha tha. yaqeenan. andaaz ab masrufiyat liye hue tha. kuch der pehlay tak jo aik lamhay ke liye is ke chehre par tabassum bikhra tha, uski jagah Azli sard Mehri ne le li thi.

woh muztarab hui phir saib ki plate is ke bistar par rakh kar palatne hi lagi thi ke is ka dahna haath faris ki girift mein agaya. jannat ka dimagh jaise bhak se ura jhatke se murr kar usne herat o be yakeeni se usey dekha.

"Isi haath se thapar mara tha?"

jannat ke hosh urr gaye. aankhon mein khauf o khraas phail gaya. oopar se uski gehri aankhon ka.  barf aur aag ka mushtarqa ta-assur. jannat ki reerh ki haddi mein sard lehar daud gayi. woh jo soochey ta-assur hue thi ke foran se mukar jaye gi, datt jayegi, la jawab kar degi.

"To.. to.."

"Mera haath chorho!"  kuch methus ho kar usne apna haath khincha.

Us haalat mein bhi faris ki girift kisi aahini shikanje jaisi thi. halaanke dr bukhari usey sirf isiliye discharge nahi kar rahe the ke usey bohat kamzori mehsoos ho rahi thi.

"Pehlay jawab do!"

"Mein jawab daine ki paband nahi!" zara sa roab dikhana chaha, natijtan girift sakht ho gayi.

"Nahi, yeh wo wala haath naahi tha." be basi se chillayi. halanke mujrim haath yahi tha.

"Theek hai! doosra hath do!"

"Pehle tum yeh chhoro!"  apni kalayi ghuma kar khinchte hue woh bohat khauf zada lag rahi thi.

"Pehle tum doosra hath do." girift ke sath sath Faris ka lehja bhi sakht huwa tha.

jannat ne poora zor laga diya magar faris ne haath nahi chorra. aik lamhay ke liye jaisey koi manzar aankh ke pardo par lahraya.

sidra ki shadi!  parking area! raat ki tareqi aur Zaman Safdar woh chehra Zaman ka chehra tha. aur girift bhi jaisey uski hi thi. aik lehze ke liye usey laga agar usne haath na chhuraya to mar jaye gi. aur usne chhurane ki koshish bhi ki thi. us raat bhi aik tamasha bana tha. Us raat bhi aik kahani uski zaat se mansoob hui thi.

Zaman ko thukraye jane ka ehsas me us thapar ke mushtael kiye hue tha jo rohina bachi ke ghar un ke terris par us waqt para tha jab baghair ijazat woh us ke kamre mein agaya tha. yeh un dinon ki baat thi jab uska rishta Zaman se takreeban tay ho chuka tha. magar faris se shadi ke baad se woh jaisey mauqe ke intzaar mein tha ke kab woh jannat kamaal se apni toheen, be izzati aur thappar ka badla le sake. aur yeh mauqa usey kab mila tha?

kuch der pehley tak woh jo mazboot nazar aa rahi thi to isi saraiyyat se mitti ke dhair ki tarah bhur bhura bhi gayi.

"Please chhor do please!" Wo chote bacche ki tarah yak dam phoot phoot kar ro di. uski aankhon ki nami khauf wehshat aur haath chhurane ki deewana waar justju.

Faris ki girift yak dam dheeli par gayi. roti siskti aankhon ke sath apna haath churra kar woh isi waqt kamre se nikal gayi thi.

---- •♡• ----