Chapter 82: ּ ֶָ֢.CH81

•••

Zabt jitna aur jis qadar tha uski hadd khatam ho gayi. Asaab sal aur hawas maflooj ho gaye. Gusse aur inteqam ki aag mein jalte hue usne sab tahes nahes karne ka irada kar liya. Jis tabahi ko woh sirf apni soch tak mehdood rakhta tha, us tabahi ko haqeeqat mein laane ka faisla kar liya. Azam Shirazi ko Aarzoo se khatra tha. Woh usey uski pahunch se door rakhe hue the. Usne soch liya, woh unse mil kar rahega. Har surat, har haal mein…

Ek zidd ban gayi ke ab use har woh kaam karna hai jisse roka gaya hai. Har woh hadd cross karni hai jiska paband kiya gaya hai.

Sham chhe baje ki train pakar kar woh Edinburgh rawana ho gaya tha. Uske paas ek mukammal address tha. Charity Fashion Week ka schedule bhi, jisme Aarzoo Jahangir agle hafte shirkat karne wali thi. Woh ek celebrity thi. Uski har khabar fashion magazines aur akhbarat ki zeenat banti thi. Aaj kal woh apne shohar ke saath Edinburgh mein muqeem thi.

Usey jahan jaana parega woh jayega, jisse baat karni paregi woh karega. Usne socha. Woh jungle mein aag ki tarah yeh khabar har jagah phaila dega ke woh Aarzoo Jahangir aur Haroon Shirazi ka beta hai. Woh apne andar chalte hue us alao mein har ek ko girane wala tha. Sab raakh honge, sab barbaad honge.

Siyah jeans par aasmani rang ka sweater, us par siyah rang ka coat zeb tan kiye, woh rail gaadi mein khidki ke saath sar lagaye tareeki mein roshan lakiro ko dekhta ja raha tha.

Usne ghar chhod diya tha.

Yeh pehla marhala tha, pehli koshish thi, pehla qadam tha. Aage sab tareek aur andohnak tha. Uska dimagh khaali ho raha tha. Usey apne faisle ki bhi theek se samajh nahi aa rahi thi. Woh kya chah raha hai, yeh bhi nahi.

"Mujhe pata tha, main ek saanp ko doodh pila raha hoon. Mujhe pata tha, tum ek din zarur apni asliyat dikhaoge."  Unki nafrat ki tapish wujood ko khilane lagi. Wujood angaron ki maanind sulagne laga.

Ek aakhri koshish...

Wahshat naak khayalat ke hujoom mein bebas hote hue usne apna sar thaam liya. Usne subah se kuch nahi khaya tha. Bhook ka ehsaas phir bhi nahi ho raha tha. Ujlat mein ghar chhod diya tha. Paise woh saath nahi laya tha. Jaane ka kiraya tha, wapas aane ke liye koi raqam nahi thi. Shayad usey aana bhi na pare. Usne socha aur soch kar aankhe band kar li. Lamho ko ginte, saaniyo mein ulajhte, kabhi khidki se bahar aur kabhi andar dekhte usne saari raat aankho mein guzar di.

Sham barah baje woh Edinburgh pohnch gaya. Wahan se matlooba address tak usay paidal chal kar jaana pada. Woh phone par apne University fellow se musalsal rabte mein tha, jisne apne cousin ki madad se use tamaam maloomat pohunchayi thi.

"Mujhe nahi lagta woh tumhein andar jaane denge. Bohot sakht security hogi. Press ko bhi jaane ki ijaazat nahi!"

Usey aakhri message moosool hua. Jise parh kar usne mobile jeb mein daal liya tha. Raat ki tareeki mein Aarzoo Jahangir ka sheesho se bana aali shaan ghar roshniyo mein nahaya hua nazar aa raha tha.

Late night party chal rahi thi. Woh apni garage se andar ka manzar ba asani dekh sakta tha. Kai mashhoor aur karobari shakhsiyat ko mad'oo kiya gaya tha. Mukhtalif qoumiat ke log usey nazar aa rahe the. Sarsabz lawn mein kursiyo aur mezon ke itraaf mein Mulazim tray uthaye mashroob pesh karte ghoom rahe the. Door kahin piano baj rahe the. Bohat se log abhi bhi aa rahe the. Un ke liye darwaze khol kar unhein andar jane diya ja raha tha. Woh jahan tha, wahan khada tha. Bairooni gate tak jane ki, apna taaruf karwane aur Aarzoo Jahangir ka naam lene ki usmein himmat nahi rahi thi. Usey ek dum se ehsaas hua. Kisi aur se pehle usne khud ko hi musibat se do char kar liya hai.

Woh sadak ke us paar khada tha. Himmat mujtama karte aage badha. Ek taraf Azam Shirazi the. Doosri taraf Aarzoo Jahangir thi, usey ab in dono ko hi tabah karna tha. Aarzoo Jahangir ka shohar Farooq Habib lagta hai Azam Shirazi ke karobari harif the. Ek unchi pahunch aur asar o rasookh rakhne wale insaan tak yeh baat pohnchakar woh unki zindagi mein bhonchal la sakta tha.

Kisi qadr koshish se woh gate tak pohnch gaya tha. Uske paas dawat nama nahi tha. Guards kisi soorat usey andar jane nahi de sakte the. Baqi sirf ek taaruf hi baachta tha. Aur is taaruf ko apne labo par late uska dil katne laga tha. Zabt mitne laga tha.

Woh kya kar raha hai?

Kyun kar raha hai?

"Main Aarzoo Jahangir se milne aaya hoon!"

Apne aap se ladte hue sar uthakar kaha. Lagta hai usey is ka koi madah samajh kar hatane ki koshish ki ja rahi thi.

"Main uska beta hoon, mujhe us se baat karni hai"

Apna aap chhudate hue cheekh kar kaha tou woh dono kuch be yaqini se aik dosre ki shakal dekhne lage. Usne baat hi kuch aisi kar di thi. Siah fam shakhs ne doosray ko ishara kiya tou woh andar chala gaya jabke doosra shakhs usey wahan roke khara tha. Das se pandrah minute ke baad doosra aadmi wapis aaya.

"Sorry woh is waqt masroof hain, kisi se nahi mil sakti...." Jawab diya gaya.

Woh kisi nahi, unka beta tha.

Aawaz bazgasht ban kar uske andar gonji. Chhanke se andar kuch toota. Arzo Jahangir se usey koi ummed, khush gumani nahi thi, par bhi dukh pohancha. Ankho mein nami ke saath hi ek dum se surkhi phail gayi.

"Pichle kuch mahino se Aarzoo Haroon se milne ki koshish kar rahi hai, tumhara kya khayal hai. Kis liye? Usey ab kya chahiye?"

"Mujhse milne aayegi tou main tumahara death certificate dikha duga. Qabar par jana chahe gi tou woh bhi taiyar hai"

Us ne mushkil se saans lete hue haath uthaya aur ruk gaya.

Geheri saans le kar woh peeche hataa. Daye jaanib qadam uthata gaya, door hota gaya.

"Tumhara kya khayal hai, us ne Haroon se talaaq lene ke liye mujh se kitne paise liye honge?"

Woh yahan karne kya aaya hai? Apne andar ke shor se zakh ho kar tang aakar khud ko jhunjhor daala.

Aarzoo Jahangir....

Azam Shirazi ......

Zabt se surkh padta chehra ishtial mein aata wajood .....

"Tum ne us ke bete ko dekha hai.…"

"Kis ke bete ko....?"

"Aarzoo Jahangir ke bete ko..."

Qadamon ki harkat tham gayi. Jhatke se ruk gaya.

Gardhan mod kar dekha. Gaadi park kar ke do ladkiya baahar nikli thi. Dono ka rukh samne baahri gate ki taraf tha.

"Maine to suna tha, beta paida hua hai. Aarzoo Jahangir is baare mein koi baat nahi karti. Media par bhi nahi. Naam bhi nahi bataya. Khabar bhi nahi di.…"

"Suna hai, us ke shauhar ko yeh sab pasand nahi. Is liye woh apni private life bilkul private rakhna chahti hai.…"

"Tum ne us ke bete ko kahan dekha…?"

Aawaze madhm ho gayi. Us ka zehan ma'uf tha. Aankho mein be-yaqini thehri thi. Angaro jaisi tapish wajood mein utarne lagi thi.

Aqab mein siyah gaari ke brake ek dam se chirchiraye.

Driving seat par Raahim baitha tha. Passenger seat se Haider baahar nikla. Do saathi aur bhi the. Azam Shirazi ke karande jinhein qabr tak peecha karne ka hukm tha. Us ka ghussa ek dam se ood kar aaya.

"Let go off me!" (Mujhe chhorh do!)

Usey zabardasti khench khench kar, us ki had dargeza musawamat aur ehtijaaj ko kisi soorat khate mein na laate. Apne saath le gaye the.

•••

W

oh gaadi mein aqbi nashist par do mustando ke darmiyan phansa baitha tha. Seene par baazu bandhey hue the. Aankhein ishtaal se surkh ho rahi the. Naak se khoon beh raha tha jise aasteen se us ne aik baar phir saaf kiya tha.

Raahim gungunate hue driving kar raha tha. Jabke Haider apne chhote sahib ke moun par aik adad ghusa maar kar bohat buri tarah se pachtara raha tha. Mazrat bhi kar raha tha. Pareshan bhi ho raha tha.

"Jis tarah us ne hume khwaar kiya hai, us hisaab se hi totally deserve it!" Steering wheel par gript jamaye Raahim ne usey tasalli dena chahen.

"Don't worry! Azam sahib kuch nahi kahenge."

"Unhone kaha tha, ladke ko kharaash bhi nahi aani chahiye." Aawaaz ko pust kar ke us ne Rahem ko bataya.

"Kharaash to waqai mein nahi aayi." Back view mirror se Faris ko dekhte woh mehfooz hua.

"He is totally fine!'"

Haider machine aur robotic sa guard tha. Us ke tasuraat hamesha aik se rehte the. Magar pehli baar uske tasuraat mein be intihā fikar nazar aa rahi thi. Us ne box se kai tissue nikaal kar Faris ki taraf badhaye.

Jiska khoon abhi tak nahi rukha tha.

"Aap theek hain?" Bhari awaaz ke saath poochha.

"Apni shakl gum karo!" Tissue kheench kar woh ghurraya.

Pusht gaah ke saath kamar kaate hue gardan ko ooper kar ke tissue naak par rakha.

Us ke pehlu mein jo do guards baithe the, unhone hanooz uske baazoo par grip jamaye rakhi thi.

Raahim ka hukum tha. Usey andaza tha ke zara si azadi mili to woh sab se pehle us par jhpte ga. Gaadi control se bahar hui to sab ke sab accident mein mare jayenge. Ab usey parwah nahi thi to kya hua. Baqi sab to zinda hi rehna chahte the.

Edinburgh se London tak saat ghanto ka safar tha. Raahim aur Haider baari baari gaadi drive kar rahe the. Subah ke saat baje woh London pohanche the. Begonia House ke bajaye woh usey kisi aur jagah le gaye.

Ek taweel imarat ki, ghaliban koi 13th floor thi. Tareekiyo mein ghira hua ek poora apartment tha. Unhone usey ek kamre mein band kar diya.

Azam Shirazi ko bhi ittila pohanchadi, woh usey le aaye hain. Ain mouqe par pohanch gaye the. Bachaat ho gayi thi. Uski mulaqat Arzu Jahangir ya uske shauhar mein se kisi ke saath bhi nahi ho sake thi.

Raahim bahar khada phone par baat kar raha tha aur andar woh farsh par rozana baitha tha. Ghutton par bazoo khe. Kamray ki khamoshi mein apne andar ke wahshat naak shor ko sunte hue kat-ta hua.

"Faris Wajdan ne ghar chhod diya tha. Usne Aarzoo Jahangir se milne ki koshish ki thi."

Azam Shirazi ne Jameela Dawood ko bataya to woh sada se apni jagah baithi rahi gayi. Samaat par yaqeen nahi aaya tha. Faris aisa kaise kar sakta tha. Woh aarzoo Jahangir se mutalliq uske ehsaasat se waqif thin. Uski nafrat se, aziyat se, aur intiqami jazbaat se bhi.

"Faris aisa nahi kar sakta!" Unke lab hille.

Magar woh aisa kar chuka tha. Unhone tafseelaat se aagah kiya to woh kuch dair tak bol nahi sake. Pareshani mazeed barh gayi. Unhone usey kahin qaid kar rakha tha. Is khayaal se dil ko takleef hone lag gayi.

"Bachcha hai, Baba na samajh hai. Maaf kar den usey, nazar andaaz kar de..."

Woh uske liye hadd darja fikar mand aur pareshan nazar aa rahi thin. Azam Shirazi ne mud kar apni bahu ko dekha. Arsa hua, unhone ab hairaan hota Chhorh diya tha.

"Yeh jaante hue bhi ke uski wajah se Alizeh aur Hamad ka rishta khatam hua..." Danista ruk kar gehri nigaho se unhein dekhne lagay. Khud haqeeqat se waqif the. Magar Jameela Dawood abhi bhi andhere mein thie.

Aise hi bas unhein jaanchna chah rahe the. Kaisi mohabbat thi unki Hamad aur Faris mein koi farq nahi karti thin.

"Main abhi tak is mamlay ko samajh nahi paayi to kya keh sakti hoon lekin yeh baat confirm hai, Faris aisa

nahi hai. Baba! Woh to bilawajah kisi se baat tak nahi karta. Affair chalana to door ki baat hai." Mutma'in andaaz apnate hue unhein qail karne ki koshish ki.

"Aap please ek baar khud usse baat kar lein. Uski sun le. Mujhe yaqeen hai asal baat kuch aur hogi."

Woh gehri saans le kar pusht par hath bandhe khidki se bahar dekhne lagay. Tareekiyo mein door kahi battiya jalti hui nazar aa rahi thi. Sheeshe par phailte barish ke qatro mein unka aks jhalk raha tha.

"Jaanti ho, woh Aarzoo ke paas kis liye gaya tha?"

Jameela Dawood ke ang ang se bechaini aur iztirab numayan hone lagay. Woh baat kar rahe the to main ajeeb si chubhan thi. Lehjey me Aziyat bhari chubhan.

"Apni maa ki tarah hamari kamzori ka faida uthana chaah raha tha woh. Isse andaaza laga lo tum. Woh humare liye kitna khatarnaak hota jaa raha hai."

Woh intehai sanjeedgi se bohat gehri baat keh gaye the.

"Woh ghusse mein aa gaya hoga. Dukhi ho jaye to bohat jazbaati ho jata hai. Aap please maaf kar den usey. Ho sakta hai woh bas milne gaya ho? Maa hai uski. Usne socha ho ke shaayad....." woh tazadub ka shikar hoti ruk gayi.

"Ke shayad...?" unhone gardan mod kar sawal kiya.

Woh khamosh ho gayi. Jis aurat ne maa hote hue usey chhod diya tha, woh uske paas kam az kam panah ke liye nahi ja sakti thi.

"Tum abhi bhi uski taraf daari kar rahi ho?" Unke labo par muhim ki muskurahat ubhri. Jameela ne maazrat khwahana andaaz mein sar jhuka liya. Woh rukh mod kar khidki se bahar dekhne lagay.

"Faris ke saath ab kya karta hai, iska faisla hum London ja kar karenge...." Chand lamho ke toqaf, Jameela Dawood ke dil ko dhadak ka sa lag gaya. Apne sar ki sazaon aur takhtiyon se waqif thi woh. Jane ab woh Faris ke saath kya karne walay they.

"Ho sakta hai humein Haroon ko bhi bulaana pade..."  Unhon ne kuch soch kar mazeed kaha. Unke aakhri jumle ne Jameela Dawood ko sakte mein daal diya. Aisa pehli baar hua tha ke Faris ke kisi masle mein woh Haroon ka zikar kar rahe the.

"Kya koi hatmi faisla mutawaqqa hai?" Unka dil shiddat se dhadak uthaa tha.

•••

Writing table par Hammad be-had khamosh baitha tha. Haath mein qalam tha. Khali safha khula pada tha. Tik tik ki awaaz goonj rahi thi. Nigahen kisi ghair marai nuqte par tehri thi. Lab sakhti se bheenche hue the, Usne kuch soch kar tasavvur karte hue qalam ko is kashti se bhencha tha ke khatak ki awaaz ke saath woh do hisse ho gaya tha. Nigahe us tasveer par thehr gayi thi jo samns hi stand par rakhi thi.

Woh aur alizeh Shirazi... Manzar wazeh tha. Muskurahat asli thi. Jazbaat haqiqi the.

Alizeh Shirazi ke saath uske rishte ki baat khatam ho chuki thi. Azam Shirazi ne aaj subah usey Agaah kar diya tha. Be-khabar hota to wajah daryaft karta. Ba-khabar tha to chup raha. Gham aur ghusse ko andar dabaye aag mein sulgta hua

Raakh hota raha.

Nigahen baar baar apni maan ki taraf uthti rahi. Unki pareshani uski samajh se bahar hoti rahi. Ghar ka

Mahaul ajeeb ho chuka tha. Badon ke darmiyan koi baat thi jise isse posheeda rakha ja raha tha.

Khasoosan dada aur Uski kami wadda ab kisi masle mein uljhay huay they. Rishtay ki baat khatam kar ke yun ho gaye jaise kuch hua hi

Na ho. Jo asar us par Faris Wajdan ki wajah se par raha tha, usse sab be-khabar nazar aa rahe they. Usne qalam phek diya. Balo mein ungliyan phanse kuch dair tak jhuka raha.

"Itni jurat ka muzahira karne wale is mulazim ladke ko dada ne kisi surat maaf to nahi kiya hoga. Kifalat khatam kar di hogi."

Woh soch raha tha. Soch kar khud ko mutmain kar raha tha. Apne dada se woh uske mutaaliq koi baat nahi kar sakta tha. Mangni khatam hone ki wajah uske ilm mein thi, woh is baat ko zahir nahi karna chahta tha.

Ab woh kamre mein daye baaye tehal raha tha. Faris Wajdan ki mohabbat ka aitraaf karti awaaz baar baar samaat se takrane lagi thi.

Wujood sholon mein lipat raha tha. Chehre par ghaz thahr gaya tha. Yeh dukh, yeh sadma bardasht se bahar hone laga. Yeh tohin hawaso par bhaari hone lagi.

Alizeh ko usne abhi tak phone nahi kiya tha. Sawal, shikwa ya koi shikayat nahi ki thi. Jawaban usne bhi rabt rakhne ki koshish nahi ki thi.

Apne cousin se ilm hua tha, woh Pakistan ja chuki thi. Batana bhi zaroori nahi samjha tha. Unki mohabbat bhari dosti, aise aur is tarah khatam hogi, iska to gumaan bhi na kiya tha.

Uski aankho mein Faris Wajdan ka chehra thehr gaya. Woh mulazim ladka, uske hisaason par poori tarah

se sawar hone laga. Itni muraat aur inayato ki wajah samajh se bahar ho gayi.

"Woh larka London mein kyun tha aur us ki mulaqat, Alizeh Shirazi se kaise hogayi thi? Kya wajah thi ke usay itni ahmiyat di gayi thi?"

Woh inhi sochon mein ghira hua tha jab dastak de kar Jameela andar aayi thi. Alizeh ke hawale se woh disturb na ho, woh is bare mein hi baat karne aayi thin.

"Mummy! I don't want to talk about this." (Mummy me is ke mutaliq koi baat nahi karna chahta)

Us ne wazeh lafzo mein mana kar diya.

Woh hairan hui ke us ne rishta khatam hone par taa hal koi aitraaz nahi uthaya tha. Na hi wajah daryaft karne ki koshish ki thi. Haalanki woh aisi fitrat ka nahi tha. Alizeh us ki pasand thi. Is rishte mein so percent uski marzi shamil thi magar ab woh yun ho gaya tha jaise yeh rishta is se ghair mutaliq ho. Is mein uski koi dilchaspi na ho.

Woh kuch der tak us ke paas baithi rahi, phir uth kar chali gayi thin. Woh ek baar phir khidkiyo mein ja khara ho gaya tha. Zehan mukhtalif socho ki aamaajgah bana hua tha. Aankho mein shole nazar aa rahe the.

•••