Chapter 56: •CHAPTER-55•

•••

Faris kuch sadme aur beyaqeeni se Jannat Kamal ko dekh kar reh gaya tha. Jannat yeh kya keh rahi thi? Shak aur badgumaniyo mein woh pehle bhi uljhti thi, magar aisa kabhi nahi hua tha.

"Tumse koi kuch bhi kehta hai aur tum yaqeen kar leti ho?" Woh taasuf bhari nigahon se dekh kar bol utha. Jannat ki aankhein phir se nam hone lagin.

"Usne kaha" wo baat adhoori chorh kar ro pari Jaise alfazo ko kehna bhi kisi gehre sadme, kisi gehri aziyat se kam nahi tha. Magar woh batate gayi . Uski ek ek baat, apna ek ek dard, ek ek gham, ek ek khauf Faris khamoshi se sunta raha, lekin andar hi andar shiddat se gusse mein lapetaa gaya. Halanke woh sabar se kaam le raha tha. Is waqt Jannat ko sambhalna aur is haalat se nikaalna be-had zaroori tha.

Jab woh khamosh hui to usne uska haath apne haathon mein le liya.

"Tumne khud keh diya, ijazat de chuki ho ke main jo chahoon kar sakta hoon. Kisi se bhi doosri teesri shaadi racha sakta hoon," usne kaha to uski awaaz gumbheer thi aur lehja dhima tha.

"Lekin main nahi kar raha. Kyun? Kya main majboor hoon? Kya mujhe mummy ka khauf hai? Apne bache ke hawale se tumhari sehat ki fikar hai? Kya main intezaar kar raha hoon ke bache ki paidaish ke baad hi kisi ko zindagi mein shaamil karunga? Agar main itna hi be-hiss hoon to mujhe to intezaar bhi nahi karna chahiye. Kya galat keh rha hu?" Usne ruk kar poocha, Jannat ne apne lab kaat kar reh gayi.Aansoo hanooj bhete jaa rahe the.

"Adina ne kaha, tum usay wapas lana chahte ho," wo shishak padi.

"Kya yeh baat maine tumse kahi hai?" Faris ne narmi se uski baat kat di. Uska sar nangin bulaya.

"To phir kisi doosre teesre insan ki baat mere daave se zyada qabil-e-aitbaar kaise ho sakti hai tumhare liye?"

"Kyunki tum usse mohabbat karte ho."

Faris apni jagah tham gaya.

"Tum us wajah se mujhe talaaq dena chahte the. Tum nafrat karte the mujhse. Tumne kaha tha tumhe agar life partner chahiye hota to woh main na hoti. Tumne mujhe reject kiya tha." Uski awaaz kapkapa rahi thi.

"Yeh sab Adina ki wajah se tha." Faris ke zakhm taza hue, dard phir se jaag utha. Usne aankhon mein karb liye Jannat Kamal ko dekha. Woh be-aitbari ki usi ghaati mein ja khadi hui thi jisse se woh usay kisi kadar koshish se nikaal laya tha. Woh phir se toot rahi thi. Phir se fana ho rahi thi. Lab bhinchte hue usne apne andar ke iztirab par qaboo paane ki koshish ki. Shor bohot achanak se uth gaya tha. Chehre gudh jaane lage the. Jannat ki awaaz kahin peeche reh gayi thi.

Usne palkein jhapka kar un manazir ko jhatka jo aankhon mein utar aaye the. Ek baar phir sar utha kar Jannat ko dekha tha. Woh usay nahi dekh rahi thi. Woh rote hue bas apni kahay ja rahi thi.

"Tum... tum Adina se shaadi kar loge? Humare bacche ko mujhse le kar talak de doge? Tum har kaam planning ke saath karte ho, soch samajh kar, apna fayda nuksan dekhte ho har maamle mein," uska lehja tuta hua tha, awaaz kapkapane lagi thi. Ab bhi agar...," usne sar uthakar motohash nigahon se Faris ko dekha,

"ab bhi agar aisa kuch soch rahe ho, agar ab bhi..."

"Faris, main toh mar jaungi," woh ek dum se phoot phoot kar rone lagi.

"Main waqai mar jaungi."

Faris kuch sadme se usay dekh kar reh gaya tha. Yeh dar kis kefiyat ki halat thi jo Jannat Kamal par chha gayi thi? Yeh wahshat ka kaunsa ehsaas tha jo uske wujood par haavi ho gaya tha? Uske hosh-o-hawaas mothabhil kyun ho rahe the? Woh sochne samajhne ki salahiyat se mehroom kyun ho rahi thi?

Uske andar kuch kho dene ka ehsaas ek dum se bedaar hua. Be-ikhtiyaar Jannat Kamal ko apne baazuon ke hisaar mein le kar apne paas kar liya.

"Hey, relax. Kya ho gaya hai?" Uske lehje mein fikar thi, dard tha, mohabbat thi, magar woh chup nahi hui.

Khud se alag kar ke, usay kandhon se thaam kar Faris ne uski roti, veeran aankhon mein dekha. Kitna dard, sadma aur beaitbaari thi unmein.

"Meri taraf dekho," woh keh raha tha. Usne zara si nazar uthai thi. Uski shehed aankhon mein surkhi utar chuki thi. Lab kapkapaa rahe the. Gaal aansuon se tar the.

"Tumhare saath shaadi, yeh relation, humara bacha... Yeh zindagi meri planning ka hissa kabhi nahi tha," Faris ne kaha.

Jannat rote hue sakte me aayi thi. Munjamid hote ehsasat ek Tarah se pighle the. Andar ka shor sannate me badla tha.

Faris ne uske dono haath apne haatho mein le kar kuch dair tak khamosh betha raha.

"Tum ghar chhod kar gayi thi, toh maine tumhe dhoonda. Tumhe lagta hai maine yeh kisi majboori ya dabao mein kiya hoga? Aisa kaunsa mufad tha jo main tumse utha sakta tha? Ya us maamle mein meri konsi planning ho sakti thi? Talak toh waise bhi de sakta tha, main Saira Khala ko papers bhejwa deta, kya yeh mushkil tha?"

Jannat ki aankhon mein aansu theher gaye. Uske labo par khamoshi thi.

"Aur yaad hai tumne mujhe ek mahine ka waqt diya tha? Kya woh muddat is rishte ko khatam karne ke liye kaafi nahi thi?" Usne poocha, aur woh chup thi.

"Aur farz karo main waqai kisi se shaadi karna chahta hoon, toh kya tumhare jaane ke baad yeh kaam sar-anjaam dena zyada munasib nahi hota? Us waqt toh main yeh bhi nahi jaanta tha ke tum expect kar rahi ho. Kya galat keh raha hoon?"

Jannat ka nichla lab daanto tale aaya tha. Uski roti, bharati aankhein ek dum se jhuk gayi thi. Palako ki phir phirahat ke saath kuch berang aansu Faris ke haathon par gir the.

"Meri zindagi mein tumhare ilawa aur koi  nahi hai. Agar koi hoti, toh woh tumse pehle Wajdan House mein aa chuki hoti,"

usne bilkul wazeh lafzon mein keh diya. Jaise pehle bhi keh chuka tha. Bahut hi seedha, bahut hi mukhtasir jumla me.

Hospital ke VIP room mein ek dum khamoshi chha gayi. Na siskiyon ki awaaz thi ab, na hichkiyon ka shor. Is be-naam si khamoshi ko Jannat ki awaaz ne toda tha.

"Main kaise yaqeen karoon? Yeh sab kya hai? Jhoot ya dhoka nahi hai?" Usne Faris Wajdan ki aankhon mein dekhte hue kaha.

Burhan Wasif ka har wada jhoota tha. Har tasalli adhuri thi. Uski dilayi hui har aa tinkay jaisi thi, uski dikhayi hui har raah andher thi. Faris uski aankhon mein dard dekh raha tha, karb dekh raha tha. Guzishta paanch saalon ki aziyat unmein thehri hui nazar aa rahi thi. Woh haal mein hote hue ek baar phir mazi mein kho rahi thi.

"Kyunke main Burhan nahi hoon," uski bhari taabeer awaaz ubhari,

aur Jannat Kamal ke andar bahar ek dum se sukoon chha gaya. Aankhen ek hi maqam par munjamid, dhadkanein ek hi khayal par saakht ho gayi. Faris ne narmi se uski ungliyo par apni giraft barhayi thi, sar uthakar uski aankhon mein dekha tha.

"Main apna wada poora karta hoon. Jo kehta hoon, karke dikhata hoon. Tumhari tasalli ke liye, main kal hi apne lawyer se baat kar ke bacche ki custody ke papers tayar karwa luga. Phir toh tumhein yaqeen aa jayega ke main jhoot nahi bol raha?" Uska lehja hanoos rang aur narm aur pur shafqat tha, kahin bhi nafrat ya adawat ki jhalak na thi. Na ego ka masla, na gusse ka izhar.

Jannat ki aankhon mein nami thehri rahi, lab bhinch rahe, aziyat uske chehre ke asraat mein madgham rahi.

"Main tumhein talak dena chahta tha," usne kaha.

"iska matlab yeh nahi ke main tumpar koi dabao dalunga ya tumhe apne saath rehne par force karunga. Aisa kabhi nahi hoga." Ek pal ke liye woh ruka.

"Mere saath rehne ya na rehne ka mukammal ikhtiyar tumhare haath mein hai. Aur yeh ikhtiyar main tumse kabhi nahi cheenuga, kabhi bhi nahi."

Uska lehja mazboot tha.

Woh bohot tahammul se baat kar raha tha, bina gusse, narazi, ya barhami ka izhar kiye, kisi bhi baat ko anaa ka masla banaye baghair. Woh usay bohot narmi se samjha raha tha. Uske jazbaat ki sachaayi uski aankhon se aiyan ho rahi thi.

Jannat ne lab bhinch kar bohot se aansu apne andar utaar liye. Andar bahar sab saakht ho gaya tha. Ek khamoshi si thi jo har taraf chha gayi thi. Zehan thak gaya tha.

Dastak de kar nurse andar dakhil hui toh Faris apni jagah se uth gaya. Uske cell phone par kaafi dair se call aa rahi thi, jise receive karte hue woh khidki ke paas ja khada hua. Ab woh madhum awaaz mein baat kar raha tha.

Bistar par neem daraaz Jannat ab usi ko dekh rahi thi, aur usay laga, woh usay pehli baar dekh rahi hai. Woh phone par kuch sunte hue bahar chala gaya tha, aur jab dobara andar aaya toh nurse injection ka mahlool IV drip mein undheil kar ja chuki thi.

Jannat takiye par sar rakhe leti hui thi, drip wala haath pehlu mein dhara tha. Aankhon mein thakan ke saath neend utri hui thi, ghaliban dawaon ke asar mein thi. Woh kursi keech kar uske paas baith gaya. Uska naazuk haath apne haathon mein liya toh usne bhi kisi qadar koshish se giraft barhayi.

"Main dar gayi thi," awaaz bheegi hui thi. Aankhon mein nami, jazb aur dard. Sab thehri hui thi.

"Tum sirf aaraam karo."

"Mujhe nahi pata, mujhe kya hua Faris."

"Kuch mat socho, just relax," woh keh raha tha.

Usne lab bhinch kar rone par qaboo paya. Phir gehri saans lete hue aankhen band kar li. Kuch hi dair baad uski mazboot giraft narm pad gayi, uski saansein hamaawar ho gayi aur asraat se aziyat kam hone lagi. Kamzori aur khauf se pheeka padta chehra ab sukoon mein tabdeel hone laga. Faris us chehre ko dekhta raha, aur kaafi dair tak dekhta raha.

Uske andar ek wabal uthne ki kefiyat rhi, jise woh kis qadar tahammul aur bardasht se sambhal raha tha. Poora wujood aag ki lapet mein tha. Side table par mobile ki screen roshan hui toh usne haath barhakar cell phone utha liya. Ab woh aankhon mein khoon liye message type kar raha tha.

Kamre ki neelgoni roshni mein, jahaan woh be-khabar so rahi thi, wahaan Faris kisi ko bohot tahammul se hidayat name jari kar raha tha.

Aur theek pandrah minute baad usay call moosool hui thi. Adina Zubair shaam paanch baje ki flight se London ja chuki thi. Woh daayein haath ki mutthi bhinch kar reh gaya tha.

"Aap fikr mat karein, sir," mobile se bhaari, be-taasar aur modab awaz ubhari.

"Maine unke liye is baar kaafi kuch arrange kar diya hai." Usne call kaat di thi.

•••

Tareeki ka apna ek rang tha, asar tha, aur dehshat thi. Woh apne andar bohot si weraaniya liye hospital ke corridor mein pohoch kar saakht o saamit baitha tha. Coat ghutne par rakha tha, knot dheeli thi, button khulay hue, aasteen mori hui thi.

"Kya hua usay? Is tarah achanak?" Mrs. Shirazi se baat hui toh unhone poocha.

"BP high ho gaya tha," Faris ne jawab diya. Woh phone kaan se lagaye pareshani ke aalam mein baithi reh gayin.

"Ab behtar hai woh," Faris keh raha tha. Uska lehja aur awaaz ek dum se fikarmand thi.

"Kisi baat ka stress liya usne?" Woh usse pooch rahi thi. Faris bilkul khamosh baitha, ab safed farsh ko dekh raha tha. Surkhi mael aankhon mein ek karb thehra tha.

Kandhe jhuke hue the, raahdari ki neelgoni roshni, rooh par pade neel ke nishaan se mil rahi thi.

"Faris? Kya hua beta?"

"Jo nuqsan usne mera pehle Kiya tha wahi nuqsaan ab wo dobara Karna chah rahi hai." Usne kaha

"Kis ki baat kar rahe ho tum?" Mrs. Shirazi ne poocha.

"Main kis ki baat kar sakta hoon mummy?"

Mrs. Shirazi  ek lamhe ke liye ruki. Aur agle hi pal uske andar sannata sama gaya. Faris ki baat jese wo ab samjhi thi.

pehle ek "zindagi" thi, ab do zindagiya thi. Larzah rooh par taari tha, kapkapaahat ungliyon mein utar aayi thi. Woh ek hi manzar tha jo unki aankhon mein utar aaya tha. Unka sukoon muntashir ho gaya, unka dil bechain ho gaya.

"Agar Jannat ko waqai mein kuch ho jata toh..."

"Faris beta she is fine now!"

"Wo bahut jada stress me aagyi thi mummy"  wo apni pesani masalte hue keh raha tha.

"Alhamdulillah! Kuch hua toh nahi na! Just relax." Gehari saans le kar woh seedha ho gaya, phone kaan se lagaye woh mukammal khamoshi ki zad mein aa gaya.

Chot ek lagti thi aur uska har dard aur har gham jaag uthta tha.

"Timing kitni perfect hai uski," usne khud kalami kr andaaz me kaha, yeh jaane baghair ke is ek jumle ne unke dil bar kaisa vaar kiya tha. Wo apni jagah sakit, khamosh aur veeran si bethi reh gayi. Agle kayi la.he us taraf guzar gaye.

"Kamre mein double bed hoga. Kuch der aaraam kar lo," phir unhone kaha.

"Neend nahi aayegi."

"Koshish karoge toh aa jayegi."

"Aapke paas aana chahta hoon, magar abhi isay akela nahi chhor sakta." Woh aziyat mein ghi gayin. Kaash ye majoori na hoti toh woh khud uske paas jati.

"Adeel ko bhej do. Main aa jaati hoon."

"Nahi! Aap aaraam karein. So jaayein. Main theek hoon ab," kehkar usne bench ke saath peeth lagayi. Kuch der tak Mrs. Shirazi se baat karne ke baad woh uth kar kamre mein chala gaya.

Jannat safed bistar par be-khabar gehri neend mein thi. Usne sar utha kar IV drip ko dekha jo taqreeban khatam hone wali thi. Gehri saans lekar woh couch par kejaa ja baitha.

Khirki se chand nazar aa raha tha. Bahar tareeki barh gayi thi. Sukoon ka matlashi, is waqt be-sukooni ki hadon ko choo raha tha.

❏❏❏