Chapter 45: 'CHP-44'

کِسٹ نمبر ۱۰

Uska sar dard se phata ja raha tha. Ro ro kar aankhein sooj gayi thi. Taangein dukh rahi thi. Dil laraz raha tha. Fikr aur andeshon ne phir se ghera tha.

Sadma tha, dukh tha, aziyat thi...

Woh jaise ek baar phir dhoke mein aayi thi.

Jo insaan uski zindagi ko jahannum bana sakta tha, usse aziyaton ke dorah pe la sakta tha, usse parking area mein chhor kar ja sakta tha, us par apni sharaait, apni marzi, apne iraade saza ki tarah musallat kar sakta tha, woh insaan par kaise bharosa kar sakti thi? Kaise? Ye ghalti, ye bhool usse kyun kar ho gayi thi?

Uska khayal tha ke woh apne bachay ki wajah se ab uska lihaaz karega. Ye khayal bas ek khayal hi tha. Khushi ka ek talisman. Yahaan Mrs. Shirazi nahi thi. Yahaan Faris Wajdan ek baar phir apni asli shakal mein aaya tha.

"Usay London aana hi nahi chahiye tha." Apne aap ko koste hue socha "Bilkul nahi aana chahiye tha." Woh bhatakti hui kabhi is taraf ja rahi thi aur kabhi us taraf. Ro ro kar apna hashr bigaad liya tha.

Brick Lane ka woh rasta zindagi ki tarah ho gaya tha. Koi manzil nahi thi, bas ek khala tha. Wohi log, wohi aankhein, wohi dehshat, tanhai, khauf...

Itne shor aur itni saari awaazon mein yakaayak ek manhoos si awaaz uski samaat se takraayi.

Usay laga, uske kaan baj rahe hain. Khauf ke aalam mein ruk kar peeche dekha. Usay apna naam ek baar phir sunayi diya.

Usne beikhteyaar ghoom kar chaaron taraf dekha. Aansu beh rahe the toh har manzar dhundhla ho raha tha. Aur tab uski nazar Faris Wajdan par pari.

Woh logon ko cheerta hua uski taraf aa raha tha. Usne beshaur faris ki taraf qadam barhaye. Lamhe bhar ke liye ladkhadai. Ek do logon se kanda mas huwa, dhakka bhi laga.

Woh itne dukh, itne sadme aur gusse mein thi ke usay Faris ki aankhon mein apne liye fikr, pareshani aur khauf nazar hi na aaya. Woh uske qareeb pohncha toh baghair kuch soche samjhe, uske seene par mukke maarna shuru kar diye.

Aas paas ke log ruk kar, murr kar unhe dekhne lage the.

"Maine kaha tha, maine kaha tha ke mere saath koi drama mat karna." Woh rote hue us par chillaayi.

"Maine mana kiya tha mere saath is tarah mat karna." Woh itni mushta'il thi, is qadar dukhi aur gusse mein thi ke khud par ikhtiyar kho baithi thi. Do ghante se woh is shiddat ki sardi mein bhatak rahi thi. Do ghante ek saza ke naam ho gaye the.

Zakhm phir udhar gaye, saare gham taaza ho gaye, saari aziyatein jaag uthi. Bachpan se le kar ab tak dimaag mein dehshat phail gayi.

Rote, chillate, gussa dikhate, woh jitna lad sakti thi, woh ladi. Jitna maar sakti thi, usne maara. Woh sambhala ja raha tha magar woh uski baaton mein nahi thi. Usay nahi sun rahi thi. Kuch bedardi aur gusse se uske haath jhatak kar woh peeche hatna chahti thi magar Faris ne usay aisa karne nahi diya. Woh sadak ke beechon beech uske mazboot baazoon ke hisaar mein muqeed ho gayi thi. Ab woh usay nahi maar sakti thi. Ab woh sirf ro sakti thi. Aur woh ro rahi thi. Woh apne nana ko pukarte hue bachon ki tarah ro rahi thi.

"I'm sorry! I'm so sorry!" Usne apne aap mein chhupaye bhaari dil se kaha. Woh awaaz sirf labo ki jumbish thi. Jannat ke qamaal tak nahi pohnchi thi. Uska wujood Faris ke baazoon mein bejaan ho gaya tha.

Kitni dair hosh o khird se begaana rahi, usay yaad na tha. Albatta, jab hosh aaya toh woh bedroom mein thi. Doctor bhi mojood tha. Uska muaina karne ke baad doctor ne usay tension aur stress se bachne ki khaas hidaayat di thi.

Faris doctor se baat kar raha tha toh woh surkh o mutawarram aankhon se usay hi dekh rahi thi. Woh garam kapdon ke baghair toh bilkul nahi nikalta tha. Dastanay aur long coat ke baghair toh bilkul bhi nahi. Magar jo us waqt uske paas mojood tha, woh siyaah trousers par brown ooni sweater mein malboos nazar aa raha tha. Yani ke woh jin kapdon mein baitha tha, unhi mein uth kar usay lene aa gaya tha.

Uske honton ke dayen taraf gaal par halki si lakeer ka nishaan tha. Ye kaarnama uska tha. Usne nazrein hata lein. Karwat badal kar aankhon par baazoo rakh liya. Aankhein mukammal surkh thi. Chehra sata huwa tha. Zukaam ki shikayat ho rahi thi. Bukhaar bhi ho raha tha.

Chand lamho baad darwaza khulne aur band hone ki awaaz samaat se takraayi. Qadmon ki chaap bed ke paas a kar tham gayi.

"Kya hum baat kar sakte hain?" Faris ki awaaz pareshani ka pata de rahi thi.

Khamoshi...

Itne saare ilzaamo ki list apne kandon par uthaye woh uske paas baith gaya.

"Maine isi liye tumhe mana kiya tha."

"Haan, aur jab main nahi ruki toh socha, isey saza deni chahiye, taa ke aindah ye aisi harkat na kare." Rote hue kaha.

Woh kis qadar badgumaan ho chuki thi us se, Faris usay afsos se dekh kar reh gaya.

"Tumne apna handbag maid ko kyun diya? Woh sanjeedgi se pooch raha tha. Agar tum aisa na karti toh idhar udhar ho jane par kam az kam mujhe call toh kar sakti thin. Agar call na bhi kartin tab bhi location mobile mein mojood thi."

"Driver ka number tak maine save kar diya tha." Mohabbat aur daleel se baat karke woh uske nalao ko door karna chahta tha.

"Toh tum ab mujhe yeh batana chahte ho ke mere saath jo kuch hua, ismein tumhari koi planning nahi thi?" uth kar baithte hue woh aansuon se labrez aankhein us par jamaa kar lad padi.

"Main bhala kyun chahunga tumhare saath aisa ho?" Usay bohot andar tak dukh sa huwa.

"Yeh sawal tum mujh se pooch rahe ho?" Jannat ke lehje mein gham bhar gussa dar aaya. Awaaz randi hui thi.

"Bhool gaye jab tum mujhe parking mein chhor gaye the?"

Woh nahi bhoola tha. Bhool hi nahi sakta tha magar jab woh yaad dilati thi, tab zyada takleef hoti thi. Jab woh zikar karti thi, tab zyada pachtawa hota tha.

"Mujhe pata tha tum aisi koi harkat zaroor karoge. Aur tumne ki. Mujhe tum par bilkul bhi bharosa nahi."

Woh roye ja rahi thi.

Gehri saans lete hue usne beshakta apne balon mein haath phera tha. Uske dahine haath ki pusht par halki si kharash waazeh thi.

"Theek hai, main maanta hoon, shuru mein tumhare hawale se main bohot zyada laaparwa raha hoon. Lekin ye haqeeqat hai ke tum jab bhi ghar se nikli ho, kabhi bhi akeli nahi thi. Mera ek guard hamesha tumhare saath raha hai. Chahe tum mall mein thi, ya park mein kisi dawat par, ya Aima ke saath kisi gathering mein. Mere paas tumhare har ek lamhe ki report hoti thi. Main nahi chahta tha koi tumhe meri wajah se nuksaan pohnchaye. Haan, Lahore mein mujhse ghalti hui. Shayad us waqt main bohot ghusse mein tha. Maine tumhari safety ka khayal nahi kiya. Mujhe laga tum apne rishtedaron mein ho, so koi masla nahi hoga. Ya shayad main itna upset tha tumhare rawaiye se ke maine is baat ko ahmiyat nahi di. Behrhaal ye meri ghalti hai."

Uski puri baat Jannat Kamal ne bohot mutahammil se, kuch dukh aur beyaqeeni se suni thi. Bas ek lamhe ke wo apni ghalti tasleem kar raha hai. Magar uske baad...

"Yani ke mujhe nuksaan pohnchane ka haq sirf tumhare paas hai, aur koi mujhe kuch na kahe," bharayi hui awaaz mein Jannat boli. Ansoo mutawatar gir rahe the. Faris ne kuch kehne ke liye mooh khola, lekin phir band kar liya.

Wo Jannat Kamal se nahi jeet sakta tha. Iss haalat mein, iss maamle mein, iss situation mein toh bilkul bhi nahi.

"Maine ye to nahi kaha."

"Main toh yahi samajhti hoon." Wo sisak padi.

Faris ne haar maan ne wale andaaz mein apne haath uthaye, nigha uske kareeb rakhi, aur uth kar baahar chala aaya. Band darwaze ke us paar wo bhaari dil ke saath kitni hi der tak apni jagah khada raha tha.

Jannat ki siskiya tham chuki thi. Uska rona band ho chuka tha. Ab sirf khamoshi thi jo uske aas paas har taraf thehr gayi thi.

Faris darwaza dhakel kar andar aa gaya. Jannat so chuki thi. Rote rote uski aankhein sujh gayi thi. Naak laal thi aur kuch ansoo ab bhi palkon par thehre hue the. Soup usne nahi liya tha. Kapde bhi nahi badle the.

Ek tassuf bhari nazar us par daalte hue usne be had ehtiyaat se sar ke neeche takiya rakha. Lahaf theek kiya aur tray utha kar kitchen mein wapas aagaya. Phir usne Mrs. Shirazi ko call ki.

"Wo chhoti chhoti baaton par accha khaasa scene create kar deti hai. Rone lag jaati hai," poora hawala dene ke baad kuch fikarmandi se wo unhein bata raha tha. Bas usse cheel ki tarah jhapatne wali baat gol kar gaya tha.

"Mood swings honge, pregnancy me aisa hota rehta hai, tum aapna rawaiyya theek rakho."

"Mera rawaiyya theek hai mummy, uska theek nahi ho raha." Wo kuch pareshan lag raha tha.

"Kuch bhi galat ho jaye usay lagta hai maine jaan bhujh kar kiya hai."

"Tum uski jagah hote to tum bhi yahi karte."

"Me shikwa to nahi kar raha." Wo sar jhuka gaya. "Mujhe bas dukh hota hai jab woh meri niyat par is tarah Shak karti hai."

"Tum bhi karte the beta!" Baat talqh thi. Magar sach thi. Usne taslim karte hue sar ko asbat me jumbish di. "Haan wo bhi to karta tha, uski mohabbat, inayat, fiqarmandi sab use drama aur dhong lagta tha. Aur wo kitne dharalle se uske muh par keh deta tha. Uski bezti kar deta tha. Wo uski doulat, uski wajahat, uske status ke liye apni izzat e nafs ki bhait chada rahi hai. Matlab aur fayde ke liye uske aage pichhe phir rahi hai." Usay apne lafz yaad aa rahe the. Apna rawaiyya, lehza, nafrat, berukhi…

Wo khud ko khud hi maaf nahi kar paa raha tha. To wo kese kar sakti thi?

"Woh mujh par kabhi trust nahi karengi"

Aawaz halki thi, dil mayus ho raha tha.

"Aisey sochte rahe to kabhi nahi karengi!" Usne sar utha kar apni maa ko dekha. "Agar tumne apne iraade aur faisle badle hai to wo bhi jaroor badlegi!"

Unki ye baat sun kar wo khamosh ho gaya.

"Agar mazeed ghadbhad ho gayi to?" Khadshe ka izhaar kar diya.

"Phir samajh lena, naseeb ka likha koi nahi taal sakta."

"Mummy" Usne satpata kar unhe dekha. Wo dheere se hash di.

Apne rishto ki fiqr karta hua, apni zindagi ko samjhta hua, aapna aap kisi aur me talashta hua, unhe fiqrmand se achha lag raha tha. Wo is tabdili par jitna shuqr aada Karti utna kam tha.

"Pareshan na ho, sab theek ho jayega." Mrs. Shirazi ne tasalli di.

Mrs. Shirazi se baat karke bahar aaya to shopping bag se jhaankta dinosaur uski nazar mein aya to use andar tak sulga gaya. Is aik si cheez ki wajah se itne fadde ho gaye the. Uski zoja mohtarma pure do ghante pareshaani mein guzaar aayi thi aur qasoor phir bhi uska tha. Mujrim phir bhi wohi tha. Apne balon mein ungliyan chalatay hue wo lounge ke sofa par ja leeta. Har kaam se dilchaspi takreeban khatam ho chuki thi. Ab wo gehri neend sona chahta tha. Magar jaanta tha neend nahi aayegi. Iss haalat mein, iss kefiyat mein, iss pareshaani mein toh bilkul bhi nahi.

Aur andar se mukammal be-aaram kar ke Jannat Kamal neend ki gehri wadiyon mein utri hui thi.

•••

Sar sabz maidan ke beech mein baazu phaila kar bhaagte hue usne ooper bohot ooper aasman ki taraf dekha tha. Rimjhim barish baras rahi thi. Ungli jitne nanha sa cup ko honton se lagaa kar chai peene ki ada kari karte nana ain uske samne baithe the. Hawaein aur tez ho gayi thi. Har sou gundhmand phelne lagi thi. Khidkiyaan tareek ho rahi thi. Roshnaiya ek ek kar ke gul hone lagi thi. Wo nana ke ghar thi.

Aur palak jhapakte hi apne ghar pohnch gayi thi.

Aur phir wahi manzar, shadeed garmiyo ki dopahar, surkh eenton ka farsh. Seedhiyon par uske samne khada Husnain, haath mein bikharati hui gudiya. Wahi manzar, wahi takleef, wahi dard aur phir gudiya ko bachaane ki jaddo-jahad, magar abke manzar badal gaya tha. Ab ke baar seedhiyon se phisalti shakl Husnain ka nahi, Jannat ka tha. Wo cheekh rahi thi. Aur phir cheekhti chali gayi thi.

"Jannat" bazu pakar kar kisi ne jhanjhor kar usse jagaya tha. Ek jhatke se uski aankh khul gayi thi. Aankhein ansoo'on se bhar chuki thi, saans phoola hua tha, rangat uri hui thi.

Usne mushkil se saans lete hue khud par jhuke chehre ko dekha. Wo Faris tha. Wo khud se bedaar nahi hui thi, usse jagaya gaya tha.

Uske sahaara dene par wo larazte hue wujood ke saath uth kar baith gayi thi. Saans bhari thi. Peshani arq alood ho rahi thi. Wo wahshat zadah bhoklai si baithi thi.

Bed se utar kar Faris uske liye paani ka glass le aaya. Usne glass thaamna chaha toh haath beh tarah se kapakpa rahe the. Faris ne glass apne haath mein rehne diya. Usne yun paani piya jaise sadiyon ki pyasi ho.

Haalat sanbhal gayi, na ansoo the, wujood siskiyo ki zadd mein raha. Asar khwab ka tha. Wo apni haqeeqat se bhi aazurda ho rahi thi.

"Mujhe akela chhor do ab." Apni hatheliyan masalte hue kaha. Awaaz rundhi hui thi. Ab tak usne bohot mazbooti dikhayi thi. Apne khauf ko hamesha chhupa kar rakha tha. Kabhi apne se bahar nahi hui thi. Magar ab jo brick Lane mein hua tha, aur iss waqt jo uski haalat ho rahi thi, uske baad wo Faris Wajdan ko apne aas paas nahi dekhna chahti thi.

Magar wo khada raha. Uske paas, uske bilkul samne. Wo hamesha uski neend mein khalal daal kar bohot khamoshi se kamra chor kar study room mein chala jaata tha. Ab aisa karne ki sakat thi, na taqat mojood thi.

"Suna nahi, Maine tumse kya kaha hai?" Sar uthakar sakht lehje mein kaha. Awaaz behed kamjor thi. Lekin Faris apni jagah se ek inch bhi nahi hila tha. Apne gird baazu baandh kar wo daaye taraf ko jhuka kar apna chehra chhupa gayi. Faris uske barabar bed par baith gaya.

"Meri taraf dekho."

Magar usne nahi dekha.

"Jannat!" Uska lehja naram tha.

Jannat ne rukh badla na sar uthaya.

Aur doosre hi pal usne bohot narmi se baazu phela kar usse apne hisaar mein le liya tha. Uski is harkat par lamhe bhar ke liye thami thi, phir sakte mein aayi thi. Ba yak waqt kai lamhe uski aankhon mein nasar gaye, kai manzar ehsasat ka libaada odhe haqeeqat ka roop dhaar gaye. Faris ne bohot narmi se Jannat Kamal ki peshani apne kandhe se mis ki.

Aur uski hichkiyan band gayi. Wo ehsas, wo lams, wo giraft waisi hi thi jaisi uske nana ki hoti thi. Mohabbat aur sukoon ka ehsas dilate hue tasalli de rahi thi.

"Khawab hi toh tha." Wo bola

Bed se utar kar woh uske liye paani ka glass le aaya. Usne glass thama chaha toh haath be-tarah kapakpa rahe the. Faris ne glass apne haathon mein rehne diya. Usne yun paani piya jaise sadiyon se pyasi thi.

Haalat sambhli, na aansoo the. Wajood sukoon ki zad mein raha. Asar khwab ka tha. Woh apni haqeeqat se bhi azaar-da ho rahi thi.

"Mujhe akela chhod do ab." Apni hatheliyan masalte hue kaha. Awaaz rundi hui thi. Ab tak usne bohot maqbooli dikhayi thi. Apne khauf ko hamesha chhup kar rakha tha. Kabhi aape se bahar nahi hui thi. Magar ab jo Berlin mein hua tha, aur is waqt bhi jo uski haalat ho rahi thi, iske baad woh Faris ko apne aas paas nahi dekhna chahti thi.

Magar woh khada raha. Uske paas, uske bilkul samne. Woh hamesha uski neend mein khalal daalne ke baad bohot khamoshi se kamra chhod kar study room mein chali jati thi. Ab aisa karne ki sakat thi, na taqat mojood thi.

"Main ne tum se kya kaha hai?" Sar utha kar sakht lehje mein kaha. Awaaz be-had karak thi. Faris apni jagah se ek inch bhi nahi hila tha. Apne gird bazu bandh kar woh daayein taraf ko jhunkar apna chehra chhupa gayi.

Woh uske barabar bed par baith gaya.

"Meri taraf dekho."

Magar usne nahi dekha.

"Jannat!" Uska lehja narm tha.

Jannat ne rukh badla na sar uthaaya.

Aur dusre hi pal usne bohot naram se bazu phela kar usse apne hisaar mein le liya tha. Woh uski is harkat par lamhe bhar ke liye hosh udda baithi thi. Phir sakte mein aayi thi. Beek waqt kayi lamhe uski aankhon mein tasveer ban gaye, kayi manzar ehsaasat ka libada oodhe haqeeqat ka roop dhaar gaye. Faris ne bohot naram se Jannat Kamal ki peshani apne kandhe se mas ki.

Aur uski hichkiyan bandh gayi. Woh ehsaas, woh dapas, woh giraft waisi hi thi jaise uske Nana ki hoti thi. Mohabbat aur sukoon ka ehsaas dilati hui tasalli tashfi karati hui.

"Khwab hi toh tha," woh bola.

"Woh sirf khwab nahi tha," Jannat sisk par boli.

Apne tamaam ikhtilaf, apna gussa, apni narazgi ek taraf rakhe woh uska haath thaam chuki thi, bohot mazbooti se, sakhti se, bilkul waise hi jaise woh Nana ka haath pakadti thi. Faris ke dil ko kuch hua. Apne kisi khwab ke asar se nikaalna uske liye kitna mushkil raha hoga, iska andaza jaise aaj ho raha tha.

Usay woh waqt yaad aya jab usne Jannat ko kamre se nikaal diya tha aur woh darwaza bajate hue uski minnat karti rahi thi, woh usay andar aane de. Us raat usne darwaza nahi khola tha. Us raat uski haalat zyada kharab thi. Woh zyada khaufzada thi. Zyada pareshan thi.

Uski samajh mein nahi aaya, woh ab uska khauf kaise kam kare, alfaaz kam pad gaye the. Zehen khaali ho gaya tha.

"Kahin bahar chalein?" Usne kaha.

"Is waqt?"

"Haan," usne Jannat ke haath par narmi se giraft barhayi.

Usne nafi mein sar hilaya. Woh chahti thi, waqt ruk jaye, sab thehr jaye. Bas yeh ehsaas baqi rahe, yeh kaifiyat thehri rahe.

"Walk karte hain ya koi movie dekh lete hain."

Nana bhi usse behlane ke liye aise hi kaha karte the. Aise hi uska haath thapthapaya karte the. Usse kandhe se lagaya karte the. Jab wo unke mazboot kandhe se peshani lagati thi toh duniya ka har gham aur har takleef unke hisaar mein aate hi khatam ho jati thi. Ab bhi yahi hua tha. Faris Wajdan mein Nana aa gaye the.

Faris Wajdan mein mohabbat aa gayi thi, taraham aa gaya tha. Kaifiyat samajh se bahar ho gayi thi. Uski siskiyan barhti gayi.

"Main khana lagata hoon. Tum kuch khaye baghair hi so gayi thi."

"Kahin mat jao, please!"

Woh ruk gaya. Uski dheemi siskiya uski aziyat badhane lagi.

"Woh sirf ek khwab tha. Khatam ho gaya." Narmi se ek baar phir samjhaya.

Faris Wajdan kya jaane, uspar woh raaten usi andaaz mein guzarti thi aur baar baar guzarti thi.

Khwab toh ek bahana tha, haqeeqat apna aap dhohraane aati thi.

Chand lamhon ke baad woh kuch had tak sambhal kar aansoo saaf karte hue khud hi alag ho gayi.

"Main khana lagata hoon." Woh uth kar chala gaya.

Jannat kuch der tak aise hi baithi rahi. Phir khud ko sambhalte hue uth kar bahar aa gayi. Ghar tareek tha magar open kitchen ki tamam battiyaan roshan thi.

Woh counter table ke us paar Faris Wajdan ko fridge se kuch nikaalte dekh sakti thi. Aahat par usne mur kar Jannat ko dekha.

"Have a seat, please." Usne ishaara kiya toh chehre ke aitraaf mein mandlati laton ko hatati, haath dhone ke baad kursi khinch kar baith gayi thi. Shahd rang baal peeth par seedhe ho rahe the, aankhein soji hui aur kuch muturam si lag rahi thi. Kuch der pehle wali kaifiyat nahi rahi thi magar ta'assuraat abhi bhi waise hi the.

Faris microwave oven mein khana garam karte hue mez par tarteeb se rakhta ja raha tha.

Use idraak hua, woh bhooki soi thi toh khana Faris ne bhi nahi khaya tha.

"Shuru karo." Fried chicken, fried rice, pizza, woh mukhtalif cheezein uske saamne rakh raha tha. Usne apni plate qareeb kar li. Koi bhi baat kiye baghair woh khamoshi se khana khane lagi. Zaraa si nazar utha kar woh use dekh leti.

Kya woh shuru se aisa tha? Ya ab ho gaya tha?

Nafrat kahan gayi thi? Haqaarat kahan chhupi thi?

Chaalen aisi toh nahi hoti? Mansoobe is tarah ke toh nahi hote?

"Kuch chahiye?" Use yun apni janib dekhta pa kar Faris ne poocha.

Usne nafi mein sar hilate hue nazar jhuka li.

Khana khane ke baad jab Faris istemaal shuda bartan dho raha tha toh woh bhi bacha hua khana fridge mein rakhne lagi thi.

Iske baad usne coffee banane ka iraada kiya toh Faris ne rok diya.

"Main chahunga, ab tum rest karo."

"Mujhe neend nahi aayegi," woh uski taraf dekhe baghair boli.

"Aajayegi."

Burner band karke, usne uski kalayi thaam ke use kamre mein le aaya. Uske kehne par sar dard aur bukhar ki goli lekar woh sone ke liye let gayi thi.

Shayad use paanch minute lage the, dus minute ya shayad pandrah minute! Apne andar ke khauf se ladhte hue woh neend ki wadiyon mein utar gayi thi. Faris ne ek baar phir uski peshani ko choo kar dekha. Halka sa bukhar tha, lekin woh neend mein ab mukammal pur sukoon thi. Woh bhi sukoon mein aa gaya. Bahar tareeki mein waqfe waqfe se bijli chamak rahi thi. Glass wall par kahin kahin barish ke qatre the aur nazron mein sheher ki roshniyan munakis ho rahi thi. Woh apne liye coffee bana kar glass wall ke samne ja khada hua.

Bijli ek baar phir chamki thi. Har taraf andhera badh gaya tha.

❏❏❏