Chapter 14: •CHAPTER-13•

•••

behtareen intizamaa ke sath khubsurati se decorate kiye gaye shadi hall ke saddar darwaze par mehmanon ka khush ikhlaqi se istaqbaal karti saira khaala ki nazar jannat par pari to woh heran reh gayeen. aik lehze ke liye to jaisay inhen yaqeen hi nahi aaya, aglay hi lamhay unhon ne agey barh kar usey gale laga liya tha.

Faris wajdan ne mobile ki screen se nigah utha kar saira khaala ko dekha. labon par dahinay gaal ki janib uthti madham muskaan ke sath woh jannat ke khalu se aur un ke beton se mila. Amaar ke ilawa syra khaala ke teeno betay khush ikhlaqi se mile.

Navy blue paint coat mein faris ka daraaz qad numaya ho raha tha. apni shakhsiyat mein shandaar to woh tha hi magar Wajahat ke baais har kisi ki nazron mein bhi araha tha.

safaid aur gulaabii rang ke imtezaaj ke ka madaar lehenga choli mein malboos, jannat Bint kamaal sab kuch lag rahi thi magar khush nahi. zabardasti ki muskurahat bhi uske honton par nahi thi. ankhen surkh mutwaram jaise woh sara rasta roti rahi ho woh jitni upset thi, faris wajdan utna hi khush aur mutmaen!

"Tum andar jao mein zaroori call attend kar ke aata hoon. jannat ne mathus nigahon se usey dekha.

andar bhi woh akeli hi jaye? phir is ne khaala ko dekha jo dosre mehmano se mil rahi theen. Amaar qadray faaslay par hi bigre tewaroon ke sath khara tha.

"M-Mein tumhara yahin intzaar kar leti hoon!"

"Koi zaroorat nahi!" aankhon mein sakhti se dekhte hue is ne kaha.

phir qadray faasle par, shadi ke hangame, shor sharabe aur music ki taiz aawaz se pare, woh phone kaan se lagaye kisi se baat karne laga. muthiyaan bhinch kar jannat ne jaise apni ghabrahat par qaboo paaya phir himmat mujtma kar ke hall mein daakhil ho gayi.

shadi ka ka shor sharaba, hungama sab jaisay khatam huwa tha. ya shayad us ki samaat ne hi kaam karna chore diya tha ke ahistagi se qadam uthatay hue usay yu laga tha jaise har taraf Moheeb sannata chhaa gaya ho. kayi nigehain is ki taraf uthi theen, kayi logon ne aankhon hi aankhon mein aik dosray ko ishare kiye they. aate jate logon ki markaz nigah bani aziat ki do dahari talwar par qadam jamaye woh shadi hall ke sab se jate logon ki markaz bani ki do dhari par qadam woh allag thalag hissay mein ja kar baith gayi thi.

Jin logon ke samnay woh mar kar bhi nahi aana chahti thi, woh ab nazar bhar kar usey dekh rahe they. usey jaanch rahay the.

'Bad naseebi ka agar koi roop hai to woh jannat kamaal ko daan kar diya gaya hai. badbakhti agar koi maqam hai to woh jannat kamaal ko inaam kar di gayi hai.'

us ka sar utha huwa tha magar nigahain jhuki hui theen. woh kisi ko dekhna na chahti thi magar phir bhi sab usey nazar aa rahe they. behno ko woh nazar andaz nahi kar saki thi. khusoosan Hafsa aapi ko woh unhe uthte baithtay atay jatay dekh rahi thi. aur woh thi ke usey mukammal tor par nazar andaaz kiye hue theen.

woh uski bhanjiyo aur bhanje doosre bachon ke sath khailtay kudte phir rahay thay. Mubasar to uske paas se guzar gaya tha. yaqeenan behnoon ne hi mana kar rakha tha tabhi woh iske paas nahi aaye they.

chhotey cha-cha aur phophoo ki family bhi wahan mojood thi. har chehray par usey dekhte hi na gawari ubhar aayi thi. kuch to woh heran bhi ho rahay thay ke woh yahan kaisay aagai thi?

"Tum yahan kyun aagai ho?" jannat ne choank kar sar uthaya. Ammar shadeed ghusse mein lag raha tha.

"Apna tamasha banwane ka bohat shoq hai tumhe."  jannat usey dekh kar reh gayi. zair lab barr badate hue woh wahan se chala gaya. woh janti thi Ammar yeh baat kisi wajah se keh kar gaya tha. uski bhi majboori thi. woh kon sa apni marzi se yahan aayi thi.

faris kuch takheer se aaya tha. kursi khech kar is ke hamrah betha to aik baar phir woh nazron mein aagai thi. to yeh tha jannat Bint kamaal ka shohar. sab ne aaj dekha tha. sab ne aaj jana tha. apne heran hue thay. un ka heran hona bantaa bhi tha. bhala koi jannat jaisi larki se shadi ke liye Raza mand kaisay huwa tha? is ke liye to Zaman jaisay mard hi bachte thay. naaqis! na mukammal! aisi hi tasweer thi us ki. kuch rang mfqod kiye hue, woh dil se jo giri so giri, nazron mein bhi nahi rahi thi.

dahinay haath se baen haath ki kalayi mazbooti se pakdae, taang par taang rakhay woh bazahir mazboot nazar aa rahi thi magar uske andar jo tor phore ho rahee thi uska aks uski jhilmil karti aankhon mein lehra raha tha.

'kuch agar baqi bhi hai to aaj khatam ho jaye ga!' andar aik hungama barpaa tha.

dulhan dulha ko stage par bithaya gaya to un ke aas paas apni behno ko dekh kar aik baar phir dil ko kuch huwa. itni mohabbat o ihtimaam se woh sidra ke agey peechay theen, uske aroosi jore ka daman set kar rahi theen. aur khud woh apni shadi par kitni tanha kitni namukammal thi un ke baghair.

"Mein tumhe hi dhoondti phir rahi hoon, aur tum yahan baithi ho jannat!"

jane kaha se khaala aayi aur zabardasti utha kar apne sath le gayeen.

Ammar ke chehray par aik baar phir na gawari dor aayi thi. woh apni maa ko kuch khafgi se dekh raha tha. bhaari dil ke sath woh stage par charhi thi. behne aik aik kar ke wahan se hatt gayi. Cousins bhi dur ho gayi. jo mojood they woh is ki aamad par nagwari ka izhaar karne lagey they. faris wajdan seenay par bazoo bandhe jannat ke tasurat se kaafi Mahzooz ho raha tha.

stage par dulhan ke hamrah baithi purkashish nuqoosh ki haamil us larki par Sajida begum ki nazre yu thehri ke woh ba wujood koshish ke hata nahi saki. unhon ne aeinak laga kar is ka har terhan se jaiza liya phir dil hi dil mein usey apne betay ke liye pasand kar liya.

"Mujhe apne farhan ke liye, woh safaid kapron wali larki barri pasand aayi hai. woh jo dulhan ke paas baithi hai, wohi"

unhon ne apni padosan ki beti shaista ki tawajah stage par baithi larki ki taraf mahsool karwana chahi thi magar woh maiz ke barabar mein baithy faris wajdan ko bhi mutwajjah kar baithi theen jis ne mobile screen se nigah utha kar usi larki ko dekha jo dulhan ke pehlu mein baithi thi .

"arrey! yeh to jannat hai. yeh shadi shuda hai Bua!" shaista ne kaha.

"hain..?" Sajida begum ko aik dhachka sa laga. "Shadi shuda? mein samjhi college ki student hogi"

"Suna hai shohar se alehadgi ho chuki hai is ki!"

Sajida begum to dhak se reh gayeen. itni mushkilo se unhen koi larki pasand aayi thi jo na sirf shadi shuda thi balke ab Talaq Yafta bhi saabit horahee thi.

"Alehedgi kyun ho gayi?" sadma kuch kam huwa to unhon ne kureda.

"Shohar ne doosri shadi jo kar li thi."

"Interesting!" kursi ki pusht se kamar tikaye hue faris seedha ho betha .

nigahe hain jannat par thehri theen. woh dulhan ka haath apne haath mein le kar, uske kaan mein sargoshi karne lagi thi. Jawaba dulhan ne nah jane usse kya kaha tha ke uski nigah be ikhtiyar faris ki taraf uth gayi thi. Shadi ke hall me wo jis alag thalag kone me wo betha tha yaha se har taraf nigah dohranaa kadre aasan tha.

"Itni khubsurat biwi ke hote hue bhi doosri shadi karli?" Shaista begum ko yakeen na aaya.

"Aurat agar maa na ban sake to kaha ki khubsurati!"

Faris apni jagah sun betha reh gaya.

"Burhan jo iske Taya ka eklota beta hai, usse shadi hui thi iski! Bachpan ki mangni thi, shadi mohabbat ki" un khawateen me jo kam umr thi wo bahut kuch janti thi. "Jab intishkaf hua ki jannat baanjh hai, to maa ke mazboor karne par apne cha-cha ki beti se doosri shaadi karli"

Jannat apni jagah se uth khadi hui thi. Chehre par khouf, ghbrahat, pareshani ke tassur liye wo ab stage se utar kar usi ke taraf aa rahi thi.

"Too, phir ise talak kyu hui?" Shaista begum amatan ghoush thi.

"Arrey! Khala isne burhan ki biwi ka baccha jaya karne ki koshish ki thi" shadi ka hungama, shor sharaba or Faris ki sakit nigahe jannat kamal ke chehre par taher gayi.

"Khuda ki panah! Shakl se to esi bilkul bhi nahi lagti." Shaista begum darr si gayi.

"Khalaa, amal shaklo par to nazar nahi aate hai!" Huma ne luqma diya tha.

"Bachpan se hi, ye aafat kisam ki larki hai bua , khuda maaf karey! Na choto ki taamiz, na bado ka lihaaz. Bahut bad mizaaz or maghroor si. Isi ki wajah se hi to iski ammi ka inteqal hua tha"

"Phir to iske sath jo hua thik hua!" Jane kisne kaha tha.

"Sirf itna hi nahi , pata nahi kaha kaha affairs chala rakhe the isne, mujhe uski nand ne bataya tha. Sara din phone calls aati rehti thi. Kayi baar to usne khud Jannat ko phone par bate karte hue dekha tha."

"Mein ne suna hai is ki harkato ki wajah se uske khandan walon ne uski doosri shadi ke baad usse qata talluq kar liya tha."  Saishta begum ne sir utha kar aik baar phir usey dekha tha .

"khaala! usay dekhen woh!

huma ne inhen haath ke isharay se mutwajjah kiya. woh sir uthaye uski taraf dekhne lagi jis taraf huma ishara kar rahi thi.

"woh Burhan hai jannat ka pehla shohar!"

black two piece suit mein malboos aik handsome sa no jawan hafti muskuratay hue kisi larki ke hamrah andar daakhil ho raha tha.

woh maiz par wapas aayi to faris wahan kahin nahi tha. Usne fiqar mandi se charon aur nigah dorhayi, phir taiz taiz qadam uthai shadi hall se bahar aagai. sarsabz lawn se bairooni darwaze ki taraf jatay hue woh musalsal uska number try kar rahi thi. mobile band bhi nahi tha. call receive bhi nahi ho rahi thi.

parking area mein usey gadi ke paas khara dekh kar uski atki hui sansen aik lamhay mein bahaal hui theen. yeh khayaal ke woh usey chhorh kar nahi gaya, kitna tasalii bakhash tha aur yahi khayaal jin andeshon ko janam de raha tha, woh kitney aziat naak thay.

woh khud ko compose kar ke uske paas aagai thi. Pockets mein haath daaley gaadi se take lagaye navy blue paint coat mein malbos woh apni tamamtar wajahato ke sath usay tareek raat ka hi hissa laga .

"Jitne log hain, itni hi kahaniyan hain aur har kahani aik se barh kar aik interesting hai." woh barah e raaz uski aankhon mein dekhnay laga labn par muskurahat thi. aankhon mein tazheek. Jannat ka chehra dhuwan dhuwan ho gaya.

"To, Burhan wasif tumhare taya ka beta tha, mohabbat ki shadi thi, jo mehez paanch saal tak rahi. phir usne tumhe chore diya!"

woh apni jagah munjamad usay palken jhhapkaye bina dekhe gayi.

"Tum ne is ke bachhe ko marne ki koshish ki"  faris ke lehjey mein sadma tha. lekin be yakeeni hargiz nahi thi.

"Mujhe herat hai usne tum par police case nahi hone diya. bohat mohabbat karta hoga. warna kon is qadar sangeen ghalti ko nazar andaaz karta hai?"

Uski aankhon ki nami aik dam gehri hui thi. lab kapkaye they.

"Tum jaisi larkiyon ke liye bhala Talaq bhi koi saza hoti hai?"

jannat ka saans jaisey halaq mein atka tha. aankhon mein wehshat utri thi. alfaaz goya sulagtey hue angare they, samat me parhte the or wajood ko raakh kar dete the.

"Waisey Talaq ka sabab tumhara wohi karnaama tha ya phir koi aur wajah thi?" Pockets se haath nikaltay hue woh seedha hua tha.

jannat baa-mushkil hi uske kaandhon tak pahunchti thi. aur ab to jaisay qadmon mein hi thi.

'Raakh Khaak Dhool Mitti'

aage ko jhuk kar woh Mahzooz hoti nigahon se usay dekhne laga. mukammal tor par bheegi hui aankhen surkh chehra kapkapata wujood nichala lab be dardi se ragadte hue woh sir jukaye khari thi.

"herat hai! aaj tumhari zubaan nahi chal rahi." usay taajjub huwa tha.

'Na wazahat, na safai, na ma-ani ki talabb, nah pachtawe ka ehsas.'

"Suna hai kaafi affairs they tumahre!  suna hai wrongs calls aati theen, suna hai...!"  Usne sar gira diya, jhuka diya haar manli, magar woh Faris  tha. hamle se baz phir bhi na aaya.

"Jo kuch sun chuka hoon! woh sab mummy ko batau ga to woh kya sochen gi? aik aisi larki ko baho bana baithi hain jo unfertile hai. jis ne apni sotan ke bacche ki jaan laine ki koshish ki hai. jis ke khandan ke log usey achhot ki tarah treat karte hain. aur jo apni maa ki mout ka sabab bani hai!"

saans rokay, lab bheenchey usne sar utha kar faris ko dekha, woh bhi usey hi dekh raha tha. sard pathreli nigahon se kuch nafrat, kuch hiqarat se, kuch be rehmi, kuch bezariyat se.

"Jiske apne pao taley zameen nahi thi, woh mere sir se aasman khenchnay chali thi!"  jannat ki ankhen jhalak pari.

"Amaal agar shaklon par zabt hotay to khubsurat chehray kitney bhiyanak lagtay."

faris ne chaabi nikaal kar button dabaya. gaari ka lock khul gaya.

'haan bhayanak lagtay bohat bhayanak lagey.'

"Mein kal shaam ki flight se London ja raha hoon, mummy ko phone par ke dena tum yahan apni marzi se ruk gayi ho, jab tak mein wapas nahi aauga tum apni khaala ke paas hi raho gi.."

"Aur haan!"  Usne ruk kar tanbeehi nigahon se jannat ko dekha, phir ungli utha kar zeher khand lehjey mein dhamki di.

"Ab agar tum ne mann maani ki to mujh se bura waqai mein koi nahi hoga"

gaadi start ho chuki thi. kuch hi dair mein woh wahan se ja chuka tha. aur jannat Bint kamaal apni jagah sakit o Samat khari reh gayi thi.

---- •♡• ----

'𝒘𝒐𝒉 𝒏𝒂𝒂𝒒𝒊𝒔 𝒕𝒉𝒊. 𝒎𝒖𝒌𝒂𝒎𝒎𝒂𝒍 𝒉𝒐𝒏𝒂 𝒄𝒉𝒂𝒉𝒕𝒊 𝒕𝒉𝒊. 𝒂𝒖𝒓 𝒋𝒊𝒏𝒉𝒆𝒊𝒏 𝒕𝒂𝒒𝒅𝒆𝒆𝒓 𝒏𝒂𝒂𝒒𝒊𝒔 𝒌𝒂𝒓 𝒅𝒆 𝒘𝒐𝒉 𝒎𝒖𝒌𝒂𝒎𝒎𝒂𝒍 𝒌𝒂𝒊𝒔𝒆 𝒉𝒐𝒈𝒆 ᯓᡣ𐭩'

*ꜰʟᴀꜱʜʙᴀᴄᴋꜱ*

"kisi roz tumhe tumhari ye khush fehmiya le doobein gi." woh ab phoolay tannafus ke sath andhere mein dekh rahi thi.

"Mein bohat achi tairaak hoon faris! usey laga ab zameen ab qadmo taley nah rahi ho.

"behtareen tairaak bhi shark ki khurak ban jaya karte hain."

"Shayad is liye ke woh bar waqt saahil par nahi pahonch paate." woh lar kharayi

"Tum pahonch jao gi saahil par?"

"Saahil par hi to khari hoon mein."

Aur yeh tha uska saahil. Uska kinara! woh apne is kinare se, khush gumani ke is saahil se dabey qadam peechay hati.

𝑨𝒊𝒔𝒂𝒚 𝑲𝒊𝒏𝒂𝒓𝒆 𝑺𝒆 𝑺𝒂𝒎𝒂𝒏𝒅𝒂𝒓 𝑩𝒉𝒂𝒍𝒂!

𝑨𝒊𝒔𝒊 𝑺𝒂𝒕𝒂𝒉 𝑺𝒆 𝑨𝒂𝒎𝒂𝒒 𝑩𝒆𝒉𝒕𝒂𝒓!

---- •♡• ----