Chapter 11: •CHAPTER-10•

کِسٹ نمبر 2

" 𝒋𝒊𝒏 𝒌𝒊 𝒌𝒂𝒔𝒉𝒕𝒊𝒚𝒂𝒏 𝒋𝒂𝒍𝒂 𝒅𝒊 𝒋𝒂𝒚𝒆𝒏, 𝒖𝒏𝒉𝒆𝒏 𝒛𝒊𝒚𝒂𝒅𝒂 𝑻𝒂𝒉𝒂𝒎𝒎𝒖𝒍, 𝒛𝒊𝒚𝒂𝒅𝒂 𝒔𝒂𝒃𝒓 𝒌𝒂 𝒎𝒖𝒛𝒂𝒉𝒊𝒓𝒂 𝒌𝒂𝒓𝒏𝒂 𝒉𝒐𝒕𝒂 𝒉𝒂𝒊 "

---- •♡• ----

madham si sar sarahate peda karti khank hawae is ke wujood par kapkapi si taari kar gayeen. faris bohat agey nikal chuka tha. is ne aik baar bhi mud kar jannat ki taraf dekhne ki koshish nahi ki thi.

Jogging ke baad usne shower liya tha aur kapray badal kar jab neechay aaya tha to jannat kamaal glass wall ke us paar usey maali se ulajhti aur phoolon ko torti nazar aayi thi. Uski aankhon mein nagwari ubhar aayi. aik mamool sa bana liya tha is larki ne ke har roz kamray ko taaza phoolon se muattar karne ka. sir jhatak kar wrist watch pehante hue woh mrs. Shirazi ke kamray mein agaya tha.

"Aap tayyar ho gayi mummy?"

"haan beta!" mukammal tayari ke sath woh wheel chair par thi. bas head scarf le rahi theen. aaj un ki doctor ke yahan appointment thi. weakly check up ke liye jana tha unhen. pathani bhi un ke sath hi jaya karti thi.

mobile par kisi ka number Dial karte hue uski nigah be sakhta hi deewar geer khirkion ke samnay rakhi glass table par ja pari. woh thitak kar ruk gaya.

maiz ke kinaro ke sath gole dairey ki soorat mein tarteeb se rakhay gulaab ke phoolon par is ki nazar yun thahri ke woh hata hi nah saka. masli hui pankhudiya, tootay hue pattoun ki lehar aur salamat phoolon ka ghairao.

yaddasht ke kisi konay mein koi bhula basra manzar taaza huwa tha. koi aawaz gunji thi. parda lehraya tha aur phir aik aik kar ke safaid phool khirki se andar girtay chalay gaye thay. 'Get well soon' marker se likha pegham khirki ke sheeshay par ubhar aaya tha.

"Faris!" Mrs. Shirazi ki aawaz par usne choank kar apne khayalat se sar nikala phir murr kar unhe dekha.

"I'm ready beta!"

sir hila kar woh un ki janib barh gaya. magar woh phoolon ki is tarteeb se, lehron mein rakhay un patton se, aur flower vase mein rakhi kuch bhikri, kuch tooti aur kuch masli hui un pankhudiyon se peecha na chhura saka jinhon ne kuch der ke liye hi sahi, usey maazi ke hawale kar diya tha.

•••

"Hamari is kaghazi shadi ko poooray do mah hone wale hai" woh bed par nam daraaz laptop par kaam kar raha tha jab hathon par lotion lagatay hue woh usse mukhatib hui thi .

faris ne nazar utha kar usey dekha. sofay par woh khasay shahana andaaz mein baithi thi. fikar aur andeshon se paray.

"Kya, tumhara nahi khayaal ab hamein dosti kar leni chahiye? Jogging track par honey wali guftagu ke baad is ne ab khamoshi ka kufl toda tha. yani poooray pandrah ghanton ke baad.

"Theek hai.! maan liya yeh kaghazi rishta hai, aik makhsoos muddat tak rahay ga, is ke baad sab khatam ho jaye ga, lekin is makhsoos muddat tak kya tum aankhon se teer naizay talware maarna band nahi kar satke?" woh usey nazar andaaz kiye apna kaam karta raha .

"Agar hamari dosti ho jaye gi to mujhe

zara zara si farmaaish ke liye auntie ke paas nahi jana parre ga, yani ke mein direct tum se baat kar sakoo gi aur is tarah bohat sahoolat rahay gi mujhe aur tumhe bhi kya khayaal hai?"

woh khamosh raha. woh ab khamosh hi rehta tha.

"waisay faris! kya tum jantey ho un larkiyon ki kahaaniyon mein kya hota hai jin ke shohar hazraat tumahray jaisa rawayya rakhtay hain?"

kuch der tak khamosh reh kar, kuch soch kar usne istafsaar kiya tha. woh nahi jaanta tha aur naahi janna chahta tha. jannat janti thi aur usey bhi batana chahti thi .

"Yani ke shadi ki pehli raat nayi naveli dulhan ko kamray se bahar nikaal dena. phir usay dhmkana. Us par roab jamana aur, apne mamlaat se dur rehne ki sakhti se Talqeen karna aur yeh bhi bawar karwana ke shadi sara sar marzi ke khilaaf ki gayi hai ya phir intiqam lainay ke liye shadi karna pari hai. waghera! waghera! pehlay mujhe lagta tha aisa sirf kahaaniyon mein hota hai.

ab mujhe lagta hai haqeeqi zindagi mein bhi aisa ho sakta hai"

aik lamhay ko ruk kar usne kuch socha, phir apne track par wapas aagai.

"Iske baad hota yeh hai ke bechari masoom si roti sakti heroin apne sareley, kharus se shohar ki khidmato mein jut jati hai. woh khud ko halaat ke hawalay kar ke uski sakhtiyan jhelti rehti hai yahan tak ke shohar ka accident ho jata hai."

faris ne screen se nigehain hata kar sawalia nigahon se usay dekha.

"oh shukar wo sun raha hai" labon par ubharti muskurahat ko jannat ne baa-mushkil roka. "halka phulka sa accident hota hai faris! kuch ziyada serious nahi hota" andaaz tasalii dainay wala tha.

"Shohar chand aik haddiyan turwaa kar bistar se lag jata hai. Uske dost ahbaab, sookhi, sadi girl friends waghera! waghera, sab usey chore deti hain magar julmo ki maari woh dukhi, be chari aur masoom si heroine usey nahi chhodhtee; aakhir ko uska shohar hai bhae! koi mazaaq thori hai. halaan ke heroin ko chahiye woh is bande ki chand haddiyan mazeed toar de, kuch aur nah sahi, aik Adad thapar hi jarr de magar nahi"

"Khair, yeh hamara masla nahi. ab hamari heroine karti yeh hai ke uski khidmat mein lag jati hai. Uska khayaal rakhti hai."

"apne hathon se khana khilaati hai. shohar uska zarf dekh kar sharminda ho jata hai. Pachhatao mein ghir jata hai. afsos karta rehta hai ke itni achi larki ki woh itna arsa be qadri karta raha usay rulata raha."

Usne ruk kar faris ko dekha, woh ab usey nahi dekh raha tha. keyboard par is ki ungliya taizi se mutahhrik theen.

"Pachhtawa unsiyat ko jagah deta hai. Unsiyat reham dil bnaditi hai. aur shayad reham se hi mohabbat janam leti hai; phir woh, apne ravayye ki maffi mangta hai. aur hamari pyari, dukhi, masoom aur naram dil, farishta sift heroine usey foran se maaf kar deti hai aur dono hansi khushi rehne lagtay hain"

faris ne laptop zor se band kar diya. Uska ghaarat shuda mood mazeed ghaarat ho chuka tha. 'ghaliban usay happy ending nahi, Talaq chahiye thi.'

"Ab mujhe samajh mein nahi aa raha ke tumahray dil aur iraadon ko badalny ke liye mujhe kya karna chahiye?"

"Ahm! un heroines ki tarah tumhari chand aik haddiyan totney ka intzaar karna chahiye ya phir mujhe apni zindagi ki kahani ko kisi aur rukh daal dena chahiye? kyun ke yeh to confirm hai khidmato se tumhara dil pighalne wala nahi, so..."

Us ne par soch nigahon se faris ko dekha.

"Tum kya mahswara do ge, mujhe kya karna chahiye?" khase soch bichaar ke baad is ne poocha tha.

"Zeher kha kar mar jana chahiye!"

"Haina! mein ne bhi yahi socha tha ke shayad is tarah tumhare iraadon par koi farq aaye, magar is tarah hoga yeh ke tumhari dili murad poori ho jaye gi aur mein khaali khwalid qabar mein utar jaoon gi. jabke mujhe apni life story mein kuch mukhtalif chahiye. kuch aisa jis se hum dono ki khwahish poori ho jaye. yani tum mujhe chhorna chahtay ho aur mein tumahray sath rehna chahti hu"

"Dono ki khwahish, aik hi waqt mein aik sath poori ho jaye." faris ne achanbhay se is larki ko dekha. hosh o hawaas mein to thi woh. bhala aik hi waqt mein dono ki mutazaad khwahisaat kaisay poori ho sakti theen?

"Batao bhi"

"MARJAO" uski bardasht ab khatam ho rahi thi.

"Phir bad-rooh ban kar tumahre agey peechay phiron yahi?" woh par josh hui.

"Ab agar dobara tumhari aawaz aayi to mein tumhe kamray se nikaal dun ga!" Usay warning day kar woh lehaaf tane sonay ke liye late gaya tha.

"Janwar ke sath bhi insaan kuch waqt betaye to unse unsiyat ho jati hai, mein to phir insaan hu, mere sath reh kar tumhara dil bhi naram ho jaye ga."

"Bhool hai tumahari!"

"Bhool meri nahi, tumhari hai faris wajdan!"

Usne uth kar lights of kar di. magar jab sofay par baithi to kisi khayaal ke tehat uski ankhen chamak rahi theen. woh aane wale kal ka soch rahi thi aur kal is ne kya karna tha, woh programme tarteeb de rahi thi.

•••

aglay din theek gayarah bujey woh shirazi interprisess mein uske office ke bahar khari thi. shandaar imarat ki 12 manzil tak pounchanay se pehlay woh mukhtalif floors par mukhtalif staff members se apna taaruf karwati hui aayi thi.

woh jannat Bint kamaal thi. Shirazi interprisess ke nojawan chairmen or CEO ki jojza mohatarma. jo bhi usse mila. heran ho kar mila. khaas kar khawateen staff to kuch ziyada hi sadme mein thi.

"aap ne faris ko bataya to nahi ke mein yaha aayi hon?" Usne Siddiqui sahib se kaha tha .

"Nahi, filhaal unhen ilm nahi, is waqt woh meeting mein masroof hain." Finance manager Siddiqui sahab usey jante thay, unhon ne nikah aur walima mein shirkat ki thi. is waqt bhi wohi uske hamrah thay.

"Achhi baat hai, mein unhen surprise dena chahti hu"

Siddiqui sahib badkat muskuraye. jantay thay un ke boss ko surprise kitney buray lagtay thay. Fourth floor par wo yuhi tehlne lagi. Usne siddique sahab se bhi keh diya ke wo faris ke office tak khud hi chali jaye gi.

deewar geer khirkion se shehar ka khoob soorat nazara karti woh agey barhti gayi. pandrah beesh minute tak wo tahelti rahi aur jab Siddiqui sahab ki taraf se usey meeting khatam honay ka notice mila to woh chand larkiyon ke sath lift par sawaar hogayi.

'Suna hai faris wajdan ki mrs. aayi hui hain.'

'mein ne bhi yahi suna hai.'

company ki female staff ke sath hamare boss itnay rude hai, khuda jane biwi ke sath kya rawayya hoga? biwi par to jaan chhidkte honge. doosri ne luqmah diya.

Uske aqab mein khadi jannat be sakhta hans di.

Teeno ne mud kar usay dekha. ghalti ka ehsas hotay hi woh masrufiyat bharay andaaz mein mobile screen par jhuk gayi.

kuch hi der mein woh 12th floor par faris wajdan ke office ke samne khari thi. secretary ne phone par ittila poucha di thi aur us ki tawaqqa ke baraks usey foran hi talab kar liya gaya tha. ijazat mlite hi woh darwaaza khol kar uske office mein daakhil hui aur heran reh gayi.

safaid rang ki theme mein saja uska office intehai shandaar tha. magar office se bhi shandaar to uske shohar ka gussa tha. shirts ki aasteen kohni tak moray, peshani par dhair saaray bal daale woh ghusse mein tha. aankhon mein surkhi thi, jabde bheenchey hue thay. tassurat pathar ki tarah sakht pathirelay se

"Tum yaha kya kar rahi ho?" sar par pahonch kar woh dubi aawaz mein dahada tha.

"Apne kaghazi shohar ka office dekhnay aayi thi. is mein koi gunah hai kya?" faris ko jawab day kar usne Ishtiaq ke aalam mein charon aur nigah dorhayi. faris ne muthiyaan bhinch li.

office table par dharay kuch decorations pieces ko chhedte hue usne name plate ko baghore dekha. wall par lagi safaid Buraq ghoray ki painting ko saraha. shelf mein tarteeb se rakhi files ka jaiza liya. phir aaraam se taang par taang jamaye couch par baith gayi .

"Kehte hain safaid rang aman aur mohabbat ki alamat hota hai. tumhe kya lagta"

woh sard nazron se usey daikhta raha. "aur yeh bhi kaha jata hai ke jo log is rang ko pasand karte hain, un ke mizaaj mein dheema pan hota hai, woh salah jo aur Burdbar hotay hain. kya aisa hi hai?"

"kyun aayi ho yaha?" faris ne is ke sawalaat nazar andaaz kar diye.

"Chai ya coffee ka nahi pucho ge tum?" jannat ne palken jhhapkayi.

"NAHI"

"halan ke auntie keh rahi thi, tum khasay maheman Nawaz ho"

"Abhi aur is waqt dafaa ho jao yaha se"

"Ab dafaa to mein tumhare sath hi ho sakti hon, driver mujhe drop kar ke ja chuka hai, auntie se mein keh aayi hoon, ke tum ne hi mujhe apne office call kar ke bulaya hai aur aaj hum dono kisi achhe restaurants mein lunch karege."

faris ne khud par baa-mushkil zabt ke pehray bethaye thay .

"Kitni raqam chahiye tumhe?" office ki kursi par baith kar usne be had mehal se poocha tha.

"Kis liye?" woh heran hui thi.

"Is drama ko khatam karne ke liye!"

"Tumhe lag raha hai mein acting kar rahi hoon?" jannat ko bura laga.

"Tum yeh jo kuch bhi kar rahi ho, isey khatam karne ke liye kya logi?"

"aik cup chai aur italian restaurant mein tumahray sath lunch! "

faris ne baa-mushkil khud par qaboo paaya.

"waise tum ne abhi tak kisi ko bataya nahi ke tum married ho? sab yu heran hotay hain jaise kisi bhoot ko dekh liya ho" faris ne apni kursi chhor di thi.

"Utho ab!"

"magar mein ne to abhi chai nahi pi.." wo sakhti se baazu mein ungelian garhe, usay khech kar uthatay hue darwazay par le aaya.

"How rude" jannat ne apna aap churra kar usay tandehli se dekha .

"mein bohat masroof hu, tumhari in jhoot mut ki adakari aur do numbri farmaishon ki takmeel ke liye waqt nahi hai mere paas, driver call karo aur yahan se chalti bano"

dabi aawaz mein jhaad kar usne darwaaza khol diya. secretary ne be ikhtiyar sar uthaya tha.

"Darling!"

secretary ke samnay jannat ka rawayya khasa romantic ho gaya.

"mein yahin baith kar aap ka intzaar karu gi, bhaley se sara din baithi rahu mujhe koi masla nahi"

aur faris ka bas nahi chal raha tha woh is larki ko shirazi interprisess ki barvi manzil se neechay pheink day. lab bhinch kar is ne office ka darwaaza band kar diya tha. kuch ziyada hi qowat se.

"Mein dekhatii hon kab tak mujhe bahar bithaata hai" seenay par bazu bandhe he woh secretary ke office mein baith gayi thi. ab secretary aur woh dono hi aik dosray ka jaiza le rahi theen .

aur tab hi call mashool hui. kuch sun kar secretary ne faris wajdan se rabta kiya.

'Sir, Shah group ke lawyer Burhan laghari ki call aayi hai, aik ghantay baad aap ki un ke sath meeting hai"

jannat ke chehray ke tasurat badal gaye. Uske soch, uske khayaal jaamad hue. woh yahan kyun kisi, liye aayi hai, sab bhool bhaal gayi. halaq mein ubharti gilty ko baa-mushkil neechay utaartay hue is ne gaal par phisalti lut ko kaan ke peechay ursa. second ke hazarwe hisse mein is ka sukoon darham-barham huwa tha.

"ma'am! aap chai legi ya coffee?" secretary ab usse pooch rahi thi. shiddat se dharaktey dil ke sath is ne usay dekha aur uth khari hui .

"kuch nahi" woh jo shaam tak faris ke office mein bethnay ke iraday se aayi thi, bag ki strip par haath jamaye usi waqt wahan se chali gayi thi.

---- •♡• ----